Mpasi ya nene ta vanda ntangu mosi ya mubulu ya ngolo yina bantu me monaka ntete ve. Na kutadila mambu yina Biblia tubaka dezia na ntwala, mpasi ya nene ta salama “na bilumbu ya nsuka,” to “na ntangu ya nsuka.” (2 Timoteo 3:1; Daniele 12:4, Bible en Kituba) Yo ta vanda “mpasi yina me bwaka ntete ve katuka na luyantiku ya lugangu yina Nzambi gangaka tii na ntangu yina, mpi yo ta bwa diaka ve.”​—Marko 13:19; Daniele 12:1; Matayo 24:21, 22.

Mambu yina ta salama na ntangu ya mpasi ya nene

•   Bo ta fwa dibundu ya luvunu. Bo ta fwa dibundu ya luvunu na kintulumukina. (Kusonga 17:1, 5; 18:9, 10, 21) Bangolo ya politiki ya Kimvuka ya Makanda Yina Me Vukanaka (organisation des nations unies [ONU]) bantu ta fwa dibundu ya luvunu sambu na kulungisa lukanu ya Nzambi.​—Kusonga 17:3, 15-18. a

•   Bo ta nwanisa dibundu ya kieleka. Kimvuka ya makanda yina Biblia ke binga “Gogi ya insi ya Magogi” na mbona-meso mosi yina Ezikiele monaka ta sala yonso sambu na kufwa bantu yina kele na dibundu ya kieleka. Kansi Nzambi ta tanina bantu yina ke sambilaka yandi sambu bo fwa bo ve.​—Ezekiele 38:1, 2, 9-12, 18-23.

•   Bo ta sambisa bantu ya ke zingaka na ntoto. Yezu ta sambisa bantu yonso ya ke zingaka na ntoto mpi yandi “ta kabula bantu na bimvuka zole, kaka mutindu ngungudi ke kabulaka mameme ti bankombo.” (Matayo 25:31-33) Yandi ta sambisa bantu na kutadila mambu yina bo salaka kana bo pesaka to ve maboko na “bampangi” na yandi disongidila, na bantu yina ta yala ti yandi na zulu.​—Matayo 25:34-46.

•   Bo ta vukisa bantu yina ta yala na Kimfumu. Bantu yina me kangamaka na Nzambi mpi yina Nzambi me ponaka sambu na kuyala ti Kristu ta vanda diaka ve na luzingu na ntoto mpi bo ta futumuka sambu na kuzinga na zulu.​—Matayo 24:31; 1 Bakorinto 15:50-53; 1 Batesalonika 4:15-17.

•   Armagedoni. “Bitumba [yai] ya kilumbu ya nene ya Nzambi Nkwa-Ngolo Yonso,” Biblia ke bingaka yo mpi “Kilumbu ya Yehowa.” (Kusonga 16:14, 16; Yezaya 13:9; 2 Piere 3:12) Bantu yina Kristu ta mona nde bo me fwana ve ta fwa. (Sefania 1:18; 2 Batesalonika 1:6-10) Ngidika ya politiki ya nsi-ntoto ya mvimba, yina Biblia ke monisa nde yo kele mbisi ya mfinda ya ba-ntu nsambwadi ta fwa mpi.​—Kusonga 19:19-21.

Mambu yina ta salama na nima ya mpasi ya nene

•   Bo ta kanga Satana ti bademo na yandi. Bo ta kanga Satana ti bademo na yandi. Wanzio mosi ya ngolo ta losa Satana ti bademo na yandi na “dibulu ya nda” disongidila yo ta vanda bonso nde bo me fwa sambu bo ta sala ve ata kima mosi. (Kusonga 20:1-3) Mutindu yina Satana ta vanda na dibulu yina ya nda kele bonso mutindu muntu yina bo me kanga na boloko ke vandaka; Satana ta kuka diaka ve kuvanda ti bupusi na mambu yina bantu ta sala.​—Kusonga 20:7.

•   Luyalu ya bamvula 1 000 ta yantika. Kimfumu ya Nzambi ta yantika kuyala sambu na bamvula 1 000 mpi yo ta natila bantu yonso mambote ya nene. (Kusonga 5:9, 10; 20:4, 6) “Kimvuka mosi ya nene ya bantu” yina bo lenda tanga ve ntalu na bo ta “katuka na mpasi ya nene,” bo ta guluka sambu na kumona mutindu luyalu ya bamvula 1 000 ta yantika kuyala ntoto.​—Kusonga 7:9, 14; Nkunga 37:9-11.