Yezaya 66:1-24
66 Yehowa me tuba nde:
“Zulu kele kiti na mono ya kimfumu, mpi ntoto kele kazune na mono.+
Ebuna, wapi nzo yina beno lenda tungila mono,+Mpi wapi kisika na mono ya kupema?”+
2 “Diboko na mono mosi me salaka bima yai yonso,Mpi yai mutindu bima yai yonso me salamaka,” Yehowa muntu me tuba.+
“Ebuna, mono ta tala muntu yai,Muntu yina kele ya kudikulumusa mpi ke niokwama na mabanza, yina ke tekitaka* sambu na mambu ya mono ke tuba.+
3 Muntu yina ke fwa ngombe kele bonso muntu yina ke fwa muntu.+
Muntu yina ke pesa kimenga ya dimeme kele bonso muntu yina ke buka nkingu ya mbwa.+
Muntu yina ke pesa dikabu— bonso menga ya ngulu!+
Muntu yina ke pesa dikabu ya ndumbu ya mpembe+ ya kuyibuka kele bonso muntu yina ke sakumuna ti bangogo ya mazi.*+
Bo me sola banzila na bo mosi,Mpi bo ke wa kiese* na bima ya nzanzi.
4 Yo yina mono ta sola mitindu ya kupesa bo ndola,+Mpi mono ta natila bo mambu yina bo ke wa boma.
Sambu ntangu mono bingaka, ata muntu mosi ve ndimaka;Ntangu mono tubaka, ata muntu mosi ve waka.+
Bo landaka kusala mambu ya mbi na meso na mono,Mpi bo solaka kusala mambu yina vandaka kupesa mono ve kiese.”+
5 Beno wa mambu ya Yehowa ke tuba, beno bantu ya ke tekitaka* sambu na mambu ya yandi ke tubaka:
“Bampangi na beno yina ke menga beno mpi ke kula beno sambu na zina na mono me tuba nde, ‘Yehowa kubaka nkembo!’+
Kansi Nzambi ta monana mpi ta natila beno kiese,Mpi bo kele bantu yina bo ta pesa nsoni.”+
6 Makelele ya mavwanga ya ke katuka na mbanza, makelele ya ke katuka na tempelo, ke wakana!
Yo kele makelele ya Yehowa, yandi ke pesa bambeni na yandi ndola ya bo me fwana na kubaka.
7 Na ntwala nde misongo kukwisila yandi, yandi butaka.+
Na ntwala nde mpasi ya kubuta kusimba yandi, yandi butaka mwana ya bakala.
8 Nani me waka ntete diambu ya mutindu yai?
Nani me monaka mambu ya mutindu yai?
Keti insi mosi ta butuka na kilumbu mosi?
To keti dikanda mosi ta butuka na mbala mosi?
Kansi, kaka na ntangu mpasi ya kubuta simbaka Sioni, yandi butaka bana na yandi.
9 “Keti mono ta kangula divumu kansi kubuya nde mwana kubasika?” Yehowa muntu me tuba.
“To keti mono ta sala nde mwana kukuma pene-pene ya kubutuka mpi na nima mono kanga divumu?” Nzambi na nge muntu me tuba.
10 Beno yangalala ti Yeruzalemi mpi beno vanda na kiese ti yandi,+ beno yonso bantu ya ke zolaka yandi.+
Beno yangalala mingi ti yandi, beno bantu yonso yina ke dila yandi,
11 Sambu beno ta nwa mabele mpi ta fuluka kibeni mabele na yandi ya ke lembikaka,Mpi beno ta nwa yo mingi mpi ta wa kiese na nkembo na yandi ya mingi.
12 Yehowa me tuba nde:
“Tala, mono ke yalumuna ngemba na zulu na yandi kaka bonso nzadi+Mpi nkembo ya makanda bonso masa ya ke dindisaka.+
Beno ta nwa mabele mpi yandi ta nata beno na luketo na yandi,Mpi ta sakana ti beno na zulu ya mabolongo na yandi.
13 Mutindu mama ke lembikaka mwana na yandi,Mutindu yo yina mpi mono ta landa kulembika beno;+Mpi beno ta lembama+ sambu na Yeruzalemi.
14 Beno ta mona mambu yai, ebuna ntima na beno ta wa kiese,Mikwa na beno ta yela bonso matiti ya mpa.
Ebuna diboko* ya Yehowa ta zabana na bansadi na yandi,Kansi yandi ta tungulula bambeni na yandi.”+
15 “Sambu Yehowa ta kwisa bonso tiya,+Mpi bapusu-pusu na yandi ya bitumba kele bonso mupepe ya ngolo,+Sambu na kupesa ndola na makasi kibeni,Sambu na kunganina ti baludimi ya tiya.+
16 Sambu Yehowa ta zenga makambu ti tiya,Ee, ti mbele na yandi ya bitumba, sambu na kunwanisa bantu yonso;*Ebuna bantu yina Yehowa ta fwa ta vanda mingi.
17 “Bantu yina ke kudisantisa mpi ke kudikumisa bunkete sambu na kukota na bilanga*+ na nima ya kima yina kele na kati-kati, bantu yina ke dia musuni ya ngulu+ ti bima ya nzanzi mpi bampuku,+ bo yonso ta fwa kumosi,” Yehowa muntu me tuba.
18 “Sambu mono me zaba bisalu na bo ti bangindu na bo, mono ke kwisa sambu na kuvukisa bantu ya makanda yonso ti ya bandinga yonso, ebuna bo ta kwisa mpi ta mona nkembo na mono.”
19 “Mono ta tula kidimbu mosi na kati na bo, mpi bantu ya nkaka na kati ya bantu yina ke guluka, mono ta tinda bo na makanda—na Tarsisi,+ Pule, mpi Ludi,+ bantu yina ke losaka tolo-tolo, na Tubale ti Yavani,+ mpi na bisanga ya ntama—bayina me wa ve nsangu na mono to me mona ve nkembo na mono; ebuna bo ta samuna nkembo na mono na kati ya makanda.+
20 Bo ta basisa bampangi na beno yonso na makanda yonso+ bonso dikabu sambu na Yehowa, na zulu ya bampunda, na bapusu-pusu ya bitumba, na bapusu-pusu ya bo me fikaka, na bampunda ya mutindu ya nkaka, mpi na bashamo ya ke tambulaka ntinu, mpi ta nata bo na ngumba na mono ya santu, Yeruzalemi,” Yehowa muntu me tuba, “kaka mutindu bantu ya Izraele ke nataka dikabu na bo na dilonga ya bunkete na nzo ya Yehowa.”
21 “Mono ta baka mpi bantu ya nkaka sambu na kuvanda banganga-nzambi mpi bantu ya nkaka sambu na kuvanda Balevi,” Yehowa muntu me tuba.
22 “Kaka mutindu zulu ya mpa mpi ntoto ya mpa+ ya mono ke sala ta landa kuvanda na ntwala na mono,” Yehowa muntu me tuba, “mutindu mosi mpi bana* na nge ti zina na nge ta landa kuvanda.”+
23 “Ebuna katuka na ngonda ya mpa tii na ngonda ya nkaka ya mpa mpi katuka na kisabatu tii na kisabatu ya nkaka,Bantu yonso* ta kwisa sambu na kufukama na ntwala na* mono,”+ Yehowa muntu me tuba.
24 “Ebuna bo ta basika mpi ta tala bamvumbi ya bantu yina kolamaka na ntwala na mono;Sambu misopi yina ta vanda na zulu na bo ta fwa ve,Mpi tiya yina ta yoka bo ta fwa ve,+Mpi bo ta kuma kima ya nzanzi sambu na bantu yonso.”*
Banoti na nsi ya lutiti
^ To “ke kudiyangisaka.”
^ To mbala ya nkaka, “bonso muntu yina ke pesa kiteki lukumu.”
^ To mbala ya nkaka, “moyo na bo ke wa kiese.”
^ To “ke kudiyangisaka.”
^ To “ngolo.”
^ Na kisina, “nsuni yonso.”
^ Disongidila, bilanga yina bo vandaka kusadila na lusambu ya biteki.
^ Na kisina, “nkuna.”
^ Na kisina, “Nsuni yonso.”
^ To “sambu na kusambila.”
^ Na kisina, “nsuni yonso.”
