Yobi 30:1-31
30 “Ntangu yai bo ke seka mono+—Bantu yina kele baleke na ntwala na mono,Bayina mono zolaka kubuya kutula batata na boKumosi ti bambwa yina vandaka kukeba bitwisi na mono.
2 Inki vandaka mfunu ya ngolo ya maboko na bo sambu na mono?
Ngolo na bo me mana.
3 Bo me lemba sambu bo me konda bima mpi bo kele na nzala;Bo ke tafuna-tafuna ntoto ya kuyumaYina vandaka dezia ya kubeba mpi bikalaka mpamba.
4 Bo ke lokuta matiti ya mungwa na banti;Madia na bo kele misisa ya tu-banti.
5 Bo me kula bo na kati ya bantu;+Bantu ke tula bo milolo mutindu bo ke tulaka muyibi.
6 Bo ke zinga na lweka ya mabengi,*Na mabulu yina kele na ntoto mpi na matadi.
7 Bo ke boka kuna na banti yinaMpi ke kangama-kangama kisika mosi na kati ya banti ya bansende.
8 Sambu bo kele bana ya bantu yina me konda mayele mpi ya bantu yina me konda zina,Bo me kula* bo na insi.
9 Kansi ntangu yai bo ke seka mono ata na bankunga na bo;+Mono me kuma kima yina bo ke vweza.*+
10 Bo ke menga mono mpi ke tina mono;+Bo ke wa ve boma ya kulosila mono mate na luse.+
11 Sambu Nzambi me katula mono binwaninu* mpi me pesa mono nsoni,Bo ke kudiyala diaka ve* na ntwala na mono.
12 Bo me telama bonso kimvuka ya bantu na diboko na mono ya kitata;Bo me sala nde mono tinaMpi bo me tula na nzila na mono bima ya ke kangaka nzila mpi ya ke fwaka.
13 Bo me bebisa banzila na monoMpi me kumisa bampasi na mono ngolo kuluta,+Muntu ya kukanga bo nzila kele ve.*
14 Bo ke kwisa bonso na nzila yina bo me pasula na kibaka;Bo ke dindumuka na kati ya kisika ya kubeba.
15 Boma ya ngolo me simba mono;Lukumu na mono me kwenda bonso mupepe,Mpi luguluku na mono me vila bonso dituti.
16 Ntangu yai luzingu* na mono ke zola kumana;+Bilumbu ya mpasi+ me kanga mono.
17 Mpasi me kota na mikwa na mono* na mpimpa;+Mpasi ke tatika mpi ke mana ve ata fioti.+
18 Ti ngolo ya nene lele na mono me beba kibeni;*Bonso nkingu ya lele na mono, yo ke bweta mono na nkingu.
19 Nzambi me losa mono na kati ya poto-poto;Mono me kuma mfututu mpi putulu ya tiya.
20 Mono ke didila nge sambu na kulomba lusadisu, kansi nge ke pesa mono ve mvutu;+Mono me telama, kansi nge ke tala mono kaka.
21 Nge me balukila mono na nku yonso;+Nge ke nwanisa mono na ngolo yonso ya diboko na nge.
22 Nge me nangula mono mpi me nata mono na mupepe;Ebuna nge ke nikisa-nikisa mono na mupepe ya ngolo.*
23 Sambu mono me zaba nde nge ta kulumusa mono na lufwa,Na nzo yina bantu yonso ya kele na luzingu ta kutana.
24 Kansi ata muntu mosi ve lenda bula muntu ya me bukana*+Ntangu yandi ke dila sambu na kulomba lusadisu na ntangu na yandi ya mpasi.
25 Keti mono dilaka ve sambu na bantu yina bampasi me bwila bo?*
Keti mono* waka ve mawa mingi sambu na nsukami?+
26 Ata mono vandaka kutula kivuvu na mambu ya mbote, mambu ya mbi kwisaka;Mono vandaka kuvingila nsemo, kansi mpimpa kwisaka.
27 Kunikana-nikana na kati na mono sukaka ve;Bilumbu ya mpasi kwisilaka mono.
28 Mono ke tambula-tambula ti mawa;+ nsemo ya ntangu kele ve.
Na kati ya kimvuka ya bantu, mono ke telama mpi ke dila sambu na kulomba lusadisu.
29 Mono me kuma mpangi ya bambwa ya nseke,Mpi nduku ya bana-bankento ya otrishi.+
30 Mpusu ya nitu na mono me kuma ndombe mpi ke bwa-bwa+Mikwa na mono ke pia sambu na tiya.*
31 Bo ke sadila kidare na mono kaka sambu na kudila,Mpi musembu na mono sambu na makelele ya bidilu.
Banoti na nsi ya lutiti
^ To “miwanda.”
^ Na kisina, “bula.”
^ Na kisina, “me kuma kingana sambu na bo; disapu sambu na bo.”
^ Na kisina, “me kangula nsinga ya munduki na mono ya tolo-tolo.”
^ To “Bo ke kangula nsinga ya bo ke tulaka na munoko ya mpunda.”
^ To mbala ya nkaka, “Muntu ya kusadisa bo kele ve.”
^ To “moyo.”
^ Na kisina, “Mikwa na mono me tobuka.”
^ To mbala ya nkaka, “Mpasi na mono ya ngolo me bebisa luse na mono.”
^ To mbala ya nkaka, “ke fwa mono na mupepe ya ngolo.”
^ Na kisina, “bula mayumbu.”
^ To “yina ke lutisa kilumbu ya mbi?”
^ To “Keti moyo na mono.”
^ To mbala ya nkaka, “fievre.”
