Ĩĩ. Aira a Jehova metĩkĩtie atĩ Bibilia yothe ‘ĩtongoretio nĩ roho wa Ngai na ĩrĩ ũguni.’ (2 Timotheo 3:16) Ũguo nĩ kuuga Kĩrĩkanĩro Kĩrĩa Gĩkũrũ na Kĩrĩkanĩro Kĩrĩa Kĩerũ, ta ũrĩa andũ aingĩ maciĩtaga. Kaingĩ Aira a Jehova metaga icunjĩ icio cia Bibilia Maandĩko ma Kĩhibirania na Maandĩko ma Gĩkristiano ma Kĩngiriki. Na njĩra ĩyo, tũkaga kuonania ta icunjĩ imwe cia Bibilia irĩ hĩtũke nĩ mahinda kana ta itangĩhũthĩka.

 Paulo aandĩkire ũũ atongoretio nĩ roho wa Ngai: “Maũndũ mothe marĩa maandĩkirũo tene maandĩkirũo marĩ ma gũtũruta.” (Aroma 15:4) Kwoguo Maandĩko ma Kĩhibirania nĩ makoragwo na ũhoro ũngĩtũteithia. Kwa ngerekano, nĩ matwĩraga maũndũ ma tene mangĩtũteithia na magatũhe ũtaaro ũngĩtũguna.

•   Maũndũ ma tene mangĩtũteithia. Maandĩko ma Kĩhibirania makoragwo na ũhoro wĩgiĩ ũũmbi na ũrĩa andũ maaingĩrire mehia-inĩ. Tũtarĩ na ũhoro ũcio, tũtingĩrĩ na macokio ma kwĩhokeka ma ciũria ta: Twaumire kũ? Andũ makuaga nĩkĩ? (Kĩambĩrĩria 2:7, 17) Ningĩ Maandĩko ma Kĩhibirania nĩ monanagia ũrĩa Jehova Ngai aarũmbũyanagia na andũ maacemanagia na moritũ na magakorũo na maũndũ ma kũmarehera gĩkeno o ta ithuĩ.—Jakubu 5:17.

•   Ũtaaro ũngĩtũguna. Mabuku ma Thimo na Kohelethu, marĩa makoragwo Maandĩko-inĩ ma Kĩhibirania, nĩ marĩ motaaro mega mũno megiĩ ũtũũro. Nĩ monanagia ũrĩa mũndũ angĩkorũo na famĩlĩ ĩrĩ na gĩkeno (Thimo 15:17), ũrĩa mũndũ angĩgĩa na ũigananĩru ũhoro-inĩ wĩgiĩ wĩra (Thimo 10:4; Kohelethu 4:6), na ũrĩa andũ ethĩ mangĩhũthĩra wĩthĩ wao na njĩra ĩkũmarehera gĩkeno (Kohelethu 11:9–12:1).

 Makĩria ma ũguo, no tũgunĩke tũngĩthoma Watho wa Musa ũrĩa ũrĩ mabuku-inĩ ma mbere matano ma Bibilia. O na gũtuĩka Akristiano matirĩ rungu rwa Watho ũcio, nĩ ũkoragwo na motaaro ma bata mangĩtũteithia gũkorũo na gĩkeno ũtũũro-inĩ.—Maũndũ ma Alawii 19:18; Gũcokerithia Maathani 6:5-7.