Spritu santu é puder, ô forsa di Deus. (Miqueias 3:8; Lucas 1:35) Bíblia ta fla ma Deus ta manda se spritu pa undi ki meste pa faze se vontadi. — Salmo 104:30; 139:7.

 Na Bíblia, palavra spritu traduzidu di palavra ebraiku rú·ahh i di palavra gregu pneú·ma. Txeu bês kes palavra li ta siginifika forsa di Deus, ô se spritu santu. (Génesis 1:2) Má, na Bíblia kes palavra li pode siginifika otus kuza sima:

•   Folgu. — Habacuque 2:19; Apocalipse 13:15.

•   Béntu. — Génesis 8:1; João 3:8.

•  

  Forsa di vida ki sta na algen ku animal. — Génesis 6:17.

•   Atitudi ô dispozison di un algen. — Números 14:24.

•   Pesoas ku korpu spritual, sima Deus i anjus. — 1 Reis 22:21; João 4:24.

 Tudu kes siginifikadu li ta da kel mésmu ideia: un kuza ki nu ka ta pode odja, má nu ta pode odja kuzas ki el ta faze. Di mésmu manera, spritu di Deus, “sima béntu, nu ka ta pode odja-l, nu ka ta pode toka-l i el é poderozu”. — An Expository Dictionary of New Testament Words by W. E. Vine (Dicionário Expositivo de Palavras do Novo Testamento de William Vine).

 Tanbê Bíblia ta konpara spritu santu ku ‘mô’ ô ‘dédu’ di Deus. (Salmo 8:3; 19:1; Lucas 11:20; konpara ku Mateus 12:28.) Sima un artizon ta uza se mô ku se dédu pa faze se trabadju, Deus uza se spritu santu pa faze kuzas sima:

•   Séu ku Téra. — Salmo 33:6; Isaías 66:1, 2.

•   Bíblia. — 2 Pedro 1:20, 21.

•   Kes milagri i pregason ki se sérvus na ténpu antigu faze. — Lucas 4:18; Atos 1:8; 1 Coríntios 12:4-11.

•   Kes bon kualidadi ki kes algen ki ta obi ku Deus ta mostra. — Gálatas 5:22, 23.

Spritu santu é ka un algen

 Bíblia ta konpara spritu santu ku ‘mô’, ‘dédu’ ô ‘folgu’ di Deus. Kel-li ta mostra ma spritu santu é ka un algen. (Êxodo 15:8, 10) Mô di un artizon ka ta funsiona el sô, el ten ki sta ligadu ku korpu i menti di kel algen. Di mésmu manera, spritu santu ka ta faze kuzas el sô, é Deus ki ta orienta-l. (Lucas 11:13) Tanbê Bíblia ta konpara spritu di Deus ku agu, i alvês el sta ligadu ku kuzas sima fé i konhisimentu. Kes tipu di konparason li ta mostra ma spritu santu é ka un algen. — Isaías 44:3; Atos 6:5; 2 Coríntios 6:6.

 Bíblia ta pâpia di nómi di Deus Jeová i di se Fidju, Jizus. Má na ninhun lugar el ka ta fla ma spritu santu ten nómi. (Isaías 42:8; Lucas 1:31) Kantu Estevon tevi un vizon di Séu, el ka odja três algen má el odja sô dôs. Bíblia ta fla: ‘Estevon staba xeiu di spritu santu. El poi se odju na séu i el odja glória di Deus i Jizus sakédu na direita di Deus.’ (Atus 7:55, Bíblia na Prugrésu Di Traduson Pa Lingua Kabuverdianu, BPK) Spritu santu éra kel forsa di Deus ki djuda Estevon ten kel vizon.

 Stória inventadu: Spritu santu é un algen i el ta faze párti di Trindadi, sima sta na 1 João 5:7, 8 na traduson Almeida di Bíblia.

 Verdadi: Na alguns traduson di Bíblia, sima Almeida, nu ta atxa kes palavra li na 1 João 5:7, 8: ‘Na Séu: Pai, Palavra i Spritu Santu; i es três é un, i es três ta da tistimunhu na Téra’. Má kes algen ki ta faze piskiza diskubri ma é ka apóstlu Juan ki skrebe kes palavra li, pur isu el ka ta faze párti di Bíblia. Un profesor di universidadi ki txomaba Bruce Metzger skrebe: “Nu pode ten sertéza ma kes palavra li ben podu dipôs na Novu Testamentu, má el ka debe sta la.” — A Textual Commentary on the Greek New Testament (Comentário Textual sobre o Novo Testamento Grego).

 Stória inventadu: Bíblia ta pâpia di spritu santu sima ki el é un algen, pur isu kel-li ta prova ma el é un algen.

 Verdadi: Alvês Skrituras ta pâpia di spritu santu sima ki el é un algen. Pur izénplu, kantu apóstlu Juan fla kes palavra di Jizus, el pâpia di spritu santu sima ki el é un algen. El txoma-l di ‘ajudador’, ‘ki ta daba próvas’, ‘ki ta giaba’, ‘ki ta papiaba’, ‘ki ta obiba’, ‘ki ta flaba’, ‘ki ta glorifikaba’ i ‘ki ta resebeba’. (João 16:7-15) Má kel-li ka ta mostra ma el é un algen. Bíblia tanbê ta pâpia di sabedoria, mórti i pekadu sima ki es é un algen. (Provérbios 1:20; Romanos 5:17, 21) Pur izénplu, Bíblia ta fla ma sabedoria ten ‘óbras’ i ‘fidjus’, i ma pekadu é kel ki ta ngoda, ki ta mata i ki ta kubisa. — Mateus 11:19; Lucas 7:35; Romanos 7:​8, 11.

 Stória inventadu: Batiza na nómi di spritu santu ta prova ma el é un algen.

 Verdadi: Alvês Bíblia ta fla ‘na nómi di’ Deus pa reprizenta puder ô autoridadi. (Deuteronómio 18:5, 19-22; Ester 8:10) Óras ki un algen ta batizadu ‘na nómi di’ spritu santu, kel-li ta mostra ma el ta rekonhese puder i papel di spritu santu na kunpri vontadi di Deus. — Mateus 28:19.

 Stória inventadu: Apóstlus di Jizus i kes otu disiplu ta kriditaba ma spritu santu éra un algen.

 Verdadi: Nen Bíblia nen Stória ka ta fla kel-la. Un ensiklopédia a ta fla: “Kel ideia ma Spritu Santu é un Algen siparadu i ki debe ser adoradu. . . kumesa na un runion ki alguns igreja faze na sidadi di Konstantinopla na anu 381 D.J.” (Concílio de Constantinopla) Kel-li kontise más di 250 anu dipôs ki últimu apóstlu móre.