Kulonga 18:1-22
18 “Banganga-nzambi yina kele Balevi, mpi nkutu dikanda ya mvimba ya Levi, ta vanda ve ti kimvwama to dikabu ti Izraele. Bo ta dia makabu yina bo me yoka na tiya sambu na Yehowa, makabu yina kele kimvwama na yandi.+
2 Yo yina, bo fwete baka ve dikabu na kati ya bampangi na bo. Yehowa kele dikabu na bo, kaka mutindu yandi tubilaka bo.
3 Ebuna bima yai ta vanda bima yina banganga-nzambi ta vanda ti nswa ya kubaka na maboko ya bantu: Konso muntu yina ke pesa kimenga, yo vanda ya ngombe ya bakala to ya dimeme, yandi ta pesa dipeka, bambwanga, mpi dikundu na nganga-nzambi.
4 Nge fwete pesa yandi bambuma ya ntete ya nkeni na nge, vinu na nge ya mpa, mafuta na nge, mpi mika ya ntete yina bo me zenga na bitwisi na nge.+
5 Yehowa Nzambi na nge me sola yandi ti bana na yandi ya babakala na kati ya makanda na nge yonso sambu na kusala kisalu na zina ya Yehowa ntangu yonso.+
6 Kansi kana Mulevi mosi kubika mbanza mosi na kati ya bambanza na nge na Izraele, kisika yandi vandaka kuzinga,+ ebuna yandi* ke zola kukwenda na kisika yina Yehowa me sola,*+
7 yandi lenda sala kisalu kuna na zina ya Yehowa Nzambi na yandi mutindu mosi ti bampangi na yandi yonso, Balevi, bayina kele kuna na ntwala ya Yehowa.+
8 Yandi ta baka dikabu ya madia kiteso mosi ti bo,+ na zulu ya bima yina yandi ke baka ntangu yandi ke teka bima ya ba-nkaka na yandi.
9 Ntangu nge ta kota na insi yina Yehowa Nzambi na nge ke pesa nge, nge fwete longuka ve na kulanda mbandu ya mambu ya mbi ya makanda yina.+
10 Bo fwete mona ve na kati na beno muntu yina ke yoka* mwana na yandi ya bakala to mwana na yandi ya nkento na tiya,+ muntu yina ke zabisaka na ntwala mambu yina ta bwa,+ muntu yina ke salaka mazi,+ muntu yina ke sosaka bidimbu ya mambu yina ke kwisa,+ nganga-nkisi,+
11 muntu yina ke kangaka bankaka na bankisi, muntu yina ke kwendaka kutala muntu ya ke solulaka ti bampeve ya bafwa,+ muntu yina ke zabisaka bantu mambu yina ta kumina bo,+ to muntu yina ke yulaka mambu na bafwa.+
12 Konso muntu yina ke sala mambu yai kele nzanzi na meso ya Yehowa, mpi sambu na mambu yina ya mbi, Yehowa Nzambi na nge ke kula makanda yina na ntwala na nge.
13 Nge fwete vanda kukonda kifu na ntwala ya Yehowa Nzambi na nge.+
14 “Makanda yai ya nge ke botula vandaka ti kikalulu ya kuwila bantu yina ke salaka mazi+ mpi yina ke zabisaka na ntwala mambu yina ta bwa.+ Kansi Yehowa Nzambi na nge me pesa nge ve nzila ya kusala konso kima ya mutindu yai.
15 Yehowa Nzambi na nge ta basisila nge mbikudi yina kele bonso mono na kati ya bampangi na nge. Beno fwete wila yandi.+
16 Yo kele sambu na kupesa mvutu na mambu yina nge lombaka Yehowa Nzambi na nge na Orebi na kilumbu ya lukutakanu*+ ntangu nge tubaka nde, ‘Kubika ve nde mono wa ndinga ya Yehowa Nzambi na mono to mono mona diaka tiya yai ya nene, sambu mono fwa ve.’+
17 Ebuna Yehowa tubilaka mono nde, ‘Mambu yina bo me tuba kele mbote.
18 Mono ta basisila bo mbikudi yina kele bonso nge+ na kati ya bampangi na bo, ebuna mono ta tula bangogo na mono na munoko na yandi,+ mpi yandi ta tubila bo mambu yonso yina mono me songa yandi.+
19 Ya kieleka, muntu yina ta wa ve mambu na mono yina yandi ta tuba na zina na mono,+ mono ta lomba yandi na kuvutula munoko.
20 “‘Kana mbikudi mosi kutuba na lulendo yonso na zina na mono diambu yina mono songaka yandi ve na kutuba to kana yandi tuba na zina ya banzambi ya nkaka, mbikudi yina fwete fwa.+
21 Kansi, nge lenda kuditubila na ntima na nge nde: “Nki mutindu beto ta zaba nde Yehowa me tuba ve diambu yina?”
22 Kana mbikudi yina kutuba diambu mosi na zina ya Yehowa ebuna diambu yango kulungana ve, Yehowa tubaka ve diambu yina. Mbikudi tubaka yo na lulendo yonso. Nge fwete wa yandi boma ve.’
Banoti na nsi ya lutiti
^ To “moyo na yandi.”
^ Disongidila, kisika yina Yehowa me sola sambu yo vanda kisika ya lusambu.
^ Na kisina, “ke lutisa.”
^ To “dibundu.”
