“Sambu na Nki Nzambi Salaka Ve Ata Kima?”
“MONO KE KUDIYULAKA NTANGU YONSO NDE: SAMBU NA NKI NZAMBI SALAKA VE ATA KIMA?”—Pape Benoît XVI, tubaka mambu yai ntangu yandi kwendaka kutala kisika yina bo ke pesaka bantu bisalu ya ngolo na Auschwitz, na insi Pologne.
KANA BISUMBULA ME SALAMA, KETI NGE ME KUDIYULAKA DEZIA NDE, ‘SAMBU NA NKI NZAMBI SALAKA VE ATA KIMA?’ TO NA LUZINGU NA NGE, KETI KELE TI DIAMBU MOSI YA MPASI YINA SALAKA NDE NGE KUDIYULA KANA NZAMBI KE KUDIYANGISAKA SAMBU NA NGE?
Ziku nge kudiwaka mutindu Sheila, yina ke zingaka na États-Unis, kudiwaka. Yandi ke tuba nde: “Sambu mono butukaka na dibuta yina vandaka kusambila mingi, banda kileke mono vandaka kusepela ti Nzambi sambu yandi kele Ngangi na beto. Kansi, mono vandaka ve kudiwa pene-pene na yandi ata fioti. Mono vandaka kuyindula nde yandi ke talaka mono, kansi kaka na kintama. Mono vandaka kuyindula ve nde Nzambi ke mengaka mono mpi mono vandaka ve kukwikila nde yandi ke zolaka mono.” Sambu na nki Sheila vandaka ve kundima nde Nzambi ke zolaka yandi? Yandi ke tuba nde: “Dibuta na beto kutanaka ti bampasi mingi mpi yo monanaka nde Nzambi vandaka kusadisa beto ve ata fioti na bampasi yina yonso.”
Bonso Sheila, ziku nge ke ndimaka nde Nzambi Nkwa-Ngolo Yonso kele. Kansi, nge lenda kudiyula kana yandi ke kudiyangisaka kibeni sambu na nge. Yobi muntu ya lunungu, yina vandaka kukwikila na ngolo mpi na mayele ya Ngangi vandaka mpi ti badute. (Yobi 2:3; 9:4) Ntangu yandi kutanaka ti bampasi mingi, mpi sambu bampasi yango vandaka ve kumana, yandi yulaka Nzambi nde: “Sambu na nki nge ke bumba luse na nge mpi ke baka mono bonso mbeni na nge?”—Yobi 13:24.
Inki mambu Biblia ke tubaka? Keti Nzambi muntu ke vandaka na kisina ya bisumbula? Keti kele ti mambu ya ke ndimisa nde Nzambi ke kudiyangisaka sambu na bantu yonso mpi sambu na konso muntu na kati na beto? Sambu na nge, keti kele ti muntu na kati na beto yina lenda zaba kibeni kana Nzambi ke tudilaka beto dikebi, ke bakisaka beto, ke kuditulaka na kisika na beto to kana yandi ke sadisaka beto na bampasi na beto?
Masolo yina ke landa ta tubila mambu yina lugangu ke longa beto na yina me tala mutindu Nzambi ke kudiyangisaka sambu na beto. (Baroma 1:20) Na nima, beto ta tadila mambu yina Biblia ke tuba na yina me tala mutindu Nzambi ke kudiyangisaka sambu na beto. Kana nge “me zaba yandi” mbote-mbote na nzila ya lugangu mpi ya Ndinga na yandi, nge ta ndima kibeni nde “yandi ke kudibanzaka sambu na” nge.—1 Yoane 2:3; 1 Piere 5:7.
Nge Lenda Sepela Mpi Ti
NZOZULU YA NKENGI
Keti Nzambi Ke Tudilaka Nge Dikebi?
Inki mambu ke ndimisa nde Nzambi ke sosaka kibeni mambote na nge?
