Na Kitanu 18 aût 2023, Mpangi José Luis Peña ya kele na Komite ya Filiale ya Amérique centrale, basisaka Mbalula ya Nsi-Ntoto ya Mpa ya Masonuku ya Kigreki ya Bukristu na ndinga Kekchi. Bo pesaka luzayisu nde Biblia yina me basika na kilumbu ya ntete ya Lukutakanu ya Distrike yina vandaka ti ntu-diambu “Beno Monisa Ntima ya Nda”! yina bo salaka na San Juan Chamelco na Alta Verapaz na Guatémala. Bantu 590 yina vandaka na lukutakanu yango bakaka konso muntu Biblia na yandi. Bantu lendaka mpi kubaka na Internet Biblia ya kusadila na ba-apareyi mpi ya kuwidikila. Bantu kuluta 1 300 000 ke tubaka ndinga Kekchi na Bélize mpi na Guatémala. Bubu yai, kiteso ya bampangi 520 ya ke longaka nsangu ya mbote (bansamuni) mpi ya ke tubaka ndinga Kekchi ke sadila Yehowa na mabundu 17 mpi na bimvuka 4 na bansi zole.

Bampangi mingi ya babakala mpi ya bankento tubaka mutindu Biblia yai ya mpa ta sadisa bantu yina ke tubaka ndinga Kekchi na kubakisa Ndinga ya Yehowa mbote-mbote. Mpangi-nkento mosi pesaka mbandu mosi: “Na 1 Timoteo 1:11, Mbalula ya Nsi-Ntoto ya Mpa ke tuba nde Yehowa kele ‘Nzambi ya kiese.’ Kansi, Babiblia ya nkaka na Kekchi ke tubaka ve nde Yehowa kele mpidina. Sesepi, mono lenda sadila verse yai sambu na kuyibusa bantu nde kuzaba Yehowa lenda sadisa beto nkutu na bantangu ya mpasi.”

Beto ke ndima nde Biblia yai ya mpa ta sadisa bantu mingi ya masonga ya ke tubaka ndinga Kekchi na kuzaba Yehowa mpi na kumona nde Ndinga na yandi kele ti valere ya mingi.—Bingana 7:1, 2.