Kitini ya 7

Mambu Yina Nzambi Silaka na Nzila ya Baprofete

BAPROFETE ya ntama kumonisaka lukwikilu na Nzambi. Bo vandaka kukwikila na balusilu na yandi mpi kuzinga na kuwakana ti yo. Balusilu yango vandaka kutubila inki?

Mbala mosi, na nima ya kukolama ya Adami ti Eva na Edeni, Nzambi silaka nde yandi tapona muntu mosi yina tanyata ntu ya nyoka, yina kemonisa “Dragoni ya nene, nyoka ya ntama, yina bo kebingaka Dyabulu mpi Satana” mpi tafwa yandi kimakulu. (Kuyantika 3:14, 15; Kusonga 12:9, 12) Nani kele Muntu yina takwisa?

Kiteso ya bamvula 2 000 na nima ya kupesama ya mbikudulu yai ya ntete, Yehowa silaka profete Abrahami nde Muntu yina takwisa tavanda mutekolo na yandi. Nzambi songaka Abrahami nde: “Bantu yonso ya nsi-ntoto ta lombaka mono na kusakumuna bo mutindu mono me sakumunaka [nkuna, NW] na nge. Mono ta sala mambu yai yonso sambu nge lemfukilaka mono.”​—Kuyantika 22:18.

Na mvu 1473 N.T.B., Nzambi kuzabisaka profete Moize bansangu yankaka ya metala nkuna. Moize kusongaka bana ya Izraele nde: “Yandi ta tindila beno konso ntangu profete bonso mono; profete yango ta katukaka na kati na beno, ebuna beno fweti lemfukaka na yandi.” (Kulonga 18:15) Yo yina, profete yina zolaka kukwisa ya kuvandaka bonso Moize zolaka kubasika na kati ya bana ya Abrahami.

Profete yango zolaka mpi kuvanda mutekolo ya Ntotila Davidi mpi yandi mosi zolaka kukuma ntotila ya nene. Nzambi kusilaka Ntotila Davidi: “Mono ta sala na mpila nde kimfumu na yandi kusuka ve.” (2 Samuele 7:12, 13) Nzambi kutubaka mpi nde mutekolo yai ya Davidi tavanda “Mfumu ya Ngemba” mpi yandi yikaka nde: “Kimfumu na yandi ta yela, yo  ta kwenda kaka na ntwala; yo ta vandaka kaka na ngemba tii kuna. Yandi ta yinga ntotila Davidi na kiti na yandi ya kimfumu, yandi ta yalaka bantu na nzila ya masonga ti ya kieleka katuka ntangu yai tii kuna.” (Yezaya 9:5, 6) Ya kyeleka, Ntwadisi yina ya lunungu tavutula ngemba mpi lunungu na nsi-ntoto ya mvimba. Kansi inki ntangu yandi takwisa?

Na nima, wanzyo Gabriele zabisaka profete Daniele nde: “Katuka ntangu Nzambi me tuba na kutunga diaka Yeruzalemi tii ntangu mfumu yina ya yandi me solaka ta kwisa, nge fweti tanga bamvula nsambwadi mbala nsambwadi disongidila nde bamvula makumi iya na uvwa ta luta. Na nima tanga diaka bamvula nsambwadi mbala makumi sambanu na zole.” (Daniele 9:25) Bamposo yina 69 kemonisa bamvula 69, disongidila konso mposo kele ti bamvula 7, mpi kimvuka na yo kesala bamvula 483. Bamvula yango kuyantikaka na mvu 455 N.T.B. tii na mvu 29 T.B. *

Keti Mesia, yina kuvandaka profete bonso Moize mpi ya kuvandaka nkuna yina bo vandaka kuvingila banda ntama, kukwisaka mpenza na mvu 29 T.B.? Bika beto tadila yo.

[Noti na nsi ya lutiti]

Inki Mvutu Nge Tapesa?

• Nkuna ya lusilu ya Abrahami tasala Satana inki?

• Nzambi silaka inki na nzila ya Moize?

• Inki dyambu Davidi longukaka na yina metala nkuna?

• Wanzyo Gabriele zabisaka Daniele inki?

[Bifwanisu ya kele na lutiti 18, 19]

Nkuna ya lusilu

tabasika na kikanda ya Abrahami

tavanda profete bonso Moize

tabasika na kikanda ya Davidi

takwisa na mvu 29 T.B.

tafwa nyoka, Satana