N nase na La Ceiba, na Onduras. Ami é kel más pikinoti di sinku fidju i mi é kel úniku matxu. Tanbê ami é úniku surdu na nha família. Mi ku nha família nu ta moraba na un zóna prigozu i nos éra txeu póbri. Nos situason fika más piór dipôs ki nha pai móre na un asidenti na trabadju kantu ki N tinha uns kuatu anu.

 Nha mai faze kel midjór ki el ta podia pa el kuida di mi ku nhas kuatu irman, má kuazi nunka el ka ta tinha dinheru pa kunpra-m ropa. Óras ki ta txobeba, txeu bês N ta fikaba ku friu pamodi N ka tinha ropa di friu.

 Sima N ba ta kria, N prende língua jestual di Onduras. Kel-li djuda-m konsigi pâpia ku jéstu ku otus surdu. Má nha mai ku nhas irman ka sabia língua jestual. Es ta uzaba sô kes jéstu ki es inventa pa es podia pâpia ku mi. Má, nha mai ta amaba mi i el proteje-m di prigu. Ku kes poku jéstu ki el sabia, el aviza-m pa N ivita vísius sima fuma i bebe dimás. Pur isu, N ta fika kontenti pamodi nunka N ka ranja vísiu ku ninhun di kes kuza li.

 Kantu mi éra pikinoti, nha mai ta kustuma lebaba mi pa Igreja Katólika, má N ka ta konsigiba ntende nada pamodi ka tinha ningen pa faze jéstu pa mi. N ta fikaba txeu nfadadu ki kantu N tinha 10 anu N para di ba igreja. Má simé, N kria sabe más sobri Deus.

 Na anu di 1999, kantu ki N tinha 23 anu, N konxe un mudjer di Mérka ki éra di un igreja ivanjéliku. El inxina-m kuzas sobri Bíblia i língua jestual di Mérka. N staba ta gosta txeu di kel ki N prende sobri Bíblia ki N disidi bira pastor. Nton, N bai mora na Portu Riku pa N podia bai na un séntru relijiozu ki ta trenaba surdus. Na anu di 2002, kantu ki N volta pa La Ceiba, ku ajuda di alguns amiga N abri un igreja pa surdus. Dipôs N kaza ku Patricia ki éra un di kes nhas amiga.

 Dja ki mi éra pastor di nos igreja, N ta fazeba diskursus na língua jestual di Onduras, N ta mostraba dizenhus di stórias di Bíblia i N ta fazeba alguns dimonstrason di kes stória pa djudaba surdus ntende. Tanbê, N ta vizitaba kes algen surdu ki ta moraba na kes zóna pértu pa N nkoraja-s i djuda-s ku ses prubléma. N txiga ti di faze un viaji di misionáriu pa Mérka i Zánbia. Má na verdadi, N ka sabia txeu sobri Bíblia. N ta flaba es sô kes kuza ki N fladu i kes kuza ki N ta ntendeba di kes dizenhu di stórias di Bíblia. Pa ser sinseru, N tinha más perguntas di ki respóstas.

 Un dia, alguns algen di nha igreja kumesa ta spadja mintira sobri mi. Es fla ma N ta bebeba dimás i ma N trai nha mudjer. N fika diziludidu i xatiadu. Poku ténpu dipôs di kel-li, mi ku Patricia larga kel igreja.

 Tistimunhas di Jeová dja vizitaba nos txeu bês, má nunka nu ka da-s atenson. Má, dipôs ki nu larga nos igreja, Patricia seta studa Bíblia ku Thomas i ku se mudjer ki txoma Liccy. N fika dimiradu pamodi nbóra es ka éra surdu, es sabia língua jestual. Nton poku ténpu dipôs N kumesa ta studa Bíblia djuntu ku Patricia.

 Nu studa duránti alguns mês ku vídius na língua jestual di Mérka. Má kantu ki alguns di nos amigus fla-nu ma Tistimunhas di Jeová ta sigiba ideias di ómis, nu para di studa Bíblia. Nbóra Thomas mostra-m próva ma Tistimunhas di Jeová ka ta sigi ideias di ómis, N ka kridita na el.

 Alguns mês dipôs, kantu ki Patricia xinti txeu diprimidu, el pidi Deus pa traze Tistimunhas di Jeová pa se pórta otu bês. Poku ténpu dipôs, un nos vizinhu ki éra Tistimunha di Jeová vizita Patricia i el oferese pa pidi Liccy pa vizita-l. Liccy mostra ma el é un bon amiga. El vizita Patricia tudu simana pa nkoraja-l i pa studa Bíblia ku el. Má simé, inda N tinha dúvidas sobri Tistimunhas di Jeová.

 Na anu di 2012, Tistimunhas di Jeová partisipa na un kanpanha spesial pa dexa vídiu Gostaria de Aprender a Verdade?, na língua jestual di Onduras. Liccy traze-nu un vídiu di kes-la. Kantu ki N odja kel vídiu, N fika spantadu pamodi txeu di kes kuza ki N ta inxinaba, sima inférnu di lumi i ma alma ka ta móre, ka staba na Bíblia.

 Kel otu simana, N bai pa Salon di Reinu di Tistimunhas di Jeová pa N bai pâpia ku Thomas. N fla-l ma N kria inxina surdus kes verdadi di Bíblia má ka djuntu ku Tistimunhas di Jeová. Nha ideia éra abri otu igreja novu pa surdus. Thomas ilojia-m pamodi N staba ku zelu otu bês, má el mostra-m Efésios 4:5, ki ta distaka nisisidadi di ten union na kel kongregason verdaderu di Deus.

 Tanbê Thomas da-m kel vídiu Testemunhas de Jeová — Fé em Ação, Parte 1: Da Escuridão para a Luz, na língua jestual di Mérka. Kel vídiu mostra-m modi ki un grupu di ómi analiza Bíblia ku kuidadu pa es pode ntende verdadis sobri kes ensinu prinsipal. Sima N ba ta odja kel vídiu, N konsigi ntende modi ki kes ómi xintiba. Sima es, N staba ta djobe verdadi tanbê. Kel vídiu konvense-m ma Tistimunhas di Jeová ta inxina verdadi pamodi ses krénsa ten bazi sô na Bíblia. Nton N kumesa ta studa Bíblia otu bês i na anu di 2014 mi ku Patricia batiza i nu bira Tistimunhas di Jeová.

 N gosta di kongregason di Tistimunhas di Jeová pamodi es ta konporta di manera puru, sima Deus é puru. Es é puru na ses manera di pâpia i na manera ki es ta trata otus. Es ta mante pas i es ta nkoraja kunpanheru. Tistimunhas di Jeová é unidu i es tudu ta inxina kes mésmu verdadi di Bíblia ka ta nporta na ki país ki es sta ô ki língua ki es ta pâpia.

 N gosta txeu di prende kuzê ki Bíblia ta inxina di verdadi. Pur izénplu, N prende ma Jeová é kel Deus Tudu-Poderozu i kel Deus Más Grandi riba Téra. El ta ama surdus i kes ki ta obi. N ta da txeu valor pa amor ki Deus ten pa mi. Tanbê N prende ma Téra ta ben bira un paraízu bunitu i ma nu ten xansi di ten vida pa tudu ténpu ku saúdi perfetu. Fórti N ten gana di odja kel dia ki tudu kes kuza li ta ben kunpri mê!

 Mi ku Patricia nu gosta txeu di pâpia ku otus surdu sobri Bíblia. Gósi nu sta studa Bíblia ku alguns di kes algen di kel igreja ki nu ta staba na el. Má gósi N ka tene más perguntas sobri kel ki N ta inxina, sima kantu mi éra pastor. Ti ki enfin, N atxa respóstas pa nhas perguntas através di studu di Bíblia ku Tistimunhas di Jeová.