Tistimunhas di Jeová ka ta bai pa géra, pamodi kes motivu li:

1.   Es ta obi ku Deus. Bíblia ta fla ma sérvus di Deus ‘ta transforma ses spada na aradu’ i ‘es ka ta prende géra más.’ — Isaías 2:4.

2.   Es ta obi ku Jizus. Jizus fla apóstlu Pedru: “Torna poi spada na se lugar, pamodi tudu kenha ki ta uza spada é spada ki ta mata-l.” (Mateus 26:52) Di kel manera li, Jizus mostra ma se sigidoris ka ta ben pegaba na armas di géra.

    Disiplus di Jizus ta obi ku se órdi di ka “faze párti di mundu”. Es ta faze kel-li óras ki es ka ta mete na ninhun asuntu di pulítika. (Juan 17:16) Es ka ta faze manifestason kóntra géra i nen es ka ta fika kóntra kes algen ki ta bai pa trópa.

3.   Es ta ama otus algen. Jizus da se disiplus órdi di “ama kunpanheru”. (Juan 13:34, 35) Di kel manera li, es ta ben fazeba párti di un família na mundu interu i ninhun di es nunka ka ta fazeba géra kóntra se irmon ô irman. — 1 Juan 3:10-12.

4.   Es ta imita kes primeru kriston. Un ensiklopédia a ta fla: “Kes primeru disiplu di Jizus ka ta baba pa géra i nen pa trópa,” pamodi es ta rekonheseba ma kes kuza li ta bai “kóntra amor ki Jizus mostra i kel órdi di ama nos inimigus.” Di mésmu manera, Peter Meinhold ki é un tiológu di Alimanha fla kel-li sobri kes primeru disiplu di Jizus: “Es ta atxaba ma ser un kriston i ser un trópa é un kuza ki ka ta konbina ku kunpanheru.”

 Tistimunhas di Jeová é bons sidadon i es é ka un amiasa pa suguransa di país undi ki es ta mora. Es ta ruspeta autoridadi di govérnus, di akordu ku kes mandamentu di Bíblia li:

•   “Obi ku autoridadi.” — Romanus 13:1.

•   “Nhos paga Séza kes kuza ki é di Séza, má nhos da Deus kes kuza ki é di Deus.” — Mateus 22:21.

 Pur isu, nu ta obi ku lei, nu ta paga inpostu i nu ta kolabora ku kes sforsu ki govérnu ta faze pa midjora vida di pesoas.