Jairo butukaka ti maladi ya butomfu (infirmité motrice cérébrale). Bo ke bingaka maladi yango mpi tétraplégie spastique. * Maladi yai ke salaka nde bitini mingi ya nitu na yandi kusala ve. Sambu butomfu na yandi kele na maladi, maboko ti makulu na yandi me balukaka. Bantangu ya nkaka, kana maladi ke sala nde nitu na yandi kutekita, yo ke pesaka yandi mpasi. Kana bantu ya nziunga me zaba ve maladi na yandi, yo ke pesaka bo mpi mpasi. Diambu ya mawa kele nde bo ke kangisaka maboko mpi makulu na yandi mbala mingi na velo ya bikata sambu na kubuya bisumbula ya mutindu yai.

Kuyela ya Jairo ke pesaka yandi mpasi mingi na nitu. Ntangu yandi vandaka ti bangonda tatu, yandi yantikaka kubwa ntu. Mbala mingi, mama vandaka kusimba yandi ngolo mpi kunata yandi ntinu na lupitalu sambu yandi vandaka kuyindula nde Jairo me fwa.

Sambu nitu ya Jairo vandaka kukangama-kangama, mikwa na yandi kwendaka na lweka. Ntangu yandi lungisaka bamvula 16, mikwa na yandi ya luketu kumaka na lweka mpi yo lombaka nde bo sala yandi operasio ya ngolo na bambendi mpi na luketo. Mono ke yibukaka diaka mutindu Jairo vandaka kudila konso mpimpa na nima ya operasio.

Maladi ya Jairo ke salaka nde bantu ya nkaka kusadila yandi mambu, mu mbandu kudisa yandi, kulwatisa yandi bilele mpi kutula yandi na mbeto. Mbala mingi, papa ti mama bantu ke sadilaka yandi mambu yai. Ata Jairo ke vandaka na mfunu ya lusadisu konso ntangu, bibuti na beto ke yibusaka yandi mbala mingi nde bantu mpamba ve ke sadisaka yandi na kuzinga kansi Nzambi mpi ke sadisaka yandi.

Bibuti na beto kele Bambangi ya Yehowa mpi bo ke tangilaka Jairo masolo ya Biblia tuka yandi vandaka bebe. Bo ke zabaka nde luzingu kele mfunu mingi kana muntu kele ti bangwisana ya mbote ti Nzambi. Ata nitu ya Jairo ke vandaka pete-pete mpi ke tekita-tekitaka, yandi ke vandaka ti kivuvu ya ngolo sambu na bilumbu ke kwisa. Kansi, mbala mingi papa ti mama vandaka kudiyula kana Jairo lenda bakisa mambu ya kele na Biblia.

 Kilumbu mosi, ntangu Jairo vandaka leke, papa yulaka yandi nde, “Jairo, keti nge lenda tubila mono diambu mosi?” Yandi yikaka nde, “kana nge ke zolaka mono kibeni, nge ta sala yo!” Sambu papa vandaka kubondila yandi na kutuba ata ngogo mosi, mansanga basikaka Jairo na meso. Ata yandi sosaka kumonisa mawi na yandi na bangogo, ndinga na yandi basikaka ve. Yo pesaka papa mpasi mutindu Jairo dilaka. Kansi, kudila na yandi monisaka nde yandi bakisaka mambu yina papa songaka yandi. Diambu ya mpasi vandaka nde yandi kukaka ve kutuba.

Na nima, bibuti na beto bakisaka nde bantangu ya nkaka Jairo vandaka kubalula meso nswalu sambu na kumonisa mabanza mpi mawi na yandi. Sambu bantu vandaka kubakisa ve bidimbu na yandi, yo vandaka kupesa Jairo mpasi. Kansi, ntangu papa ti mama kumaka kubakisa bidimbu na yandi ya meso mpi kusala mambu yina yandi ke zola, Jairo kumaka kumweta. Kumweta vandaka kumonisa nde yandi ke pesa matondo.

Muntu ya ke longaka Jairo ndinga zabisaka beto nde sambu na kusolula mbote ti yandi, beto fwete nangula maboko yonso zole na zulu ntangu beto ke yula yandi ngiufula ya ke lomba nde yandi pesa mvutu ee to ve. Diboko ya kitata ke monisa kundima, diboko ya kimama ke monisa kubuya. Yo yina, yandi lenda tala na diboko ya yandi ke zola sambu na kumonisa kima ya yandi me zola.

Na mvula mosi, Bambangi ya Yehowa ke salaka balukutakanu ya nene mbala tatu, mpi mitubi ke salaka badiskure ya ke katukaka na Biblia na ntwala ya bantu mingi. Jairo vandaka kuwa kiese ntangu bo vandaka kusala badiskure ya mbotika. Ntangu Jairo lungisaka bamvula 16, papa yulaka yandi kilumbu mosi nde: “Jairo, keti nge ke zolaka kubaka mbotika?” Yandi talaka mbala mosi na diboko ya kitata ya papa sambu na kumonisa mpusa na yandi ya kubaka mbotika. Papa yulaka yandi diaka nde: “Keti nge ke zabisaka Nzambi na kisambu nde nge ke zola kusadila yandi kimakulu?” Jairo talaka diaka na diboko ya kitata ya papa. Yo monisaka pwelele nde Jairo me kudipesaka dezia na Yehowa.

Na nima ya kulonguka ti Jairo Biblia mbala mingi, yo monanaka pwelele nde Jairo vandaka kubakisa ntendula ya mbotika ya Bukristu. Yo yina, na mvu 2004, yandi pesaka mvutu na ngiufula yai ya mfunu: “Keti nge me kudipesaka na Nzambi sambu na kusala luzolo na yandi?” Jairo talaka na zulu sambu na kupesa mvutu na ngiufula yai. Kidimbu yai monisaka nde yandi me ndima. Yandi bakaka mbotika na bamvula 17 mpi kumaka mbangi ya Yehowa.

Na mvu 2011, Jairo yantikaka kusolula ti bantu na mutindu ya nkaka disongidila na nsadisa ya ordinatere. Ordinatere yango ke salaka na nsadisa ya  muvuma ya meso na yandi sambu na kukangula baprograme. Kana yandi me kanga meso mpi me kangula to me tala programe mosi, yo kele bonso nde yandi me niema suri ya ordinatere. Ekran ya ordinatere na yandi kele ti bifwanisu ya bangogo mpi ya bansa ya ke sadisaka yandi na kusolula ti bantu. Kana yandi me kanga meso mpi me tala programe mosi, ordinatere na yandi ke basisaka ndinga.

Sambu Jairo kumaka ti nzayilu ya mingi ya Biblia, yandi kumaka ti mpusa ya kusadisa bantu ya nkaka na kimpeve. Ntangu beto ke longukaka Biblia konso mposo na dibuta, mbala mingi, yandi ke talaka mono mpi ke talaka ordinatere na yandi. Yandi ke salaka mutindu yai sambu na kusonga mono nde mono fwete sonikila yandi bakomantere yina yandi ta pesa na masolo ya bangiufula mpi bamvutu na balukutakanu ya dibundu.

Na balukutakanu, yandi ke sosaka na ordinatere na yandi mpi ke talaka programe ya me fwana, ebuna bantu yonso ke waka ndinga yina ke basikaka na ordinatere na yandi. Ntangu yandi ke mwetaka, yo ke pesaka bampangi kikesa na dibundu. Alex, nduku ya Jairo ke tuba nde: “Mbala mingi, mono ke yitukaka ntangu Jairo ke pesaka bakomantere na disolo mosi ya Biblia.”

Jairo ke sadilaka meso na yandi sambu na kuzabisa bantu ya nkaka balukwikilu na yandi. Yandi ke talaka kifwanisu mosi na ordinatere na yandi ya ke monisaka kilanga mosi ti bambisi mpi bantu ya bampusu yonso ke zinga na ngemba. Ntangu kifwanisu yango ke kangukaka, ndinga ke basikaka na ordinatere na yandi mpi ke tubaka nde: “Mukanda ya Kusonga 21:4 ke pesaka kivuvu nde ntoto ta kuma paladisu mpi maladi ti lufwa ta vanda diaka ve.” Kana bantu ya ke widikila yandi me monisa mpusa, yandi ke talaka programe ya nkaka mpi ordinatere na yandi ke tubaka nde: “Keti nge ke zola kulonguka Biblia ti mono?” Diambu ya kuyituka kele nde nkaka na beto ndimaka kulonguka ti yandi. Yo ke pesaka kiese na kumona Jairo ti mpangi ya nkaka ke longuka Biblia malembe-malembe ti nkaka! Nkaka bakaka mbotika na lukutakanu ya distrike na Madrid na Augusti 2014.

Balongi ya Jairo ya nzo-nkanda me zabaka nde Jairo me kudipesaka na Nzambi. Rosario, muntu ya ke longaka Jairo ndinga, ke tuba nde: “Kana mono ke zola kukota na dibundu mosi, mono ta kuma Mbangi ya Yehowa. Ata maladi ke yangisaka Jairo, mono me bakisaka mutindu lukwikilu na yandi me sadisaka yandi na kuvanda ti luzingu ya kele ti lukanu.”

Jairo ke vandaka na kiese ntangu mono ke tangilaka yandi lusilu yai ya kele na Biblia: “Bantu ya makulu-kifu ta pumbuka bonso mbambi, bababa ta kuma kutuba na ndinga ya ngolo ti kiese.” (Yezaya 35:6) Ata yandi ke lembaka nitu bantangu ya nkaka, yandi ke vandaka ti mabanza ya mbote. Yandi ke vandaka ti mabanza ya mbote sambu Nzambi mpi banduku na yandi ya Bakristu ke sadisaka yandi. Mabanza na yandi ya mbote mpi lukwikilu na yandi ya ngolo ke monisaka nde kusadila Yehowa ke kumisaka luzingu ya mpasi luzingu mosi ya kele ti lukanu.