DISOLO YINA KELE NA LUTITI YA ZULU | NGE LENDA KWENDA PENE-PENE NA NZAMBI
Keti Nge Ke Kudiwaka Pene-Pene na Nzambi?
“Kuvanda na bangwisana ya mbote ti Nzambi ke sadisaka muntu na kuvanda na ngemba, na lutaninu mpi na kudiwa mbote. Yo ke monanaka nde Nzambi ke kudibanza mbala na mbala sambu na mambote na nge.”
—CHRISTOPHER, TOKO MOSI NA GHANA.
“Nzambi ke bakisaka bampasi na nge yonso; yandi ke zolaka nge mingi mpi ke tudilaka nge dikebi ya ngolo.”
—HANNAH, TOKO MOSI YA BAMVULA 13 NA ALASKA, NA ÉTATS-UNIS.
“Kuvanda na bangwisana ya ngolo ti Nzambi kele diambu mosi ya mbote mpi ya ke pesaka ngemba!”
—GINA, NKENTO MOSI YA JAMAÏQUE YA BAMVULA KITESO YA 45.
Katula Christopher, Hannah, mpi Gina, bantu mingi na ntoto ya mvimba ke ndimaka nde Nzambi kele nduku na bo. Ebuna nge? Keti nge mpi ke kudiwaka pene-pene na Nzambi to ke zolaka kukwenda pene-pene na yandi? Mbala ya nkaka nge ke kudiyulaka nde: ‘Keti muntu lenda sala kibeni bangwisana ya ngolo ti Nzambi Nkwa-Ngolo Yonso? Kana mpidina, nki mutindu?’
NGE LENDA KWENDA PENE-PENE NA NZAMBI
Biblia ke tuba nde nge lenda sala bangwisana ya ngolo ti Nzambi. Yo ke tuba mpi nde Nzambi bingaka Abrahami, tata ya mabuta, ‘nduku na yandi.’ (Yezaya 41:8) Tala emvitasio yai ya zola ya kele na Yakobo 4:8: ‘Kwenda penepene na Nzambi, ebuna yandi ta kwisa penepene na nge.’ Verse yai ke monisa pwelele nde muntu lenda sala bangwisana ya ngolo ti Nzambi. Sambu Nzambi ke monanaka ve, nki mutindu muntu lenda “kwenda pene-pene” na yandi mpi kusala bangwisana ya mbote ti yandi?
Sambu na kubaka mvutu na ngiufula yai, bika beto tadila mambu yina ke salamaka ntangu bantu zole ke zola kusala kinduku. Mbala mingi, yo ke yantikaka ntangu konso muntu me zaba zina ya mpangi. Ntangu bo ke solula mbala na mbala mpi ke pesana mabanza, kinduku na bo ke yelaka. Mpi bangwisana na bo ke kumaka ngolo kana konso muntu ke sala kikesa sambu na kusadila muntu ya nkaka mambu. Kusala kinduku ti Nzambi mpi lenda salama mutindu mosi. Bika beto tala nki mutindu yo lenda salama.
Nge Lenda Sepela Mpi Ti
NZOZULU YA NKENGI
Keti Nge Ke Zabaka Zina ya Nzambi mpi Ke Sadilaka Yo?
Nzambi ke zabisa nge zina na yandi mpi ke tuba nde: “Mono kele Yehowa. Yo yina zina na mono.”
