Ong-li nĩ Mũira wa Jehova bũrũri-inĩ wa Bulgaria. Nĩ eerutaga Bibilia na mũtumia ũmwe wetagwo Zlatka, no mũthuri wa mũtumia ũcio ndaanyitanagĩra wĩruti-inĩ ũcio. Ong-li ooigire ũũ: “Tũkĩarĩrĩria ũhoro wĩgiĩ ũtũũro wa famĩlĩ, nĩ ndatĩtĩrithirie bata wa kwĩra andũ arĩa tũhikanĩtie nao na ciana citũ atĩ nĩ tũmendete. Zlatka aandorire arĩ na kĩeha; aanjĩrire atĩ ndarĩ era mũthuri wake na mũirĩtu wao wa mĩaka kenda atĩ nĩ amendete!”

 Zlatka ooigire atĩrĩ, “Ngoragwo ndĩhaarĩirie gwĩka ũndũ o wothe nĩ ũndũ wao, no ndingĩhota kũmeera ciugo icio.” Agĩcoka akiuga ũũ, “Mami ndarĩ anjĩra atĩ nĩ anyendete, na cũcũ ndarĩ eera mami atĩ nĩ amwendete.” Ong-li nĩ oonirie Zlatka atĩ Jehova nĩ ooigire atĩ nĩ endete Jesu. (Mathayo 3:17) Agĩkĩra Zlatka ngoro ahoe Jehova ũndũ-inĩ ũcio na eigĩre muoroto wa kwĩra mũthuri wake na mũirĩtu wao atĩ nĩ amendete.

 Ong-li ooigire ũũ: “Thutha wa thikũ igĩrĩ, Zlatka nĩ aanjĩrire akenete atĩ nĩ aahoete Jehova amũteithie. Rĩrĩa mũthuri wake aainũkire, nĩ aamwĩrire atĩ nĩ eerutĩte kuuma Bibilia-inĩ atĩ nĩ ũndũ wa bata mũno mũtumia kũhe mũthuri wake gĩtĩo na kũmwenda. Na thutha wa gũtithia hanini, akĩmwĩra atĩ nĩ amwendete mũno! Rĩrĩa mũirĩtu wake aainũkire, Zlatka aamũhĩmbĩirie, na akĩmwĩra atĩ nĩ amwendete! Zlatka aanjĩrire ũũ: ‘Rĩu ndĩraigua ngenete mũno. Mĩaka ĩyo yothe ngoretwo ngĩhingĩrĩria ũrĩa njiguaga, no kũgerera ũteithio wa Jehova, rĩu nĩ ndĩrahota kwĩra andũ a famĩlĩ yakwa atĩ nĩ ndĩmendete.’”

 Ong-li aacokire akiuga atĩrĩ, “Thutha wa kiumia kĩmwe, nĩ ndacemanirie na mũthuri wa Zlatka na akĩnjĩra ũũ: ‘Andũ aingĩ maranjĩra atĩ Zlatka ndagĩrĩirũo kwĩruta Bibilia nawe, no hatarĩ nganja famĩlĩ itũ nĩ ĩgunĩkĩte mũno nĩ ũndũ wake kwĩruta Bibilia. Rĩu kĩhiko gitũ kĩrĩ na wendo na gĩkeno makĩria.’”