Bambangi ya Yehowa me zabanaka sambu na kisalu na bo ya kubalula mikanda. Na Novembri 2014, beto balulaka Biblia na bandinga 125 mpi mikanda ya ke tendulaka Biblia na bandinga 742. Kisalu na beto ya kubalula mikanda ke tadila mpi bavideo. Na Yanuari 2015, video Inki Ke Salamaka na Nzo ya Kimfumu? vandaka na bandinga 398, mpi video Sambu na Nki Beto Fwete Longuka Biblia? vandaka na bandinga 569. Sambu na nki mpi nki mutindu beto salaka yo?

Na Marsi 2014, Nto-Kimvuka ya Bambangi ya Yehowa lombaka babiro ya bafiliale na ntoto ya mvimba na kuyidika masonama ya bavideo yina na bandinga mingi sambu na kusiamisa bantu na kulonguka Biblia.

Kubalula video ke lombaka kusala mambu mingi. Ya ntete, kimvuka ya bambaludi ke balulaka mambu yina bo ta tuba na video. Na nima, bo ke ponaka bantu ya ke tubaka ndinga yina mbote sambu na konso ndinga ya kele na video. Ebuna, bimvuka ya audio/video ke kotisaka ndinga na bandinga yina bo me balula, ke songisaka bandinga yina bo kotisaka, mpi bo ke yidikaka mambu yina bantu ya ke tala video lenda tanga. Na nsuka, bo ke vukisaka bandinga ya bo me kotisa, masonama, mpi video sambu na kusala fishe mosi ya nsuka yina bo ke tulaka na site internet.

Bafiliale ya nkaka kele ti bastidio ya kukotisa bandinga mpi bantu ya me zaba kisalu mbote sambu na kusala kisalu yai. Kansi, inki mutindu beto ke salaka sambu na bandinga yina bo ke tubaka mpi ke balulaka na bansi ya ntama?

Na ntoto ya mvimba, bantu ya kisalu ya kukotisa bandinga yina kele ti bisadilu ya kukotisila ndinga yina bo lenda nata na maboko kwendaka kusala kuna. Muntu ya kisalu ya kukotisa bandinga vandaka kusadila mikro ti ordinatere ya maboko yina kele ti programe ya kukotisila bandinga; yandi vandaka kusala stidio ya ntangu fioti ya kukotisila bandinga na biro mosi, na Nzo ya Kimfumu, to na nzo ya mpangi mosi. Bantu ya ke tubaka ndinga yina vandaka kusala bonso batangi, bantwadisi, mpi bantu ya ke songisa mambu. Ntangu bo vandaka kumanisa kukotisa bandinga mpi kundima nde mambu yonso kele mbote, muntu ya kisalu ya kukotisa bandinga vandaka kukanga bisadilu na yandi mpi kukwenda na kisika ya me landa.

Na nsadisa ya metode yai, bo vandaka kusala bavideo na bandinga mbala tatu kuluta mutindu bo vandaka kusala ntete.

Bantu mingi kibeni me sepelaka na bavideo yai. Sambu na bantu mingi, bavideo na beto kele bavideo ya ntete kibeni na ndinga na bo.

Pitjantjatjara kele na kati ya bandinga yina bo salaka bavideo; bantu kuluta 2500 ke tubaka yo na Australie. Bo salaka kisalu ya kotisa bandinga na Mbanza Alice Springs na Teritware ya Nordi. Callan Thomas, yina sadisaka na kukotisa bandinga tubaka nde: “Bantu sepelaka mingi kibeni na bavideo yina. Bantu ya bwala yina vandaka kutala bavideo yina ti dikebi mingi mpi bo vandaka kuyula kana bo lenda zwa bavideo ya nkaka na wapi. Na ndinga yina mikanda ke vandaka mpenza ve. Kana bo wa yo​—mpi mingi-mingi kana bo mona yo​—bo ke yitukaka.”

Bambangi ya Yehowa zole vandaka kusala nzietelo na Caméroun na bwatu pene-pene ya nto ya nzadi. Bo telamaka na bwala mosi ya ba pigmée mpi bo solulaka ti mfumu na bo, yina vandaka longi na nzo-nkanda ya bwala na bo. Na nima ya kuzaba nde mfumu ya bwala yina ke tubaka Kibassa, bampangi yina sadilaka tableti sambu na kubudila yandi video Sambu na Nki Beto Fwete Longuka Biblia? na ndinga na yandi. Mfumu yina sepelaka mingi mpi yandi lombaka ndambu ya mikanda ya bo me niemaka.

Na bwala mosi na Indonésie, ntwadisi ya dibundu ya bwala yina telaminaka Bambangi ya Yehowa, mpi yandi yokaka mikanda yonso yina bo kabulaka. Bantu ya nkaka na bwala yina tubaka nde bo ta yoka Nzo ya Kimfumu mpi ta bwisa yo. Na nima, bapolisi iya kwendaka na nzo ya Mbangi ya Yehowa mosi mpi bo yulaka yandi ti dibuta na yandi bangiufula. Bo vandaka kuzola kuzaba mambu yina ke salamaka na Nzo ya Kimfumu, yo yina bo songaka yandi video Inki Ke Salamaka na Nzo ya Kimfumu? na ndinga ya Indonésie.

Na nima ya kutala video, polisi mosi tubaka nde: “Ntangu yai mono ke mona nde bantu ke bakisaka beno ve mpi bo me zaba beno mbote ve.” Polisi ya nkaka yulaka nde: “Keti beno lenda pesa mono video yai sambu mono songa yo na bantu ya nkaka? Video yai ke pesa bansangu ya mbote sambu na beno.” Ntangu yai ba polisi kele ti dibanza ya mbote sambu na Bambangi ya Yehowa mpi bo ke taninaka bo.

Kana nge me talaka ntete ve bavideo yai, sambu na nki ve kutala yo na ndinga na nge?