Moize tubaka nde kana beto ke lemfukila bansiku ya Nzambi, Nzambi ta sakumuna beto. (Kulonga 10:13; 11:27) Beto ke lemfukilaka ve Nzambi sambu beto ke waka boma nde yandi ta pesa beto ndola. Kansi, bikalulu ya kitoko ya Nzambi ke pusaka beto na kulemfukila yandi sambu beto ke zolaka yandi mpi beto ke zolaka ve kusala mambu yina ta pesa yandi mpasi. Masonuku ya Santu ke tuba nde: “Zola ya Nzambi ke tendula nde beto zitisa bansiku na yandi.”—1 Yoane 5:3.

Inki mutindu bulemfu na beto na Nzambi ke natilaka beto lusakumunu na yandi? Beto tadila mitindu zole.

“Mono, Yehowa, mono kele Nzambi na nge, Muntu yina ke longa nge sambu na mambote na nge mosi, Muntu yina ke twadisa nge na nzila yina nge fwete tambula.”—YEZAYA 48:17.

Yehowa Nzambi, Ngangi na beto ke zabaka beto mpi yandi ke twadisaka beto na mutindu ya mbote. Kana beto ke zola nde malongi na yandi kusadisa beto na kubaka balukanu ya mbote, beto fwete tanga Masonuku ya Santu sambu na kuzaba mambu yina Nzambi ke zola nde beto sala mpi kusadila yo.

“Kiese na bantu yina ke waka ndinga ya Nzambi mpi ke landaka yo!”—LUKA 11:28.

Bubu yai, bantu mingi yina ke lemfukilaka Ndinga ya Nzambi ke vandaka kibeni na kiese. Muntu mosi yina ke zingaka na Espagne vandaka ti kikalulu ya kuwa makasi nswalu mpi kusadila bantu ya nkaka mpi nkento na yandi mambu ya mbi. Kilumbu mosi, yandi tangaka na mukanda ya Moize disolo ya mwana ya Yakobi, Yozefi yina vandaka muntu ya pima. Bo tekaka Yozefi na kimpika mpi bo tulaka yandi na boloko sambu na mambu yina yandi salaka ve, kansi yandi bikalaka pima, na ngemba mpi yandi lolulaka. (Kuyantika kapu 37-45) Muntu yango ke tuba nde: “Mbandu ya Yozefi sadisaka mono na kuyedisa kikalulu ya pima, ntima-mbote mpi kutanina bangindu na mono. Yo yina, bubu yai, mono me kumaka ti luzingu ya kiese.”

Masonuku ya Santu ke songaka beto mambu mingi na mutindu ya kusadila bantu ya nkaka mambu. Disolo ya ke landa ta tubila yo mbote-mbote.