Kitini ya 8

Mesia Memonana

BAMVULA kuluta 500 na nima ya mbikudulu ya Daniele, Gabriele wanzyo ya Nzambi monanaka na toko mosi ya vandaka mwense na zina ya Maria, yina vandaka mutekolo ya Ntotila Davidi. Gabriele zabisaka Maria nde: “Mbote na nge! Mfumu Nzambi me tala nge na disu ya mbote; yandi kele ti nge.” (Luka 1:28) Kansi, Maria waka boma. Mbote yina Gabriele pesaka yandi vandaka kutendula inki?

Gabriele tendudilaka yandi nde: “Maria, kumona boma ve. Nzambi me tala nge na disu ya mbote. Nge ta baka divumu; nge ta buta mwana ya bakala; nge ta pesa yandi zina: Yesu. . . . Mfumu-Nzambi ta tula yandi ntotila bonso vandaka nkaka na yandi Davidi. . . . Kimfumu na yandi ta suka ve.” (Luka 1:30-33) Yai nsangu mosi ya kitoko mpenza! Maria tabuta Mesia, nkuna yina bantu vandaka kuvingila bamvula mingi!

Mvula yina kulandaka, Yezu butukaka na Betelemi. Na mpimpa yina, wanzyo mosi zabisaka bangungudi ya bwala yina nde: “Beno kuwa boma ve, sambu mono me kwisa kuzabisa beno nsangu ya mbote yina ta pesa kiese mingi . . . bo me butila beno Ngulusi na bwala ya Davidi. Yandi kele Kristo, Mfumu na beno.” (Luka 2:10, 11) Na nima, dibuta ya Yezu kwendaka na Nazareti; yandi yelaka kuna.

Na mvu 29, ya ntangu na beto​—mvula yina Mesia fwete monana​—Yezu yantikaka kusadila Nzambi bonso profete, ntangu yandi ‘vandaka na bamvula kiteso ya makumi tatu.’ (Luka 3:23) Bantu mingi bakisaka nde Nzambi muntu tindaka Yezu. Bo tubaka nde: “Profete ya nene me monika na kati na beto!” (Luka 7:16, 17) Kansi, inki mambu Yezu longaka?

Yezu longaka bantu na kuzola mpi na kusambila Nzambi: Yandi tubaka nde: “Mfumu Nzambi na beto, yandi kaka kele Mfumu. Nge fweti zola Mfumu Nzambi na nge, na ntima na nge yonso, na luzolo na nge yonso, na mabanza na nge yonso ti na ngolo na nge yonso.” (Marko 12:29, 30) Yandi tubaka dyaka nde: “Nge fweti samba Mfumu Nzambi, Nzambi na nge. Kaka yandi mpamba nge fweti samba!”​—Luka 4:8.

Yezu syamisaka bantu na kuzolana bo na bo: Yandi tubaka nde: “Nge fweti zola mpangi na nge bonso nge mosi.” (Marko 12:31) Yandi tubaka dyaka nde: “Beno sala bantu ya nkaka mambu yonso yina ya beno zola nde bo sala beno, sambu  Bansiku ya Moize ti malongi ya baprofete ke longaka mpidina.”​—Matayo 7:12.

Yezu zabisaka bankaka Kimfumu ya Nzambi na kikesa yonso: Yandi tubaka nde: “Mono fweti zabisa nsangu ya mbote ya Kimfumu ya Nzambi na babwala ya nkaka mpi, sambu yina kele kisina ya mambu ya Nzambi tindilaka mono.” (Luka 4:43) Sambu na nki Kimfumu ya Nzambi kele mpenza mfunu?

Masonuku kelonga nde Kimfumu ya Nzambi kele luyalu ya zulu yina tayala ntoto. Yezu Mesia, kele Ntotila yina Nzambi meponaka. Profete Daniele monaka na ntwala nde, Nzambi tapesa Mesia ‘kiyeka, lukumu ti kimfumu’ na zulu. (Daniele 7:14) Kimfumu yina takitula ntoto ya mvimba Paladisu mpi tapesa bansadi ya Nzambi luzingu ya mvula na mvula. Keti yai kele ve nsangu ya kuluta mbote?

Inki Mvutu Nge Tapesa?

• Gabriele wanzyo ya Nzambi zabisaka Maria inki?

• Inki mbikudulu lunganaka na mvu 29 ya ntangu na beto?

• Yezu longaka inki?

• Kimfumu ya Nzambi kele inki, mpi nki mambu yo tasala?

[Lupangu/​Kifwanisu ya kele na lutiti 21]

Yezu Mesia Kele Nani?

“Mesia” mpi “Kristu” ketendula “Mupakulami” yina Nzambi ponaka sambu na kisalu mosi. Nzambi pesaka Yezu Mesia luzingu. Nzambi salaka kimangu mosi ya nene na mpila nde Maria, yina vandaka mwense, kubuta Yezu kukonda kuvukisa nitu ti bakala.

Sambu na nki bantu mingi vandaka kukwikila na Yezu? Sambu na mwa bikuma yai melanda:

• Malongi na yandi vandaka kukatuka na Masonuku ya Santu.

• Malongi mpi mbandu na yandi vandaka kubenda bantu yina kezolaka kyeleka mpi lunungu.

• Yandi salaka bimangu mingi na nsadisa ya ngolo ya Nzambi.

• Yandi lungisaka bambikudulu mingi yina kele na Masonuku ya Santu.

[Kifwanisu ya kele na lutiti 20, 21]

Gabriele zabisaka Maria nde yandi tabuta Mesia