Felisa: Mono butukaka na Espagne, mpi dibuta na beto vandaka na mbongo ve. Beto vandaka na Katolika mpi beto vandaka kuzola mambu ya Nzambi mingi. Bampangi na mono 13 vandaka kusala bisalu ya nzo-nzambi, mpi bankaka vandaka mimpe. Ngwasi na mono mosi vandaka mumpe mpi longi na ekole mosi ya Katolika. Na nima ya lufwa na yandi, Pape Jean Paul II kotisaka yandi na ndonga ya basantu. Papa vandaka kusala kisalu ya bibende, mpi mama vandaka kusala bilanga. Mono kele mwana ya ntete na kati ya bana nana.

Ntangu mono vandaka ti bamvula 12, mvita mosi basikaka na Espagne. Na nima, bamfumu ya luyalu tulaka papa na boloko sambu yandi vandaka kuwakana ve ti bo. Mama vandaka kuzwa ve madia ya kufwana sambu na beto yonso. Yo yina, yandi tindaka baleke na mono tatu ya bankento Araceli, Lauri, mpi Ramoni, na kuvan mosi ya bamasere na mbanza Bilbao. Kuna, bo kumaka kudia mbote.

Araceli: Na ntangu yina, mono vandaka ti bamvula 14, Lauri 12, mpi Ramoni 10. Beto kumaka kuyindula mingi dibuta na beto. Kisalu na beto na kuvan vandaka ya kutula bunkete. Bamvula zole na nima, bo tindaka beto na kuvan ya nene na Zaragoza, kisika bo ke sadisaka minunu. Kuna, beto vandaka kutula bunkete na kinkuku; kisalu yango vandaka ngolo mpi kulembisa mingi.

Felisa: Ntangu bampangi na mono ya bankento kwendaka na kuvan ya Zaragoza, mama mpi ngwasi na mono ya mumpe bakaka lukanu ya kutinda mono mpi kuna. Bo zolaka kukabula mono ti mwana-bakala mosi yina vandaka kuzola mono. Kuzaba nde mono ta kuma kuvanda na kuvan na nsungi mosi buna pesaka mono kiese, sambu  mono vandaka kuzola Nzambi mingi. Konso kilumbu mono vandaka kukwenda na nzo-nzambi, nkutu mono vandaka kuzola kukuma misionere ya Katolika bonso ngwasi na mono na Afrika.

Kansi na kuvan, mono bakisaka nde mono lenda sala ve mambu mingi yina mono vandaka kuzola. Bamasere buyaka nde mono kwenda kusadila Nzambi na insi ya nkaka mutindu mono vandaka kuzola. Yo yina, na mvula yina landaka mono vutukaka na nzo mpi mono kumaka kuvanda ti ngwasi na mono ya mumpe. Mono vandaka kusadila yandi bisalu ya nzo, mpi beto vandaka kusamba shapele konso nkokila. Mono vandaka mpi kuyidika bintuntu na nzo-nzambi, kifwanisu ya Maria mpi ya “basantu.”

Araceli: Na kuvan ya Zaragoza, mono salaka lusilu ya ntete ya kukuma masere. Na nima, bamasere kabulaka mono ti bampangi na mono ya bankento. Bo tindaka mono na kuvan ya mbanza Madrid mpi bo tindaka Lauri na kuvan ya mbanza Valence. Ramoni bikalaka na Zaragoza. Na Madrid, mono salaka lusilu ya zole ya kukuma masere. Bantu mingi vandaka kuzinga na kuvan, mu mbandu bana ya nzo-nkanda mpi minunu. Yo yina bisalu vandaka mingi. Mono vandaka kusala na lupitalu ya bamasere.

Lukanu na mono vandaka ya kukuma masere. Mono yindulaka nde beto ta tangaka mpi ta longukaka Biblia mingi. Kansi yo vandaka ve mpidina. Ata muntu mosi ve vandaka kusadila Biblia to kutubila mambu ya Nzambi to ya Yezu. Mono longukaka Latin mpi luzingu ya “basantu” ya Katolika; mono vandaka mpi kusambila Maria. Kansi mbala mingi, beto vandaka kusala bisalu ya ngolo.

Yo yantikaka kuyangisa mono mingi. Mono monaka nde mono fwete sosa mbongo ya kusadisa dibuta na mono, na kisika ya kusala na kuvan mpi kukumisa bantu ya nkaka bamvwama. Mono solulaka ti masere yina vandaka kutwadisa kuvan mpi mono songaka yandi nde mono fwete katuka na kuvan. Kansi yandi kangaka mono na shambre mosi. Yandi yindulaka nde mono ta soba mabanza mpi ta bikala na kuvan.

Na nima, bo basisaka mono. Kansi ntangu bo monaka nde mono vandaka kaka ti lukanu ya kukatuka na kuvan, bo kangaka mono diaka na shambre. Na mbala ya tatu, bo songaka mono na kusonika nde: “Mono ke katuka sambu mono ke zola kusadila Satana kansi Nzambi ve.” Yo pesaka mono mpasi kibeni. Ata mono vandaka kuzola kukatuka, mono lendaka ve kusonika mambu yina. Nsuka-nsuka, mono solulaka ti nganga-nzambi mosi, mpi mono zabisaka yandi mambu yina yonso. Yandi lombaka episikopo nswa ya kuvutula mono na kuvan ya Zaragoza. Na nima ya kusala mwa bangonda kuna, bo pesaka mono nswa ya kukatuka. Ntangu fioti na nima, Lauri ti Ramoni katukaka mpi na kuvan.

Felisa: Na nima, mono kwelaka mpi beto kwendaka kuzinga na Cantabrie, provense mosi ya Espagne. Mono vandaka kaka kukwenda na eglize. Kilumbu mosi, na Lumingu, nganga-nzambi nganaka nde, “Beno tala mukanda yai!” Yandi songaka beto mukanda, La vérité qui conduit à la vie éternelle. Yandi tubaka nde, “Kana muntu kupesa beno mukanda yai, beno natila mono yo to beno losa yo!”

Mono vandaka ve ti mukanda yango. Kansi mono vandaka na mfunu na yo. Bilumbu fioti na nima, bankento zole kwisaka na nzo na mono. Bo vandaka Bambangi ya Yehowa, mpi bo pesaka mono mukanda yango. Mono tangaka yo kaka na mpimpa yina. Ntangu bo kwisaka diaka, bo yulaka mono kana mono ta zola kulonguka Biblia. Mono ndimaka.

Mono vandaka kuzola kupesa Yehowa kiese. Yo yina mono longukaka kuzaba yandi mpi mono kumaka kuzola yandi mingi. Mono vandaka kuzola kuzabisa bantu yonso mambu ya Yehowa. Na 1973, mono bakaka mbotika. Mono vandaka kuzabisa bantu ya dibuta na beto mambu ya Yehowa mbala na mbala. Kansi bo vandaka kusonga mono nde mono ke ndima mambu ya luvunu, mingi-mingi Araceli.

Araceli: Sambu bo vandaka kusadila mono mambu ya mbi na kuvan, mono vandaka diaka ve kuzola dibundu na mono. Kansi na Lumingu, mono vandaka kukwenda na bisambu, mpi konso kilumbu mono vandaka kusamba Shapele. Mono vandaka kaka kusosa kubakisa Biblia, yo yina mono lombaka Nzambi na kusadisa mono. Na nima, Felisa zabisaka mono mambu yina yandi longukaka. Yandi vandaka kusepela ti yo mingi, nkutu mono yindulaka nde yandi me bela kilawu. Mono vandaka kundima yandi ve ata fioti.

Na nima, mono vutukaka kusala na Madrid mpi mono kwelaka. Na nima ya bamvula, mono monaka nde bantu yina vandaka kukwenda na eglize vandaka kuzitisa ve malongi ya Yezu. Yo yina mono buyaka kukwenda na eglize, kukwikila na “basantu” to na bilungi ya tiya, mpi mono vandaka kundima diaka ve nde mumpe lenda lolula masumu. Mono losaka bifwanisu yonso ya eglize. Mono zabaka ve kana kusala mpidina vandaka mbote. Mambu ya eglize pesaka mono mpasi. Kansi mono sambaka Nzambi nde: “Mono ke zola kuzaba nge. Sadisa mono!” Bambangi ya Yehowa vandaka kukwisa na nzo na  mono kansi mono vandaka kuyamba bo ve. Mono kumaka kubuya mabundu yonso.

Mpangi na mono Lauri vandaka na France, mpi Ramoni vandaka na Espagne. Na 1980, bo yantikaka kulonguka Biblia ti Bambangi ya Yehowa. Mono vandaka kuyindula nde bo me vila nzila bonso Felisa mpi bo ke zaba ve nde bo ke ndima malongi ya luvunu. Na nima, mono salaka kinduku ya ngolo ti Angelines, Mbangi ya Yehowa mosi yina vandaka pene-pene ti beto. Mbala mingi Angelines ti bakala na yandi vandaka kulomba mono na kulonguka Biblia ti bo. Bo bakisaka nde mono vandaka kuzola mpenza kuzaba Biblia, ata mono vandaka kubuya mabundu. Nsuka-nsuka mono songaka bo nde: “Mono me ndima. Kansi beto ta longuka kaka kana beno ndima nde mono sadila Biblia na mono mosi!” Biblia na mono vandaka mbalula ya ndinga Nácar-Colunga.

Felisa: Ntangu mono bakaka mbotika na 1973, Bambangi ya Yehowa vandaka kiteso ya 70 na Santander, ntu-mbanza ya provense ya Cantabrie. Beto vandaka kusala banzietelo ya nda sambu na kulonga bantu ya babwala mingi ya Cantabrie. Sambu na kukuma na babwala yina, beto vandaka kubaka ntete bisi mpi na nima, kamio.

Mono longukaka Biblia ti bantu mingi na bamvula yina, mpi bantu 11 bakaka mbotika. Balongoki na mono mingi vandaka bantu ya Katolika. Mono vandaka ntima-nda ti bo. Yo lombaka kubikila bo ntangu ya kubakisa nde malongi na bo vandaka ya luvunu, mutindu bo bikilaka mono mpi ntangu. Mono zabaka nde Biblia ti mpeve santu ya Yehowa mpamba lenda sadisa muntu na kusoba mabanza mpi kuzaba kieleka. (Baebreo 4:12) Bakala na mono, Bienvenido, vandaka ntete polisi; kansi yandi bakaka mbotika na 1979, mpi mama yantikaka kulonguka Biblia na ntwala nde yandi fwa.

Araceli: Ntangu mono yantikaka kulonguka Biblia ti Bambangi ya Yehowa, mono yindulaka nde mono ta ndima bo ve. Kansi na nima, mono sobaka mabanza. Mono monaka nde Bambangi ya Yehowa ke longaka Biblia mpi ke zitisaka malongi na yo. Mono kumaka kukwikila ngolo na Yehowa ti na Biblia, mpi mono kumaka na kiese. Bantu mingi monaka bansoba yina mpi bo songaka mono nde, “Araceli, kuyambula ve nzila yai ya nge me pona!”

Yo pusaka mono na kusamba nde, “Mersi Yehowa mutindu nge yambulaka mono ve mpi mutindu nge me sadisa mono na kulungisa lukanu na mono ya kuzaba kieleka ya Biblia.” Mono songaka mpi Felisa na kulolula mono mutindu mono tubilaka yandi mbi. Banda kilumbu yina, beto ke vandaka na kiese ya kulonguka Biblia, olie ya kutulana bantembe. Na 1989, mono bakaka mbotika, ti bamvula 61.

Felisa: Bubu yai, mono kele ti bamvula 91, mpi bakala na mono me fwaka. Mono ta kuka diaka ve kusala mambu mingi. Kansi mono ke tangaka kaka Biblia konso kilumbu, mpi kana kikesa kele, mono ke kwendaka na balukutakanu mpi na kisalu ya kusamuna.

Araceli: Mono ke zolaka kulonga mimpe ti bamasere ndinga ya Yehowa, ziku sambu mono vandaka masere. Mono me solulaka mingi ti bo, nkutu bankaka me ndimaka mikanda na beto. Mono ke yibukaka mingi mumpe mosi. Yandi ndimaka mambu yina beto solulaka ti yandi. Na nima yandi tubaka nde: “Keti mono lenda soba diaka dibundu na bamvula na mono? Bantu ya dibundu na mono mpi ya dibuta ta tuba nki?” Mono vutulaka nde: “Ebuna Nzambi ta tuba nki?” Yandi bakisaka nde ngiufula yai vandaka ya mbote mpi yandi kumaka mawa-mawa. Kansi yandi vandaka ve ti kikesa ya kubaka lukanu.

Mono ta vilaka ve kilumbu bakala na mono tubaka nde yandi ke zola kukwenda ti mono na lukutakanu. Yandi vandaka ti bamvula kuluta 80 ntangu yandi kwendaka na lukutakanu mbala ya ntete. Na nima yandi vandaka ve kukonda balukutakanu. Yandi longukaka Biblia mpi yantikaka kusamuna. Mono ke yibukaka na kiese yonso bilumbu yina beto vandaka kusamuna. Yandi fwaka bangonda zole na ntwala ya kubaka mbotika.

Felisa: Ntangu mono yantikaka kusadila Yehowa, bampangi na mono tatu ya bankento vandaka kuzola ve. Kansi na nima, bo ndimaka kieleka. Yo ke pesaka mono kiese mingi kibeni. Ntangu beto ke kutanaka, beto ke tubilaka mambu ya Yehowa, Nzambi ya beto ke zolaka mingi, mpi Ndinga na yandi! Bubu yai, beto ke sambilaka Yehowa beto yonso. *