Na es ténpu di tekinolojia, nos patron, kolégas di trabadju ô klientis, talvês ta spéra ma nu ten ki sta disponível pa es 24 óra pa dia, 7 dia pa simana. I pamodi kel-li é más difísil nu sipara nos trabadju di otus kuza na vida ki é más inportanti, sima nos kazamentu.

•  Kuzê ki bu debe sabe

•  Modi ki bu pode ikilibra trabadju ku família

•  Kuzê ki alguns kazal ta fla

•  Perguntas ki pode djuda nhos pâpia ku kunpanheru

•   Tekinolojia pode pô-u ta da más atenson pa bu trabadju di ki pa bu kazamentu. Pode parse ma kada xamada, e-mail ô mensájen ki bu ta resebe sobri trabadju é un kuza ki bu ten ki rezolve kel óra.

   “Kel ideia di ben pa kaza dipôs di trabadju i pasa ténpu ku bu família sta ta parse un kuza kada bês más difísil gósi. Kel-li ta kontise pamodi óras ki bu ta resebe un e-mail ô un xamada sobri trabadju bu ta konsentra na es, i bu kazamentu ta fika na sugundu lugar.” — Jeanette.

•   Pa bu konsigi ikilibra trabadju ku família bu ten ki faze algun kuza. Si bu ka faze un planu, bu trabadju pode prujudika bu kazamentu.

   “Normalmenti primeru algen ki bu ta poi di ladu é bu maridu ô bu mudjer. Pamodi bu ta pensa: ‘El ta ntende. El ta purdua-m. N ta ranja ténpu pa el dipôs.’” — Holly.

•   Poi bu kazamentu na primeru lugar. Bíblia ta fla: “Kel ki Deus poi djuntu, ómi ka debe sipara.” (Mateus 19:6, New American Bible, Revised New Testament) Si bu ka ta dexaba ningen ‘sipara-u’ di bu maridu ô bu mudjer, nton pamodi ki bu ta dexa bu trabadju faze kel-li?

   “Alguns klienti ta atxa ma pamodi es ta paga-u es pode txoma-u óras ki es krê. Má, nha kazamentu sta na primeru lugar. Nton, N ta fla-s gósi ka ta da. N sta na nha dia di fólga, dipôs N ta txoma nhos.” — Mark.

   Pergunta bu kabésa: ‘N ta mostra na kuzas ki N ta faze ma nha kazamentu é más inportanti di ki nha trabadju?’

•   Óras ki meste, fla nau pa trabadju. Bíblia ta fla: ‘Sabedoria sta ku kes algen ki é modéstu.’ (Provérbios 11:2) Ser modéstu ta djuda-u nega un trabadju ô ranja otu algen pa faze-l.

   “Ami é kanalizador, pur isu óras ki un algen ta meste di nha ajuda, el ta krê pa N rezolve kel prubléma kel óra. Si N ka ta pode bai na kel óra ki el ta krê, N ta ranja un otu algen pa bai faze kel trabadju.” — Christopher.

   Pergunta bu kabésa: ‘N sta dispostu na nega un trabadju, si kel-li ta poi nha maridu ô nha mudjer ta xinti ma N ka sta ta da-l atenson? Kuzê ki nha maridu ô nha mudjer ta atxaba sobri nha respósta pa kel pergunta li?’

•   Nhos tra ténpu pa nhos sta djuntu ku kunpanheru. Bíblia ta fla: ‘Ten un ténpu markadu pa tudu kuza’. (Eclesiastes 3:1) Óras ki bu sta txeu okupadu na trabadju, é rei di inportanti bu faze planu pa bu pasa ténpu ku bu maridu ô bu mudjer i faze di tudu pa bu sigi kel planu.

   “Normalmenti, óras ki mi ku nha maridu nu sta txeu okupadu, nu ta konbina un óra sikrê sô pa nu janta ô pa nu pâsia djuntu na praia, i nu ka ta dexa nada trapadja-nu.” — Débura.

   Pergunta bu kabésa: ‘N ta tra un ténpu sô pa nha maridu ô pa nha mudjer? Kuzê ki nha maridu ô nha mudjer ta atxaba sobri nha respósta pa kel pergunta li?’

•   Disliga tudu aparelhus iletróniku. Bíblia ta fla: ‘Konfirma kuzê ki é más inportanti’. (Filipenses 1:10) Di vês en kuandu bu pode disliga bus aparelhu iletróniku, pa bu ka dexa kuzas di trabadju distrai-u?

   “N ta sforsa txeu pa N ranja un óra ki N ta para di trabadja. N tenta faze nha midjór pa N kunpri kel-li. I óras ki kel óra da, N ta poi nha telemóvel di un manera ki N ka ta odja kes mensájen ta entra.” — Jeremias.

   Pergunta bu kabésa: ‘N ta xinti ma N meste dexa nha telemóvel ligadu kazu nha patron ô nhas klienti meste di mi? Kuzê ki nha maridu ô nha mudjer ta atxaba sobri nha respósta pa kel pergunta li?’

•    Ser ikilibradu. Bíblia ta fla: ‘Pa tudu ómi fika ta sabe ma nhos é algen ikilibradu.’ (Filipenses 4:5) Alvês, bu maridu ô bu mudjer ta meste pasa más ténpu na trabadju di ki ku bo. Pur izénplu, pamodi tipu di trabadju ki bu maridu ô bu mudjer ta faze el pode txomadu kalker óra. Pur isu, ser ikilibradu i ka bu iziji dimás di bu maridu ô bu mudjer.

   “Nha maridu ten un nogósiu pikinoti. I txeu bês ten imerjénsia ki el ten ki ta lida ku el dipôs di óra di se trabadju. Alvês kel-li ta xatia-m, má simé inda nu ta pasa txeu ténpu djuntu. Pur isu sta tudu dretu.” — Beverly.

   Pergunta bu kabésa: ‘N ta mostra nha maridu ô nha mudjer ma N ta ntende ma el tene txeu trabadju i N ka ta iziji pa el da-m más atenson di ki kel ki el ta konsigi? Kuzê ki nha maridu ô nha mudjer ta atxaba sobri nha respósta pa kel pergunta li?’

 Primeru, nhos analiza kes pergunta li nhos sô. Dipôs, nhos pâpia ku kunpanheru sobri nhos respósta.

•   Algun bês bu maridu ô bu mudjer dja kexa pamodi bu traze trabadju pa kaza? Bu ta atxa ma el ten razon?

•   Kuzê ki bu ta atxa ma bu meste midjora pa bu ten ikilíbriu na bu trabadju i otus ária di bu vida?

•   Bu ta atxa ma bu maridu ô bu mudjer ta konsigi ka traze “trabadju” pa kaza? Bu ta konsigi lenbra di kes bês ki kel-li kontise?

•   Bu ta atxa, ma bu maridu ô bu mudjer pode fazeba algun mudansa pa el pode ten ikilíbriu na se trabadju i otus ária di se vida? Si bu ta atxa ma sin, ki mudansa?