DON, Mbangi ya Yehowa mosi na Canada, salaka bikesa sambu na kusolula ti bantu yina ke zingaka na bala-bala. Yandi ke tuba mambu yai sambu na muntu mosi na kati na bo: “Piere ke zingaka na bala-bala, yandi kele mvindu kuluta bantu yonso ya mono me monaka na bala-bala. Yandi vandaka kubasika nsudi mpi vandaka kuzola ve nde bantu kupusana pene-pene ti yandi. Yandi vandaka kubuya mbala mingi mambu ya mbote yina bantu vandaka kusadila yandi.” Don landaka kumonisila Piere ntima-mbote bamvula kuluta 14.

Kilumbu mosi, Piere yulaka Don nde: “Sambu na nki nge ke kudiyangisaka mingi sambu na mono? Bantu ke kangamaka ve ti mono. Sambu na nki nge ke kudipesaka mpasi?” Don sadilaka mbote baverse tatu sambu na kusimba ntima ya Piere. Ntete, Don yulaka Piere kana yandi ke zabaka zina ya Nzambi mpi lombaka Piere na kutanga zina yango na Nkunga 83:18. Sambu na kumonisa Piere kikuma yina Don vandaka kudiyangisa mingi, Don lombaka yandi na kutanga Baroma 10:13, 14, yo ke tuba nde: “Konso muntu yina ke binga zina ya Yehowa ta guluka.” Nsuka-nsuka, Don tangaka Matayo 9:36 mpi na nima, yandi lombaka Piere na kutanga yo yandi mosi. Verse yai ke tuba nde: “Ntangu [Yezu] monaka bimvuka ya bantu, yandi wilaka bo mawa sambu bo vandaka kuniokwama mpi kuyungana bonso mameme yina me konda ngungudi.” Ntangu Piere waka mambu yai, yandi dilaka mpi yulaka Don nde: “Keti mono mpi kele mosi ya mameme yina?”

Na nima Piere yantikaka kusoba, yandi yobilaka masa, zengaka mandefo mpi lwataka bilele ya mbote yina Don pesaka yandi. Piere landaka kuyidika nitu na yandi.

Piere vandaka ti mukanda yina yandi vandaka kusonika mambu. Balutiti ya ntete ya mukanda yango vandaka mvindu, kansi balutiti ya nsuka yina Piere sonikaka mambu vandaka bunkete. Yandi sonikaka na lutiti mosi nde: “Bubu yai, mono me zaba zina ya Nzambi. Ntangu yai kana mono ke samba, mono ta samba Yehowa. Kuzaba zina ya Yehowa kele mbote kibeni. Don me tuba nde Yehowa lenda kuma nduku na  mono ya ngolo, mpi yandi lenda wa mambu ya mono ke zabisa yandi na konso ntangu yina.”

Na ntwala ya kufwa, Piere sonikilaka bampangi na yandi nde:

“Bubu yai mono ke wa nitu na mono mbote ve, mono me kuma mbuta. Yo yina ata mono me fwa bubu yai, mono ke zaba nde mono ta kutana diaka ti nduku na mono [Don] na Paladisu. Ntangu beno ke tanga mambu yai, beno zaba nde mono kele diaka ve na luzingu. Kansi kana beno me mona muntu mosi, yina beno me zaba ve na mafwa na mono, beno solula ti yandi mpi beno tanga kamukanda yai ya ble [kamukanda “Kieleka Yina Ke Nataka na Luzingu ya Mvula na Mvula”, yina bo pesaka yandi na bamvula yina lutaka]. * Mukanda yango ke tuba nde mono ta kutana diaka ti nduku na mono na Paladisu. Mono ke kwikila mambu yai na ntima ya mvimba. Mono mpangi na beno Piere.”

Na nima ya kuzika mvumbi, Ummi mpangi ya Piere ya nkento tubaka nde: “Bamvula kiteso ya zole me luta, Piere solulaka ti mono. Yo vandaka mbala ya ntete yina mono monaka Piere na kiese, nkutu yandi vandaka kuseka.” Ummi songaka Don nde: “Mono ta tanga mukanda yina nge pesaka Piere, sambu yo me simba ntima ya mpangi na mono, yo fwete vanda ti mambu ya mfunu mingi na kati.” Ummi ndimaka kulonguka mukanda Inki Biblia Ke Longaka Mpenza? ti Mbangi mosi ya Yehowa.

Mbandu ya Don ke longa beto na kumonisila bantu ya mitindu yonso zola ya kieleka mpi ntima-nda mpi kutula dikebi na mambu na bo ya nkaka yina ke monana ve. (1 Tim. 2:3, 4) Mpidina, beto lenda sadisa bantu yina ke monanaka kukonda mfunu bonso Piere, kansi yina kele na mfunu ya kuzaba kieleka. Beto ke ndima nde Yehowa yina “ke monaka na ntima,” ta sadisa bantu ya ntima-mbote na kuzaba kieleka.—1 Sam. 16:7; Yoa. 6:44.