Beto fwete sala nki sambu na kusepedisa Nzambi? Keti kele ti mukanda mosi yina kele na bansiku mingi yina beto fwete zitisa? Diambu ya ke sepedisa kele nde, yo kele ve. Na kutadila mambu yina Yezu Kristu, Mwana ya Nzambi tubaka, mambu yina Nzambi ke lombaka na beto lenda tendula ngogo kaka mosi.​—Tanga Marko 12:28-31.

Beto tadila ntete kisika yina Yezu tubaka bangogo yai. Yandi vandaka kulonga na tempelo na Nisani 11, bilumbu fioti na ntwala ya lufwa na yandi. Bambeni na yandi yulaka yandi mwa bangiufula ya mpasi sambu bo vandaka kumeka yandi. Kansi, mbala yonso yandi vandaka kukangisa bo munoko na bamvutu na yandi. Na nima, bo yulaka Yezu ngiufula yai: “Inki nsiku kele ya ntete na kati ya bansiku yonso?”​—Verse 28.

Yo vandaka ngiufula mosi ya mpasi. Bayuda mingi vandaka kutulana ntembe sambu na kuzaba nsiku yina vandaka ya kuluta mfunu na kati ya bansiku kuluta 600 yina vandaka na Nsiku ya Moize. Yo ke monana nde, bantu ya nkaka vandaka kuyindula nde bansiku yonso vandaka kiteso mosi mpi nde yo vandaka mbi na kubaka bansiku ya nkaka na mbalu mingi kuluta ya nkaka. Inki mvutu Yezu zolaka kupesa na ngiufula yina?

Sambu na kupesa mvutu, Yezu tubilaka nsiku mosi ve kansi bansiku zole. Ya ntete, yandi tubaka nde: “Nge fwete zola Yehowa Nzambi na nge na ntima na nge yonso, na moyo na nge yonso, na mabanza na nge yonso, mpi na ngolo na nge yonso.” (Verse 30; Kulonga 6:5) Bangogo “ntima,” “mabanza,” “moyo” mpi “ngolo” lenda tendula kaka diambu mosi. a Yo ke tendula nde: Zola sambu na Yehowa fwete tadila kimuntu ya mvimba ya muntu, makuki na yandi yonso mpi mambu na yandi yonso. Mukanda mosi ke tendula yo mutindu yai: “Beto fwete zola Nzambi na ntima ya mvimba mpi yo fwete vanda ya mvimba.” Yo yina, kana nge ke zolaka Nzambi nge ta sala bikesa sambu na kuzinga konso kilumbu na mutindu yina yandi ke ndimaka.​—1 Yoane 5:3.

Ya zole, Yezu tubaka nde: “Nge fwete zola nkweno na nge bonso nge mosi.” (Verse 31; Levi 19:18) Zola ya Nzambi mpi zola ya nkweno kele na kuwakana ya ngolo. Nsiku ya zole me simbama na nsiku ya ntete. (1 Yoane 4:20, 21) Kana beto ke zola nkweno na beto bonso beto mosi, beto ta sadila bankaka mambu na mutindu yina beto ke zolaka nde bo sadila beto. (Matayo 7:12) Mpidina, beto ta monisa nde beto ke zolaka Nzambi yina gangaka beto​—mpi bo—​na kifwani na yandi.​—Kuyantika 1:26.

Inki kele mfunu ya bansiku yina ke lomba beto na kuzola Nzambi mpi nkweno? Yezu tubaka nde: “Kele ve ti nsiku ya nkaka yina kele nene kuluta bansiku yai.” (Verse 31) Na disolo ya nkaka yina me fwanana ti disolo yai, Yezu tubaka nde bansiku yonso ya nkaka me simbama na bansiku yina zole.​—Matayo 22:40.

Kusepedisa Nzambi kele mpasi ve. Beto lenda tendula mambu yonso yina Yehowa ke lombaka beto na ngogo kaka mosi: Zola. Ntangu yonso Nzambi ke lombaka bansadi na yandi na kuzola yandi mpi yandi ta landaka kulomba bo na kumonisa zola yina. Kansi zola ke sukaka kaka ve na bangogo to na mawi; yo ke monanaka na bisalu. (1 Yoane 3:18) Sambu na nki ve kulonguka mutindu nge lenda kuna mpi kumonisa zola na nge sambu na Yehowa, Nzambi yina “kele zola”?​—1 Yoane 4:8.