Ha ka lynnong ba la dep, ngi la ïa peit ïa ki dak ki shin kiba u Jisu u la ai. Kito ki dak ki pyni shai ba ka Hima U Blei ka la don ha bneng bad ba u Jisu Khrist u long u Syiem jong ka.

Ka Baibl ka ong ba mar ïa long syiem, u Jisu u la beh noh ïa u Soitan bad ïa ki angel bymman jong u na bneng sha pyrthei. Kane ka mut ba kim lah shuh ban leit sha bneng. Kane ka dei kawei na ki daw ba naduh u snem 1914 ka pyrthei ka la sdang ban sniew haduh katta katta.—Jingpynpaw 12:7, 9.

Wat la ka jinglong jingman jong ka pyrthei ka la nang sniew, hynrei u Jisu kum u Syiem jong ka Hima U Blei, u dang ïarap ïa ki briew ha satlak ka pyrthei lyngba ka kam ïalap. Ka hikai ïa ki briew ban bud ïa ki jinghikai jong ka Baibl ha ka jingim jong ki ba man la ka sngi. (Isaïah 2:2-4) Da ki phew lak ngut ki briew ki la nang ban kham pynbha ïa la ka ïing ka sem, ban pynïaid bha ïa la ki kam ki jam bad ban pyndonkam bha ïa ka pisa khlem da long mraw ïa ki. Kine ki briew ki ïoh ki jinghikai kiba pynmyntoi ïa ki mynta, bad ka pynkhreh ruh ïa ki ban long ki nongshong shnong kiba bha jong ka Hima U Blei.

Wat la u Jisu u la synshar ha bneng, dang don hi pat ki briew kiba synshar ha pyrthei. Hynrei, U Blei u la hukum ïa u Jisu: “To synshar ma me hapdeng ki nongshun jong me.” (Salm 110:2) Shen, u Jisu un sa pynjot thiaw ïa baroh kiba leh pyrshah, bad un sa pynlait noh ïa kito kiba kohnguh ïa u na ki jingjynjar.

Ha kata ka por, ka Hima U Blei kan sa leh eiei ban—

• Pynduh ïa ki niam ba hikai bakla. Ki niam kiba hikai bakla shaphang U Blei bad kiba pynjynjar ïa ka jingim jong ki briew kin sa duh noh. Ka Baibl ka ong ba ki niam ba hikai bakla ki long kum ka nuti. Bun kin sngew kyndit ïa ka jingshah pynjot jong ka.—Jingpynpaw 17:15, 16.

• Pynduh ïa ka jingsynshar u briew. Ka Hima U Blei kan sa leh eiei ban pynduh ïa baroh ki jingsynshar jong u briew.—Jingpynpaw 19:15, 17, 18.

• Weng ïa ki ’riewsniew. Kan jia aïu ïa kito kiba ïai leh ïa ki kam kiba sniew bad kiba kyntait ban kohnguh ïa U Blei? “Ïa ki bymman yn ot noh na ka ri.”—Proberb 2:22.

• Pynduh noh ïa u Soitan bad ïa ki angel bymman. U Soitan bad ki angel bymnan kin ym lah shuh ban ‘shukor ïa ki kynja bynriew.’—Jingpynpaw 20:3, 10.

Kane kan mut aïu ïa kito kiba pdiang ïa ka Hima U Blei?

Kum u Syiem ba synshar na bneng, u Jisu un leh kham bha shuh shuh ban ïa kino kino ki nongsynshar jong kane ka pyrthei. Yn don 144,000 ngut kiba shah jied na pyrthei ban synshar lang bad u. (Jingpynpaw 5:9, 10; 14:1, 3) Un pynthikna ban pyndep ïa ka mon jong U Blei ha kane ka pyrthei. Ka Hima U Blei kan leh aïu na ka bynta ki briew jong kane ka pyrthei?

• Kan Pynduh noh ïa ka jingpang bad ka jingïap. “Ki nongshong shnong ruh kin ym ong, nga pang,” bad ‘ka jingïap kan ym don shuh.’—Isaïah 33:24; Jingpynpaw 21:4.

• Kan ai ïa ka jingsuk bad ka jingshngaiñ bashisha. “Kan long kaba khraw ka jingsuk ki khun jong pha,” bad “kin ïashong uwei uwei baroh hapoh la u diengwaiñ bad hapoh la u diengdumbur; te ym don uban pynsheptieng ïa ki.”—Isaïah 54:13; Mikah 4:4.

• Kan ai ki kam kiba sngewhun. ‘Kiba la jied jong nga kin sngewhun ïa ka kam ki kti jong ki. Kin ym trei lehnohei.’—Isaïah 65:22, 23.

• Kan pynbha ïa ka mariang. “Ka ri khlaw bad ka jaka kynjah kin sngewbha, ka ri shyiap ruh kan shad kmen, bad kan phuh kum u tiew kulab.”—Isaïah 35:1.

• Kan hikai ïa ki briew kaei ba ki dei ban leh khnang ban ïoh im junom. “Kane te ka long ka jingim bymjukut, ba kin ïoh ithuh ïa me U Blei uba shisha tang ma me hi, bad ïa U Jisu Khrist, ïa uba me la phah.”—Ïoannis 17:3.

U Blei u kwah ba phin ïoh ïa kito ki jingkyrkhu. (Isaïah 48:18) Ka lynnong kaba bud kan batai ïa kaei kaba phi dei ban leh mynta khnang ba phin ïoh ïa kane ka lawei baphyrnai.