Bafoto Yina Ke Kumisaka Mikanda Kitoko
Inki mutindu bampangi na beto ke kangaka bafoto yina ke kumisaka mikanda na beto kitoko? Sambu na kuzaba mambu yina bo ke salaka, beto tadila mutindu bo yidikaka lutiti ya zulu ya Réveillez-vous ! ya Septembri 2015 mpi mutindu bo kangaka bafoto. a
Mutindu bo yidikaka Bafoto. Ntangu bampangi yina ke yidikaka bizuzi na service de l’ illustration ya Nzo-Nkanda ya la Société Watchtower manisaka kutanga disolo “L’ argent et vous,” bo salaka bifwanisu sambu na kutendula mambu yina vandaka na disolo. Na nima, bo songaka bifwanisu yina na Komite Sambu na Kusonika ya Nto-Kimvuka, mpi Komite yai ponaka bifwanisu yina bo fwete baka bafoto.
Ndambu ya bafoto ya kutula na lutiti ya zulu yina Komite Sambu na Kusonika tadilaka
Kisika. Na kisika ya kukwenda kukanga bafoto na banki mosi buna, bampangi yina ke kangaka bafoto sadilaka nzo mosi na Nzo-Nkanda ya la Société Watchtower bonso banki mpi bo kangaka bafoto. b
Kukabula mikumba. Bo ponaka Bambangi ya Yehowa mingi sambu na kumonisa bonso nde bo kele bakliya ya banki mosi na mbanza yina kele ti bantu ya me katuka na bansi mingi. Bo ke bumbaka bafoto yina sambu na kusadila ve kaka bisika yina mbala na mbala na mikanda na beto.
Bima yina bo ke sadilaka. service de l’ illustration bakaka mbongo yina bansi ya nkaka ke sadilaka sambu na kumonisa nde banki yina kele na insi ya nkaka kansi na États-Unis ve. Bampangi yina ke kangaka bafoto ke sadilaka bima ya nkaka sambu na kumonisa nde mambu yina ke salama kele ya kieleka. Craig, mpangi mosi ya ke kangaka bafoto, ke tuba nde: “Beto ke tulaka dikebi na mambu yonso.”
Bilele mpi kutula babote. Sambu na kukanga bafoto, bantu ya bo ta sadila ke lwataka bilele na bo mosi. Kansi, sambu na mambu yina me salamaka na ntangu ya ntama to mambu yina ke lomba bilele ya sipesiali, service de l’ illustration lenda sosa bilele to kutunga bilele yina me fwana. Bampangi yina ke tulaka bantu babote ke pakulaka bo bima yina ta wakana ti nsungi mpi kisika yina bo ta monisa na bafoto. Mpangi Craig ke tuba nde: “Bubu yai, bo me tomisaka ba-apareyi ya foto ti ba-ecran, yo yina beto fwete tula dikebi na mambu ya fioti-fioti sambu ata kifu ya fioti lenda bebisa foto.”
Kukanga bafoto. Bampangi yina ke kangaka bafoto salaka na mpila nde nsemo kuvanda na banki sambu yo monisa bonso nde mambu yina salamaka na ntangu. Sambu na konso foto, bampangi yai ke zikisaka nde nsemo yina bo ke sadila me fwana kibeni (nsemo ya ntangu, ya ngonda to yina bo me ganga), yo ke wakana ti nsemo yina bo ke sadila dezia mpi yo me fwana na ntangu yina mambu yango ke salama. Mpangi Craig ke tuba nde: “Yo kele ve bonso bavideo, sambu beto ke sadilaka kaka kizuzi mosi sambu na kumonisa mutindu bantu kele ntangu mambu ke salama, yo yina nsemo kele kibeni mfunu.”
Kuyidika bafoto. Na nima, bampangi yina ke yidikaka bafoto salaka na mpila nde bantu yina ta tanga mukanda kutula dikebi na bantu yina kele na mukanda na kisika ya kutula dikebi na kisika mbongo katukaka. Bakadrema ya bakielo mpi banela vandaka mbwaki, kansi bampangi me tula yo mukubu ya masa ya saka-saka sambu yo wakana ti mukubu ya zulu ya zulunalu.
Katula bafoto yina bo ke kangaka na Patterson, babetele ya nkaka na nsi-ntoto kele ti kimvuka ya bampangi yina ke kangaka bafoto, mpi bantangu ya nkaka bo ke lombaka bo na kutinda bafoto yina beto ke sadilaka na mikanda na beto. Babetele yango kele na bansi yai: Australie, Brésil, Canada, Allemagne, Japon, Korée, Malawi, Mexique, mpi Afrique du Sud. Konso ngonda, service de l’ illustration yina kele na Patterson ke yikaka bafoto kiteso ya 2 500 na bafoto yina bo ke vandaka dezia ti yo. Bo ke sadilaka bafoto yai mingi na Nzozulu ya Nkengi mpi Réveillez-vous ! Bo ke basisaka konso zulunalu na bakopi kuluta 115000000 mpi na bazulunalu yai bo sadilaka bafoto yango. Beto ke lomba nge na kukwisa kutala banzo na beto ya kele na Patterson na New York, to na babetele na beto ya nkaka na nsi-ntoto ya mvimba sambu na kuzaba mambu mingi.
Mpangi mosi ke pesa zulunalu na kisalu ya kulonga nsangu ya mbote
a Bo ke kangaka bafoto mingi kibeni sambu na kutula yo na lutiti ya zulu ya bazulunalu kansi bo ke sadilaka ve bafoto yina yonso. Bo ke yikaka bafoto ya nkaka mingi na kisika yina bo ke bumbaka bafoto ebuna na nima, bo ke sadilaka yo na mikanda ya nkaka
b Kana yo ke lomba nde bo kanga bafoto na bala-bala mosi buna, mbala mingi service de l’ illustration ke lombaka nswa na bamfumu, bo fwete zabisa bo ntalu ya bantu yina bo ke zola kukanga bafoto, bima yina bo ta sadila mpi nsemo yina bo ta sadila sambu na kukanga bafoto yina.
Nge Lenda Sepela Mpi Ti
LUZINGU NA BETELE
Beto Ke Binga Nge na Kukwisa Kutala ya Betele ya États-Unis
Nge lenda tala Babiro ya Ke Twadisaka Kisalu ya Bambangi ya Yehowa na Ntoto ya Mvimba mpi biro ya filiale ya États-Unis.