Nau. Bíblia ta mostra ma nu debe faze orason sô pa Deus, na nómi di Jizus. Jizus fla se disiplus: ‘É si ki nhos debe reza: Nos Pai ki sta na Séu, pa nómi di nho ser santifikadu.’ (Mateus 6:9, Centro Bíblico Católico) Jizus nunka ka fla se disiplus ma es devia oraba pa santus, pa anjus ô pa kalker otu algen alén di Deus.

 Tanbê Jizus fla se disiplus: ‘Ami é kaminhu, verdadi i vida. Ningen ka ta txiga na Pai si ka é através di mi.’ (João 14:6, CBC) É sô Jizus ki Deus da autorizason pa pidi pa nos. — Hebreus 7:25.

I si N faze orason pa Deus i tanbê pa santu?

 Na un di kes 10 Mandamentu, Deus fla: ‘Ami é SINHOR bu Deus, un Deus siumentu.’ (Êxodo 20:5, Conferência Nacional dos Bispos do Brasil) Di ki manera Deus é ‘siumentu’? Nova Tradução da Linguagem de Hoje traduzi kel testu si: ‘Ami é Sinhor bu Deus, N ka ta tolera otus Deus.’ Deus ta iziji pa nos adorason, ki ta inklui kes orason ki nu ta faze, ser sô pa el. — Isaías 48:11.

 Si nu faze orason pa kalker algen, sikrê pa un santu ô pa un anju, nu sta ta ofende Deus. Kantu apóstlu Juan tenta adora un anju, kel anju ka dexa-l i el fla: ‘Ka bu faze kel-li! Ami é un sérvu sima bo ku bus irmon ki ten tistimunhu di Jizus. Adora Deus.’ — Apocalipse 19:10.