Maũndũ Marĩa Meekirũo nĩ Atũmwo 1:1-26
1 Atĩrĩrĩ wee Theofilo, ibuku-inĩ rĩa mbere, nĩ ndandĩkire maũndũ mothe marĩa Jesu aambĩrĩirie gwĩka na kũrutana,+
2 nginya mũthenya ũrĩa ooirũo agĩtwarũo igũrũ,+ thutha wa kũhe atũmwo arĩa aathuurĩte motaaro atongoretio nĩ roho mũtheru.+
3 Thutha wa kũnyarirũo, nĩ eeyonithanirie kũrĩ o arĩ muoyo na njĩra nyingĩ itangĩkararĩka.+ Akĩonwo nĩo kwa ihinda rĩa matukũ 40, na nĩ aaragia ũhoro wĩgiĩ Ũthamaki wa Ngai.+
4 Na rĩrĩa aacemanagia nao aameeraga atĩrĩ: “Mũtikoime Jerusalemu,+ no ikarai mwetereire kĩrĩa Awa eeranĩire,+ kĩrĩa mwaiguire kuuma kũrĩ niĩ;
5 nĩ gũkorũo Johana, aabatithanagia na maĩ, no inyuĩ nĩ mũkaabatithio na roho mũtheru+ matukũ maigana ũna kuuma rĩu.”
6 Kwoguo rĩrĩa moonganĩte, makĩmũũria ũũ: “Mwathani, ihinda rĩrĩ nĩrĩo ũgũcokeria Isiraeli ũthamaki?”+
7 Nake akĩmeera atĩrĩ: “Ti ũhoro wanyu kũmenya mahinda kana imera iria Awa atuĩte na wathani wake mwene.+
8 No nĩ mũkaamũkĩra hinya rĩrĩa roho mũtheru ũgooka igũrũ rĩanyu,+ na nĩ mũgaatuĩka aira akwa+ thĩinĩ wa Jerusalemu,+ Judea guothe, Samaria,+ o nginya ituri ciothe cia thĩ.”+
9 Arĩkia kuuga maũndũ macio, akĩoywo agĩtwarũo igũrũ makĩĩyonagĩra, na akĩhumbĩrũo nĩ itu magĩtiga kũmuona.+
10 Na hĩndĩ o ĩyo maarorete igũrũ akĩambata-rĩ, arũme erĩ meehumbĩte nguo njerũ+ makĩrũgama o rĩmwe hakuhĩ nao
11 na makiuga: “Andũ aya a Galili, mũrũgamĩte mũrorete igũrũ nĩkĩ? Jesu ũcio muona oywo kuuma kũrĩ inyuĩ atwarũo igũrũ, agooka na njĩra o ta ĩyo muona agĩthiĩ nayo igũrũ.”
12 Thutha ũcio magĩcoka Jerusalemu+ moimĩte kĩrĩma-inĩ kĩrĩa gĩtagwo Kĩrĩma kĩa Mĩtamaiyũ, kĩrĩa kĩrĩ hakuhĩ na Jerusalemu, handũ ha rũgendo ta rwa mũthenya wa thabatũ.
13 Rĩrĩa maakinyire, magĩtonya nyũmba ya igũrũ ĩrĩa maaikaraga. Nao maarĩ Petero o hamwe na Johana na Jakubu na Andrea, Filipu na Toma, Batholomayo na Mathayo, Jakubu mũrũ wa Alufayo, Simoni ũrĩa warĩ kĩyo, na Judasi mũrũ wa Jakubu.+
14 Acio othe maahoyaga mategũtigithĩria marĩ na muoroto ũmwe, hamwe na atumia amwe+ na Mariamu nyina wa Jesu na ariũ a nyina na Jesu.+
15 Matukũ-inĩ macio Petero akĩrũgama gatagatĩ-inĩ ka ariũ a Ithe witũ (haarĩ na andũ* ta 120) na akiuga atĩrĩ:
16 “Athuri aya, ariũ a Ithe witũ, nĩ haarĩ bata ciugo iria ciarathirũo nĩ Daudi atongoretio nĩ roho mũtheru ciĩgiĩ Judasi ihinge,+ o ũcio watongoririe arĩa maanyitire Jesu.+
17 Nĩ gũkorũo aarĩ ũmwe witũ+ na akĩgĩa na itemi thĩinĩ wa ũtungata ũyũ.
18 (Mũndũ ũcio, nĩ aagũrire mũgũnda na mbeca itarĩ cia ũthingu,+ nake akĩgwa thĩ na mũtwe, nda yake ĩgĩtathũka,* namo mara make makiuma.+
19 Naguo ũndũ ũcio ũkĩmenyeka nĩ aikari othe a Jerusalemu, kwoguo mũgũnda ũcio ũgĩtwo Akelidama na rũthiomi rwao, ũguo nĩ kuuga, “Mũgũnda wa Thakame.”)
20 Nĩ ũndũ nĩ kwandĩke ibuku-inĩ rĩa Thaburi atĩrĩ, ‘Gĩikaro gĩake nĩ gĩtuĩke kũndũ gũtiganĩrie, na kĩroaga mũndũ wa gũikaraga kuo,’+ na ‘Wĩra wake arĩ mũrori nĩ ũheo mũndũ ũngĩ.’+
21 Nĩ ũndũ ũcio nĩ kwagĩrĩire atĩ harĩ andũ arĩa maatwaranaga hamwe na ithuĩ hĩndĩ ĩrĩa yothe Mwathani Jesu aarutaga mawĩra make* gatagatĩ-inĩ gaitũ,
22 kuuma rĩrĩa aabatithirio nĩ Johana+ nginya mũthenya ũrĩa ooirũo kuuma kũrĩ ithuĩ,+ mũndũ ũmwe wa acio nĩ agĩrĩirũo gũtuĩka mũira wa kũriũka kwa Jesu hamwe na ithuĩ.”+
23 Nĩ ũndũ ũcio magĩthuura andũ erĩ, Jusufu ũrĩa wetagwo Barasaba, ũrĩa ningĩ wetagwo Jusito, marĩ na Mathia.
24 Magĩcoka makĩhoya makiuga: “Atĩrĩrĩ, wee Jehova,* o wee ũĩ ngoro cia andũ othe,+ onania nĩ ũrĩkũ gatagatĩ ka andũ aya erĩ ũthuurĩte
25 nĩguo aheo ũtungata ũyũ na atuĩke mũtũmwo, ũndũ ũrĩa Judasi aatiganĩirie agĩthiĩ handũ hake mwene.”+
26 Magĩgĩcuka mĩtĩ nĩ ũndũ wao,+ na mũtĩ ũkĩgwĩra Mathia, na agĩtaranĩrio* hamwe na atũmwo arĩa 11.
Tũũhoro twa magũrũ-inĩ
^ Kana “kĩrĩndĩ kĩa andũ.”
^ Kana “agĩtathũka na gatagatĩ.”
^ Ũkk., “aaingĩraga na akoima.”
^ Rora Ũhoro Muongerere A5.
^ Kana “agĩturanĩrũo,” ũguo nĩ kuuga, akĩonwo atariĩ o ta acio angĩ 11.
