Athamaki wa Kerĩ 20:1-21
20 Matukũ-inĩ macio Hezekia nĩ aarwarire na aarĩ hakuhĩ gũkua.+ Nake mũnabii Isaia mũrũ wa Amozu agĩũka kũrĩ we akĩmwĩra, “Ũũ nĩguo Jehova oigĩte: ‘Arĩria andũ a nyũmba yaku, tondũ nĩ ũgũkua; ndũkũhona.’”+
2 Aigua ũguo, akĩhũgũra ũthiũ wake akĩrora rũthingo-inĩ na akĩambĩrĩria kũhoya Jehova akiuga ũũ:
3 “Jehova ndagũthaitha, ririkana ũrĩa ngoretwo ngĩtwarana nawe ndĩ mwĩhokeku na ngoro yakwa yothe, na ngeka maũndũ marĩa mega maitho-inĩ maku.”+ Hezekia akĩambĩrĩria kũrĩra na kĩrĩro kĩnene.
4 O na Isaia atakinyĩte nja ya gatagatĩ, kiugo kĩa Jehova gĩkĩmũkinyĩra akĩrũo atĩrĩ:+
5 “Coka wĩre Hezekia ũcio mũtongoria wa andũ akwa atĩrĩ, ‘Ũũ nĩguo Jehova Ngai wa Daudi ithe wanyu wa tene oigĩte: “Nĩ njiguĩte mahoya maku. Nĩ nyonete maithori maku.+ Nĩ ngũkũhonia.+ Mũthenya wa gatatũ nĩ ũkaambata ũthiĩ nyũmba ya Jehova.+
6 Nĩ nguongerera ũtũũro waku* mĩaka 15 na nĩ ngũkũhonokia na honokie itũũra rĩrĩ kuuma guoko-inĩ kwa mũthamaki wa Ashuri,+ na ngitĩre itũũra rĩrĩ nĩ ũndũ wakwa na nĩ ũndũ wa Daudi ndungata yakwa.”’”+
7 Isaia agĩcoka akiuga ũũ: “Rehei ngũmba ya ngũyũ iria hihe na nyũmithie.” Nao makĩmĩrehe na makĩmũhaka ihũha-inĩ, thutha ũcio akĩhona kahora kahora.+
8 Hezekia oorĩtie Isaia atĩrĩ: “Kĩmenyithia+ kĩa atĩ Jehova nĩ ekũhonia na atĩ mũthenya wa gatatũ nĩ ngaambata thiĩ nyũmba ya Jehova nĩ kĩrĩkũ?”
9 Nake Isaia agĩcokia akiuga: “Gĩkĩ nĩkĩo kĩmenyithia kuuma kũrĩ Jehova gĩa gũkuonia atĩ Jehova nĩ ekũhingia kiugo kĩrĩa oigĩte: Hihi ũkwenda kĩĩruru kĩrĩa kĩrĩ ngathĩ-inĩ* gĩthiĩ mbere makinya ikũmi kana gĩcoke na thutha makinya ikũmi?”+
10 Hezekia akiuga atĩrĩ: “Nĩ ũndũ mũhũthũ kĩĩruru gũthiĩ mbere makinya ikũmi no ti gũcoka na thutha makinya ikũmi.”
11 Nĩ ũndũ ũcio Isaia ũcio mũnabii agĩkaĩra Jehova, nake agĩtũma kĩĩruru kĩrĩa kĩarĩ ngathĩ-inĩ ya Ahazu gĩcoke na thutha makinya ikũmi thutha wa gũkorũo gĩikũrũkĩte makinya macio.+
12 Hĩndĩ ĩyo mũthamaki wa Babuloni, Berodaki-baladani mũrũ wa Baladani agĩtũma marũa na kĩheo kũrĩ Hezekia, tondũ nĩ aaiguĩte atĩ Hezekia aarĩ mũrwaru.+
13 Hezekia akĩamũkĩra* andũ acio maatũmĩtwo na akĩmonia nyũmba yake ya kũiga mũthithũ+—betha, thahabu, maguta ma balisamu na maguta mangĩ ma goro, kũrĩa indo ciake cia mbaara ciaigagwo, na kĩrĩa gĩothe kĩarĩ igĩna-inĩ ciake. Gũtirĩ kĩndũ o na kĩmwe Hezekia ataamonirie thĩinĩ wa nyũmba yake* na thĩinĩ wa wathani wake wothe.
14 Thutha ũcio mũnabii Isaia agĩũka kũrĩ Mũthamaki Hezekia akĩmũũria atĩrĩ: “Andũ acio moigire atĩa, na mekuumĩte kũ?” Nake Hezekia akĩmũcokeria ũũ: “Mekuumĩte bũrũri wa kũraya, bũrũri wa Babuloni.”+
15 Agĩcoka akĩmũũria ũũ: “Nĩ kĩĩ monire thĩinĩ wa nyũmba yaku?”* Hezekia akĩmũcokeria atĩrĩ: “Monire indo ciothe thĩinĩ wa nyũmba yakwa.* Gũtirĩ kĩndũ o na kĩmwe itanamonia thĩinĩ wa igĩna ciakwa.”
16 Isaia agĩkĩra Hezekia ũũ: “Thikĩrĩria kiugo kĩa Jehova,+
17 ‘Atĩrĩrĩ, matukũ nĩ maroka, rĩrĩa indo iria ciothe irĩ thĩinĩ wa nyũmba yaku,* o hamwe na iria ciothe maithe maku ma tene matũũrĩte maigĩte nginya ũmũthĩ igaakuuo itwarũo Babuloni.+ Gũtirĩ kĩndũ o na kĩmwe gĩgaatigara,’ ũguo nĩguo Jehova ekuuga.
18 ‘Na ariũ amwe aku mwene arĩa ũgaaciara nĩ magaakuuo+ na nĩ magaatuĩka anene a kwa mũthamaki thĩinĩ wa nyũmba ya mũthamaki wa Babuloni.’”+
19 Hĩndĩ ĩyo Hezekia akĩra Isaia atĩrĩ: “Kiugo kĩu kĩa Jehova waria nĩ kĩega.”+ Agĩcoka akiuga ũũ: “Nĩ wega angĩkorũo ũtũũro-inĩ wakwa* gũgũkorũo kũrĩ na thayũ na kwĩhandĩte wega.”*+
20 Ha ũhoro wa maũndũ macio mangĩ megiĩ Hezekia, hinya wake wothe na ũrĩa aathondekire karia ka maĩ+ na mũtaro na agĩtwara maĩ itũũra-inĩ,+ na githĩ ti maandĩke ibuku-inĩ rĩa maũndũ ma mahinda ma athamaki a Juda?
21 Thutha ũcio Hezekia akĩhurũkio hamwe na maithe make ma tene;+ na mũrũwe Manase+ agĩtuĩka mũthamaki ithenya rĩake.+
Tũũhoro twa magũrũ-inĩ
^ Ũkk., “matukũ maku.”
^ No kũhoteke makinya macio ma ngathĩ maahũthagĩrũo kũmenya mathaa, o ta thaa ya riũa.
^ Kana “nyũmba ya mũthamaki.”
^ Kana “agĩthikĩrĩria.”
^ Kana “nyũmba ya mũthamaki.”
^ Kana “nyũmba ya mũthamaki.”
^ Kana “nyũmba ya mũthamaki.”
^ Kana “ũhoro wa ma”
^ Ũkk., “matukũ-inĩ makwa.”
