Bantu mingi na ntoto ya mvimba ke kwikilaka nde feti ya Noël kele nkinsi ya lubutuku ya Yezu Kristu. Ata mpidina, keti nge me kudiyulaka dezia kana Bakristu ya mvu-nkama ya ntete yina vandaka pene-pene ya Yezu, vandaka kusala to ve Nkinsi ya Lubutuku? Diaka, keti nge ke zabaka mambu yina Biblia ke tubaka sambu na bilumbu ya kubutuka? Kuzwa bamvutu na bangiufula yai lenda sadisa beto na kuzaba kana Nkinsi ya Lubutuku kele sambu na Bakristu.

Ya ntete, Biblia ke tubila ve bankinsi ya kilumbu ya kubutuka ya Yezu to ya konso nsadi ya nkaka ya kwikama ya Nzambi. Biblia ke tubila kaka bantu zole yina salaka nkinsi ya bilumbu na bo ya kubutuka. Ata mosi ve na kati na bo vandaka nsadi ya Yehowa, Nzambi ya Biblia, mpi na bankinsi ya bilumbu na bo ya kubutuka mambu ya mbi salamaka. (Kuyantika 40:20; Marko 6:21) Mukanda mosi (Encyclopædia Britannica) ke tuba nde, Bakristu ya ntete vandaka kutelamina “kikalulu ya mimpani ya kusala nkinsi ya bilumbu ya kubutuka.”

Biblia ke tubila kibeni ve kilumbu yina Yezu butukaka. Mukanda mosi (McClintock and Strong’s Cyclopedia) ke tuba nde: “Kele ve ti kisika mosi na Kuwakana ya Mpa to na mukanda ya nkaka yina ke tubilaka pwelele kilumbu ya kubutuka ya Kristu.” Ya kieleka, kana Yezu zolaka nde balongoki na yandi kusala nkinsi ya kilumbu na yandi ya kubutuka, ziku yandi zolaka kusonga bo kilumbu yina yandi butukaka.

Ya zole, Biblia ke tuba ve nde Yezu to mosi na kati ya balongoki na yandi salaka Nkinsi ya Lubutuku. Mukanda mosi (New Catholic Encyclopedia) ke tuba nde, bo tubilaka na mbala ya ntete Nkinsi ya Lubutuku na “mukanda mosi ya Philocalus, yina yandi sonikaka na mvu 336 [T.B.].” Yo kele pwelele nde, yandi sonikaka yo ntangu bo manisaka dezia kusonika Biblia mpi bamvula mingi na nima ya ntangu yina Yezu vandaka na ntoto. Yo yina McClintock mpi Strong ke tuba nde “Nzambi ve muntu me tulaka Nkinsi ya Lubutuku mpi yo me katukaka ve na Kuwakana ya Mpa.” *

Yezu, Longi ya Nene, pesaka bantuma ya pwelele na mambu yina yandi vandaka kuzola nde balongoki na yandi kusala, mpi bantuma yango kele na Biblia. Kansi, kusala Nkinsi ya Lubutuku kele ve na kati ya bantuma yina. Kaka mutindu longi mosi ke zolaka nde bana ya nzo-nkanda na yandi kusala kaka mambu yina yandi me songa bo, mutindu mosi mpi Yezu ke zolaka nde balongoki na yandi kulanda “kaka mambu yina bo me sonikaka” na Biblia.—1 Bakorinto 4:6.

Katula yina, kele ti kima mosi ya mfunu yina Bakristu ya ntete vandaka kusala mingi, kuyibuka lufwa ya Yezu. Yezu yandi mosi songaka balongoki na yandi ntangu ya kusala nkinsi yina mpi mutindu ya kusala yo. Bantuma yai ya pwelele mpi kilumbu yina yandi fwaka kele na Biblia.—Luka 22:19; 1 Bakorinto 11:25.

Mutindu beto me mona yo, Feti ya Noël kele nkinsi ya kilumbu ya kubutuka, mpi Bakristu ya ntete vandaka ve kulanda nsiku yina ya mimpani. Diaka, Biblia ke tuba ve nde Yezu to muntu mosi ya nkaka salaka Nkinsi ya Lubutuku. Na nsadisa ya bantendula yai, Bakristu mingi na ntoto ya mvimba me bakisaka nde Nkinsi ya Lubutuku kele ve sambu na bo.