NTANGU Anita * bakaka mbotika, bakala na yandi yantikaka kubangika yandi. Anita ke tuba nde: “Yandi buyisaka mono na kukwenda na balukutakanu mpi na kutanga zina ya Nzambi. Kana mono me tanga zina ya Yehowa, bakala na mono vandaka kuwa makasi mingi.”

Mpasi ya nkaka ya Anita kutanaka ti yo kele kulonga bana na yandi mambu ya me tala Yehowa. Yandi ke tuba nde: “Bakala na mono buyisaka lusambu ya Yehowa na nzo na mono mosi. Mono vandaka ve ti mpila ya kulonguka Biblia ti bana na mono na mpenza to kunata bo na balukutakanu.”

Mutindu mbandu ya Anita ke monisa yo, mbangika yina ke katukaka na bantu ya dibuta lenda vanda mumekamu ya ngolo sambu na Mukristu. Mambu ya nkaka yina lenda meka kwikama ya Mukristu kele maladi ya ngolo, lufwa ya mwana to ya nkwelani, mpi kana bo me basisa muntu ya dibuta na dibundu. Kansi, inki lenda sadisa Mukristu na kubikala ya kwikama na Yehowa?

Kana nge me kutana ti mambu ya mutindu yai, inki nge fwete sala? Ntumwa Polo tubaka nde: “Beno kele ti mfunu ya kukanga ntima.” (Baeb. 10:36) Kansi, inki lenda sadisa nge na kukanga ntima?

Kusamba Nzambi kele diambu mosi na kati ya mambu ya ntete ya ke sadisaka beto na kubaka kikesa sambu na kukanga ntima na bampasi yina beto ke kutanaka ti yo. Beto tadila mbandu mosi. Diambu mosi ya mpasi kuminaka dibuta ya Ana na kintete na nkokila. Bakala na yandi fwaka na kintulumukina na nima ya bamvula 30 ya makwela na bo. Ana ke tuba nde: “Yandi kwendaka na kisalu, kansi yandi vutukaka diaka ve na nzo, mpi yandi vandaka kaka ti bamvula 52.”

Inki mutindu Ana nungaka diambu yai ya mpasi? Yandi yambulaka kisalu na yandi yina vandaka kusadisa yandi sambu yo vandaka kulomba yandi ntangu mingi; kansi, yo vandaka ve kusadisa yandi na kumanisa mpasi na yandi. Yandi ke tuba nde: “Mono zabisaka Yehowa mambu yonso yina vandaka na ntima na mono, mpi mono lombaka yandi na kusadisa mono na kununga mpasi yina ya lufwa.” Keti Yehowa pesaka mvutu na bisambu na yandi? Ee. Ana ke tuba nde: “Ngemba yina Nzambi mpamba lenda pesa lembikaka mpasi na mono mpi sadisaka mono. Mono kele ti kivuvu nde Yehowa ta futumuna bakala na mono.”—Bafil. 4:6, 7.

Yehowa, yina “ke ndimaka bisambu,” me silaka na kupesa bansadi na yandi mambu yonso yina bo kele na yo mfunu sambu bo bikala ya kwikama. (Nk. 65:3) Keti lusilu yai ke pesa nge ve kikesa? Keti yo ke sadisa nge ve na kukanga mpi ntima?

Yehowa ke sadisaka bansadi na yandi na nzila ya dibundu ya Bukristu. Mu mbandu, ntangu Bakristu ya dibundu ya Tesalonika kutanaka ti mbangika ya ngolo, Polo siamisaka bo na ‘kulanda na kupesana kikesa mpi kutungana, kaka mutindu bo vandaka kusala yo.’ (1 Bate. 2:14; 5:11) Bakristu ya Tesalonika nungaka mbangika yina mekaka lukwikilu na bo sambu bo vandaka kuzolana mpi kusadisana. Kukanga-ntima na bo kele mbandu mosi ya mbote kibeni sambu na beto bubu yai, mpi yo ke monisa mambu yina lenda sadisa beto na kukanga ntima.

Kusala kinduku ya ngolo ti bampangi ya dibundu ta sadisa beto na kutuba “mambu yina ke sadisaka na kupesana kikesa.” (Bar. 14:19) Yo kele mfunu, mingi-mingi na bantangu yai ya mpasi. Polo yandi mosi kutanaka ti bampasi mingi, mpi Yehowa pesaka yandi kikesa ya kukanga ntima. Bantangu ya nkaka, Nzambi pesaka Polo kikesa na nzila ya bampangi-Bakristu. Mu mbandu, ntangu Polo tindilaka Bakristu ya Kolosai mbote, yandi tubaka nde: “Bo me kumaka nto ya ndembikilu ya nene sambu na mono.” (Bakol. 4:10, 11) Ya kieleka, sambu bo vandaka kuzola Polo mingi, bo pesaka yandi kikesa mpi bo sadisaka yandi ntangu yandi vandaka na mfunu ya lusadisu. Yo lenda vanda nde, bampangi ya dibundu me pesaka nge kikesa mpi me sadisaka nge bonso Polo.

Nzambi ke sadilaka mpi bankuluntu sambu na kupesa bampangi ya dibundu kikesa. Bampangi yai ya kuyela na kimpeve kele ‘bonso bisika ya kutinina mupepe ya ngolo ti mvula; bonso banzadi na ntoto ya kuyuma, mpi bonso madidi ya ditadi ya nene na ntoto ya zelo na zelo.’ (Yez. 32:2) Kuzaba diambu yai ke lembika ntima na beto kibeni! Keti nge me bakaka dezia mambote ya ngidika yai ya zola? Kikesa mpi lusadisu yina bankuluntu ke pesaka lenda sadisa nge na kukanga ntima.

Ya kieleka, bankuluntu ke salaka ve bimangu. Bo kele bantu ya kukonda kukuka, mpi bo “kele bantu bonso [beto].” (Bis. 14:15) Kansi, bisambu na bo lenda natila beto mambote. (Yak. 5:14, 15) Mpangi-bakala mosi na Italie, yina belaka maladi ya misuni (dystrophie musculaire) tubaka nde: “Zola yina bampangi vandaka kumonisila mono mpi mutindu bo vandaka kukwisa kutala mono mbala na mbala sadisaka mono na kukanga ntima.” Keti nge lenda baka mambote na ngidika ya zola ya Yehowa ya kutula bankuluntu na dibundu?

Kele diaka ti mambu ya nkaka yina beto lenda sala sambu na kukanga ntima. Kudipesa na mambu ya kimpeve kele na kati ya mambu yina. Beto tadila mbandu ya John, yina kele ti bamvula 39. Munganga zabisaka yandi nde yandi kele ti kansere mosi ya ngolo. Yandi ke tuba nde: “Mono kudiyangisaka mingi sambu mono vandaka ntete toko.” Na ntangu yina, mwana ya John ya bakala vandaka ti bamvula tatu mpamba. John ke tuba nde: “Yo lombaka nde nkento na mono kusansa mwana na beto, kusadisa mono, mpi kunata mono na munganga mbala na mbala.” Lusansu yina John vandaka kubaka vandaka kulembisa yandi mingi mpi kupesa yandi nzala ya kuluka. Diaka, papa ya John belaka maladi mosi ya ke manaka ve mpi yandi vandaka na mfunu ya lusadisu ya bantu ya dibuta na yandi.

Inki mutindu John mpi dibuta na yandi nungaka mambu yai ya mpasi? John ke tuba nde: “Ata mono vandaka kulemba mingi, mono vandaka kusala yonso sambu na kudipesa mingi na mambu ya kimpeve. Beto vandaka kukwenda na balukutakanu yonso, beto vandaka kusamuna konso mposo, mpi beto vandaka kusala lusambu ya dibuta mbala na mbala, ata kusala mpidina vandaka mpasi.” Ya kieleka, John bakisaka nde kuvanda na kimpeve ya mbote kele diambu ya mfunu yina ke sadisaka na kununga konso mpasi yina muntu lenda kutana ti yo. Yandi ke pesa mpi ndongisila yina lenda sadisa bampangi na kununga bampasi yina bo ke kutana ti yo. Yandi ke tuba nde: “Kana muntu me kutana ti diambu mosi ya mpasi, Yehowa ta pesa yandi kikesa, mpi ta monisila yandi zola. Yehowa lenda pesa nge kikesa kaka mutindu yandi pesaka mono.”

Ntembe kele ve nde, Nzambi ta sadisa beto na kukanga ntima na bampasi yina beto ke kutana ti yo bubu yai mpi yina beto ta kutana ti yo na bilumbu ke kwisa. Bika beto samba Yehowa na kusadisa beto, beto sala kinduku ya mbote ti bampangi ya dibundu, kubaka lusadisu ya bankuluntu, mpi kulanda na kudipesa na mambu ya kimpeve. Kusala mpidina ta sadisa beto na kuzinga na kuwakana ti bangogo yai ya Polo: “Beno kele ti mfunu ya kukanga ntima.”