Keti nge ke mona mwana-nkento yai na kifwanisu?— Yandi kele mwana ya Yefte. Biblia ke zabisa beto ve zina na yandi, kansi beto me zaba nde yandi sepedisaka tata na yandi mpi Yehowa. Bika beto longuka disolo na yandi mpi ya tata na yandi Yefte.

Yefte vandaka muntu ya mbote mpi yandi vandaka kulutisa ntangu mingi na kulonga mwana na yandi mambu ya Yehowa. Diaka, yandi vandaka bakala ya ngolo mpi ntwadisi ya mbote. Yo yina, bantu ya Izraele lombaka yandi na kutwadisa bo na kunwana ti bambeni na bo.

Yefte sambaka Nzambi na kusadisa yandi na kununga mvita yina. Yandi silaka nde kana yandi nunga, yandi ta pesa Yehowa muntu ya ntete yina ta basika na nzo na yandi ntangu yandi ta vutuka. Muntu yina ta kwenda kuzinga na nzo-tenta  sambu na kusadila Nzambi luzingu na yandi ya mvimba. Nzo-tenta vandaka kisika yina bantu vandaka kwenda kusambila Nzambi na ntangu yina. Yefte nungaka mvita. Keti nge me zaba muntu ya ntete yina basikaka na nzo na yandi ntangu yandi vutukaka na bwala na yandi?—

Ee, mwana na yandi ya nkento! Yandi vandaka mwana mosi kaka yina Yefte butaka, mpi ntangu yai tata na yandi fwete tinda yandi ntama. Diambu yai pesaka Yefte mawa mingi. Kansi kuvila ve nde, yandi salaka lusilu. Na mbala mosi, mwana na yandi tubaka nde: ‘Tata, sambu nge silaka Yehowa nge fwete zitisa lusilu yina.’

Mwana ya Yefte mpi waka mawa. Na nzo-tenta, yandi lendaka ve kukwela mpi kubuta. Kansi, yandi vandaka kibeni na mpusa ya kuzitisa lusilu ya tata na yandi mpi kusepedisa Yehowa. Sambu na yandi, kusadila Yehowa vandaka mfunu mingi kuluta kukwela to kubuta. Yo yina, yandi yambulaka nzo na bo mpi kwendaka kuzinga na nzo-tenta luzingu na yandi ya mvimba.

Nge ke yindula nde diambu yina yandi salaka sepedisaka tata na yandi mpi Yehowa?— Ee, yo sepedisaka bo! Mutindu mosi, kana nge ke lemfukila Yehowa mpi ke zola yandi, nge ta vanda bonso mwana ya Yefte. Nge mpi ta sepedisa mingi bibuti na nge ti Yehowa.