Inki salamaka? Sambu na nki Nzambi nwanaka ve sambu na Bayuda, mutindu yandi vandaka kusala yo na ntangu ya ntama? Sambu na nki yandi pesaka bo ve nswa ya kunwana bitumba sambu na kukatuka na mpasi yina bo vandaka kumonisa bo? Keti mutindu Nzambi vandaka kutadila bitumba sobaka? Ve. Kansi, Bayuda bantu sobaka. Bo buyaka Yezu, Mwana ya Nzambi, nde yandi kele ve Mesia. (Bisalu 2:36) Mpidina, dikanda ya mvimba fwaka bangwisana ya mbote yina bo vandaka na yo ti Nzambi.—Matayo 23:37, 38.

Nzambi vandaka kutanina diaka ve Bayuda ti Ntoto na bo ya Lusilu, mpi bo vandaka diaka ve ti nswa ya kutuba nde bo ke nwana bitumba yina Nzambi ke ndima to nde Nzambi ke sadisa bo na bitumba. Mutindu Yezu tubaka na ntwala, Nzambi katulaka balusakumunu yina yandi vandaka kupesa dikanda ya Izraele ya kinsuni sambu yandi vandaka kundima bo diaka ve, mpi yandi pesaka yo na dikanda mosi ya mpa, disongidila dikanda mosi ya kimpeve. Na nima, Biblia kumaka kubinga dikanda yai ya kimpeve “Izraele ya Nzambi.” (Bagalatia 6:16; Matayo 21:43) Dibundu ya Bakristu ya bo me tulaka mafuta na kimpeve me kumaka Izraele ya kimpeve ya Nzambi. Yo yina, bo zabisaka Bakristu yango na mvu-nkama ya ntete nde: ‘Ntangu yai beno kele bantu ya Nzambi.’—1 Piere 2:9, 10.

Sambu Bakristu ya mvu-nkama ya ntete kumaka ‘bantu ya Nzambi,’ keti Nzambi nwanaka bitumba sambu na kugulusa bo na maboko ya bantu ya Roma yina vandaka kumonisa bo mpasi? Keti yandi pesaka bo nswa ya kunwanisa bantu yina vandaka kumonisa bo mpasi? Ve, yandi salaka yo ve. Sambu na nki? Mutindu beto me mona yo na disolo ya me luta, ntangu Nzambi ke pesaka nswa ya kunwana bitumba, yandi mosi muntu ke zabisaka ntangu bantu fwete nwana bitumba yina. Nzambi nwanaka ve bitumba sambu na Bakristu ya mvu-nkama ya ntete mpi yandi pesaka bo ve nswa ya kusala yo. Yo kele pwelele nde ntangu yina Nzambi tulaka sambu na kunwanisa mambu ya mbi mpi ya nku vandaka ve na mvu-nkama ya ntete.

Yo yina, bonso bansadi ya Nzambi ya ntangu ya ntama, yo lombaka nde Bakristu ya mvu-nkama ya ntete kuvingila ntangu yina Nzambi tulaka sambu na kusukisa mambu ya mbi mpi ya nku. Na ntangu yina, Nzambi pesaka bo ve nswa ya kukwenda kunwana bitumba ti bambeni na bo. Yezu Kristu tendulaka mambu yai pwelele na malongi na yandi. Mu mbandu, yandi songaka ve balongoki na yandi na kukwenda kunwana bitumba, kansi yandi zabisaka bo nde: “Beno landa na kuzola bambeni na beno mpi na kusamba sambu na bantu yina ke monisa beno mpasi.” (Matayo 5:44) Ntangu Yezu tubilaka ntangu yina basoda ya Roma zolaka kunwanisa Yeruzalemi na mvu-nkama ya ntete, yandi pesaka balongoki na yandi ntuma ya kutina, kansi ve ya kubikala na Yeruzalemi sambu na kunwana bitumba. Balongoki salaka mambu yina yandi tubaka.—Luka 21:20, 21.

Diaka, mpeve santu sadisaka ntumwa Polo na kusonika nde: “Beno vutula ve mbi sambu na mbi, . . . sambu bo me sonikaka nde: Yehowa ke tuba nde, ‘Mono muntu ke vutulaka mbi; mono muntu ta pesa ndola.’” (Baroma 12:19) Polo vandaka kuvutukila mambu yina Nzambi tubaka bamvu-nkama mingi na ntwala na mukanda ya Levi 19:18 mpi ya Kulonga 32:35. Mutindu beto me mona yo na disolo ya me luta, Nzambi vandaka kusadila mwaye mosi sambu na kupesa ndola na bantu yina vandaka kuniokula bantu na yandi na ntangu ya ntama: yandi vandaka kusadisa bantu na yandi ntangu bo vandaka  kukwenda kunwana bitumba ti bambeni na bo. Yo yina, bangogo ya Polo ke monisa nde mutindu Nzambi ke tadilaka bitumba me sobaka ve. Na mvu-nkama ya ntete, Nzambi vandaka kumona kaka nde bitumba kele mutindu mosi ya mbote ya kupesa bambeni ya bansadi na yandi ndola mpi ya kusukisa mambu mingi ya nku mpi ya mbi. Bonso na ntangu ya ntama, Nzambi muntu vandaka kuzabisa ntangu bantu fwete nwana bitumba mpi nani fwete nwana bitumba.

Yo me monana pwelele nde Nzambi pesaka ve Bakristu ya mvu-nkama ya ntete nswa ya kunwana bitumba. Kansi, nki beto ta tuba sambu na ntangu na beto? Keti Nzambi ke pesaka bantu nswa ya kukwenda kunwana bitumba bubu yai? Keti yai kele ntangu yina Nzambi fwete kotila bansadi na yandi mpi kunwana bitumba sambu na bo? Inki mutindu Nzambi ke tadilaka bitumba bubu yai? Disolo ya ke landa ta pesa bamvutu na bangiufula yai.