2 Baka Nzayilu ya Sikisiki ya Nzambi

“Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.”​—Yoane 17:3.

SAMBU NA NKI YO LENDA VANDA MPASI? Bantu yankaka ketubaka nde Nzambi kele ve muntu ya kyeleka. Bankaka kekwikilaka nde Nzambi kele ngolo mosi ya nene mpenza mpi ya kukonda mawi. Bantu yina kekwikilaka nde Nzambi kele muntu ya kyeleka kelongaka malongi ya keswaswanaka mpenza na yina metala Nzambi mpi bikalulu na yandi.

INKI MUTINDU NGE LENDA NUNGA DYAMBU YINA YA MPASI? Mutindu mosi ya kubaka nzayilu ya Nzambi kele ya kutala bima yina yandi mesalaka. Ntumwa Polo kutubaka nde: “Katuka ntangu Nzambi salaka bima yonso, bantu lenda mona nde ngolo ya Nzambi ke manaka ve, mpi nde yandi kele Nzambi mpenza. Bo ke na mpila ve ya kumona [bikalulu na yandi yina kemonikaka ve, NW], kansi bo lenda zaba yo na bima yina ya yandi salaka.” (Roma 1:20) Kana nge tala lugangu ti dikebi yonso, nge lenda longuka mambu mingi ya  metala mayele mpi ngolo ya Ngangi na beto.​—Nkunga 104:24; Yezaya 40:26.

Kansi, sambu na kubaka nzayilu ya sikisiki ya kimuntu ya Nzambi, konso muntu fwete kangula Ndinga ya Nzambi, Biblia, mpi kutadila yo yandi mosi. Kubika ve nde bantu yankaka kuyala bangindu na nge. Kansi, landa ndongisila yai ya Biblia: “Beno landa bikalulu ya bantu ya ntangu yai ve, kansi beno pesa Nzambi nzila na kubalula mabanza na beno sambu beno kukuma mutindu ya nkaka mpenza. Ebuna beno ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve.” (Roma 12:2) Mu mbandu, tadila mambu yai ya melanda ya Biblia ketuba sambu na Nzambi.

Nzambi kele ti zina. Na luyantiku, zina ya Nzambi vandaka kumonana bambala mingi na Biblia. Bambalula mingi kekotisaka zina yango na Nkunga 83:19, yina ketuba nde: “Sambu bo zaba nde zina na nge, nde nge mosi kaka, Yehowa, nge kele Muntu ya Kuluta Kuzanguka na ntoto ya mvimba!”​—La Sainte Bible.

Yehowa Nzambi kele ti mawi mpi mambu ya bantu kesalaka kevandaka ti bupusi na mawi na yandi. Na nima ya kukatula bantu ya Izraele na kimpika na Ezipte, bantangu yankaka bo vandaka kulanda ve bandongisila ya mayele ya Yehowa. Kukolama na bo “vandaka kumonisa yandi mawa.” Mambu ya bo vandaka kusala “vandaka kupesa yandi” mpasi.​—Nkunga 78:40, 41.

Yehowa kekudibanzaka sambu na konso muntu na kati na beto. Yezu kusongaka balongoki na yandi nde: “Keti bo ke tekaka bandeke zole ya fioti ve na kibende mosi ya fioti-fioti? Kansi ata ndeke mosi lenda bwa ve na ntoto kana Tata na beno me ndima ntete ve. Ata nsuki na beno ya ntu, Nzambi me tangaka yo yonso. Yo yina, beno kuwa boma ve; ata bandeke kele mingi, kansi beno me luta bo na mfunu!”​—Matayo 10:29-31.

Nzambi kezolaka ve mingi bantu ya mpusu to ya kinkulu mosi kuluta bankaka. Ntumwa Polo kutubilaka Bagreki ya Atene nde, “na muntu mosi [Nzambi] me basisaka makanda yonso ya bantu, sambu bo kuzinga awa na nsi-ntoto.” Yandi tubaka dyaka nde Nzambi “kele ntama ve na konso muntu awa na kati na beto.” (Bisalu 17:26, 27) Ntumwa Piere kutubaka nde: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

INKI MAMBOTE NGE TABAKA? Bantu yankaka “ke kudipesaka mingi na Nzambi, kansi yo kele ve [na kuwakana ti nzayilu ya sikisiki, NW].” (Roma 10:2) Kana nge mezaba mambu yina Biblia kelongaka mpenza na yina metala Nzambi, nge tabuya nde bo kusa nge mpi nge takuka na ‘kukwenda penepene na Nzambi.’​—Yakobo 4:8.

Sambu na kuzaba mambu mingi, tala kapu ya 1, “Inki Kele Kyeleka na Yina Metala Nzambi?,” na mukanda Inki Biblia Kelongaka Mpenza? a

[Noti na nsi ya lutiti]

[Kifwanisu ya kele na lutiti 6]

Mutindu mosi ya kubaka nzayilu ya Nzambi kele ya kutala bima yina yandi mesalaka