SAMBU na kubaka mvutu na ngiufula yai, bika beto tadila bambandu zole ya bandola ya Nzambi yina Biblia ke tubila​—Mvula ya Ngolo ya bilumbu ya Noa mpi lufwa ya bantu ya Kanana.

MAMBU YINA BANTU YA NKAKA KE TUBAKA: “Nzambi salaka mambu ya nku ntangu yandi nokisaka mvula ya ngolo yina fwaka bantu yonso katula kaka Noa mpi dibuta na yandi.”

MAMBU YINA BIBLIA KE LONGAKA: Nzambi tubaka nde: ‘Keti mono lenda mona kiese na lufwa ya muntu ya mbi? Ve, mono ke zolaka nde yandi yambula kusala mbi, mpidina yandi lenda landa kuzinga.’ (Ezekiele 33:11) Yo yina, lufwa ya bantu ya mbi ya bilumbu ya Noa sepedisaka Nzambi ve ata fioti. Ebuna sambu na nki yandi salaka yo?

Biblia ke pesa mvutu nde ntangu Nzambi vandaka kupesa bandola na bantu yina ya mbi na ntangu ya ntama, yandi vandaka ‘kupesa bantu yina ke vwezaka Nzambi mbandu ya mambu yina ta kwisa.’ (2 Piere 2:5, 6) Inki mbandu Nzambi pesaka?

Ya ntete, Nzambi monisaka nde ata kufwa bantu ke pesaka yandi mpasi, yandi ke tudilaka bantu ya nku yina ke niokulaka bantu ya nkaka dikebi mpi yandi ke pesaka bo ndola sambu na mbi na bo. Kubika fioti, yandi ta sukisa mambu yonso ya kukonda lunungu mpi ya mpasi.

Ya zole, mbandu ya mambu yina Nzambi salaka na ntangu ya ntama ke monisa nde, na zola yonso Nzambi ke kebisaka bantu na ntwala ya kupesa bo ndola. Noa vandaka nsamuni ya lunungu, kansi bantu mingi buyaka kuwila yandi. Biblia ke tuba nde: “Bo tulaka ve dikebi tii kuna Mvula ya Ngolo kwisaka mpi fwaka bo yonso.”​—Matayo 24:39.

Keti Nzambi landaka kusadila mbandu yina? Ee. Mu mbandu, yandi kebisaka bantu ya Izraele nde, kana bo landa kusala mambu ya mbi bonso bantu ya makanda yina kele na nziunga na bo, yandi ta bika nde bambeni kubotula insi na bo, kufwa Yeruzalemi nto-mbanza na bo, mpi kunata bo na kimpika. Bantu ya Izraele yambulaka ve mambu ya mbi, nkutu bo vandaka kutambika bana na bo kimenga. Keti Yehowa pesaka bo ndola? Ee, kansi yandi salaka yo kaka na nima ya kutindila bo baprofete mbala na mbala sambu na kupusa bo na kusoba nkadilu na bo ya mbi. Nkutu, yandi tubaka nde: ‘Yehowa, Nkwa Kimfumu ke salaka kima mosi ve kana yandi me songa ntete ve ngindu na yandi na bantu na yandi baprofete.’​—Amosi 3:7.

KIKUMA YINA YO KE TADILA NGE: Mbandu yina beto ke mona na mutindu Yehowa pesaka ndola na  bantu ya ntangu ya ntama, ke pesa beto kivuvu. Beto lenda vingila na ntima ya mvimba kilumbu yina Nzambi ta pesa ndola na bantu yina ke basisilaka bankaka bampasi na nku yonso. Biblia ke tuba nde: ‘Bantu ya mbi ta fwa. Kansi bantu ya kudikulumusa ta zinga na ngemba na ntoto.’ (Nkunga 37:9-11) Inki nge ke yindula sambu na ndola yina ta katula bantu na bampasi? Keti yo kele ya nku to ya mbote?

MAMBU YINA BANTU YA NKAKA KE TUBAKA: “Lufwa ya bantu ya Kanana vandaka mvita mosi ya nku yina lenda fwanana bubu yai ti bamvita yina ke fwaka bantu mingi na mbala mosi.”

MAMBU YINA BIBLIA KE LONGAKA: “Banzila [ya Nzambi] yonso kele lunungu. [Yandi kele] Nzambi ya kwikama yina me konda ve lunungu ata fioti.” (Kulonga 32:4, NW) Mvita ya lunungu ya Nzambi me fwanana ve ti bamvita ya bantu. Sambu na nki? Sambu na kuswaswana ti bantu, Nzambi lenda zaba mambu yina kele na kati ya ntima ya muntu.

Mu mbandu, ntangu Nzambi sambisaka mbanza ya Sodome ti ya Gomore mpi bakaka lukanu ya kufwa yo, Abrahami muntu ya kwikama vandaka na mfunu ya kuzaba kana lukanu ya Nzambi vandaka ya lunungu. Yandi lendaka ve kundima nde Nzambi na yandi ya lunungu lendaka ‘kufwa bantu ya mbote nzila mosi ti bantu ya mbi.’ Na ntima-nda yonso, Nzambi ndimisaka yandi nde kana ata bantu kumi ya lunungu kele na Sodome, yandi ta gulusa mbanza yina sambu na bo. (Kuyantika 18:20-33) Yo kele pwelele nde, Nzambi talaka na dikebi yonso ntima ya bantu yina mpi monaka nde bo vandaka mpenza bantu ya mbi.​—1 Bansangu 28:9.

Mutindu mosi, Nzambi sambisaka bantu ya Kanana mpi yo yina yandi pesaka bantuma nde bo fwa bo. Bantu ya Kanana vandaka kusala mambu ya nku mpenza, mu mbandu kuyoka bana na bo ya moyo na tiya sambu na kupesa kimenga. * (2 Bantotila 16:3) Bantu ya Kanana zabaka nde Yehowa pesaka bantu ya Izraele ntuma ya kubotula babwala yonso. Mpi bantu yina ponaka kubikala na babwala na bo mpi kunwana ti bantu ya Izraele vandaka kutelamina na luzolo yonso bantu ya Izraele kaka ve kansi mpi Yehowa, yina monisaka nde yandi vandaka ti bantu na yandi.

Diaka, Nzambi monisaka ntima-nda na bantu ya Kanana yina yambulaka mbi na bo mpi ndimaka kulemfukila minsiku ya Yehowa ya kuzanguka ya bikalulu ya mbote. Mu mbandu, yandi gulusaka Rahabi nkento ya ndumba ya insi Kanana kumosi ti dibuta na yandi. Diaka, ntangu bantu ya Gabaoni yina vandaka mbanza mosi ya Kanana lombaka nde Nzambi kuwila bo mawa, yandi bikaka bo na luzingu kumosi ti bana na bo yonso.​—Yozue 6:25; 9:3, 24-26.

KIKUMA YINA YO KE TADILA NGE: Beto lenda baka dilongi mosi ya mfunu na ndola yina Nzambi pesaka bantu ya Kanana. Beto ke finama kibeni “na kilumbu ya kusambisa mpi ya lufwa ya bantu yina ke vwezaka Nzambi” yina Biblia bikulaka. (2 Piere 3:7) Kana beto ke zolaka Yehowa, beto ta baka balusakumunu ntangu yandi ta fwa bantu yina ke buya luyalu na yandi ya lunungu mpi ta katula bampasi ya ke niokula bantu.

Na zola yonso, Yehowa ke yibusa beto nde bansola yina bibuti ke salaka ke vandaka ti bupusi na bana na bo. Ndinga ya Nzambi ke tuba nde: ‘Nge fwete pona luzingu sambu nge zinga, nge ti bana na nge, na kuzolaka Yehowa Nzambi na nge, na kuwidikilaka ndinga na yandi, mpi na kukangamaka na yandi.’ (Kulonga 30:19, 20) Keti yai kele bangogo ya Nzambi yina kele muntu ya nku to ya Nzambi yina ke zolaka bantu mpi ke zolaka nde bo sala nsola ya mbote?