Maũndũ Marĩa Meekirũo nĩ Atũmwo 5:1-42
5 O na kũrĩ ũguo, mũndũ ũmwe wetagwo Anania na mũtumia wake Safira nĩ meendirie mũgũnda wao.
2 No we akĩĩigĩra mbeca imwe na hitho mũtumia wake akĩmenyaga, na agĩtwara iria ciatigarire agĩciiga magũrũ-inĩ ma atũmwo.+
3 Petero akĩmũũria atĩrĩ: “Anania, wĩtĩkĩririe Shaitani akũhe ũcamba wa kũheenia+ roho mũtheru+ nĩkĩ weigĩra mbeca imwe cia mũgũnda na hitho?
4 Hĩndĩ ĩrĩa ũtarendetie mũgũnda ũcio-rĩ, githĩ ndũrarĩ waku? Na thutha wa kũwendia-rĩ, githĩ mbeca itirarĩ o ciaku? Nĩ kĩĩ gĩgĩtũmĩte wĩcirie ũndũ ũyũ ngoro-inĩ? Ti andũ ũheenetie, no nĩ Ngai.”
5 Rĩrĩa Anania aaiguire ciugo icio, akĩgwa thĩ na agĩkua. Na arĩa othe maaiguire ũhoro ũcio makĩiyũrũo nĩ guoya mũnene.
6 Nao anake makĩrũgama, makĩmũthaya na itambaya, makĩmũruta nja, makĩmũthika.
7 Thutha wa mathaa ta matatũ ũguo-rĩ, mũtumia wake agĩũka, atekũmenya ũrĩa gwathiĩte na mbere.
8 Petero akĩmũũria: “Ta njĩĩra atĩrĩ, mbeca ici nĩcio inyuerĩ mũrendirie mũgũnda?” Nake akiuga: “Ĩĩ nĩcio.”
9 Nĩ ũndũ ũcio Petero akĩmũũria ũũ: “Mũretĩkanĩirie inyuerĩ kũgeria roho wa Jehova* nĩkĩ? Atĩrĩrĩ, magũrũ ma arĩa maathika mũthuriguo marĩ mũrango-inĩ, na nĩ megũkũruta nja.”
10 O hĩndĩ ĩyo, akĩgwa thĩ magũrũ-inĩ ma Petero na agĩkua. Rĩrĩa anake acio maatonyire, magĩkora akuĩte, makĩmũruta nja makĩmũthika hakuhĩ na harĩa maathikĩte mũthuriwe.
11 Nĩ ũndũ ũcio kĩũngano gĩothe gĩkĩiyũrũo nĩ guoya mũnene o hamwe na arĩa othe maaiguire maũndũ macio.
12 Ningĩ-rĩ, atũmwo nĩ maathiire na mbere kũringĩra andũ ciama nyingĩ na kũmekĩra maũndũ maingĩ ma magegania;*+ na othe nĩ maacemanagia hamwe Gĩthaku-inĩ gĩa Suleimani.+
13 No rĩrĩ, harĩ andũ arĩa angĩ, gũtirĩ mũndũ o na ũmwe warĩ na ũmĩrĩru wa kũnyitanĩra nao; o na kũrĩ ũguo, andũ nĩ maamagaathagĩrĩria mũno.
14 Makĩria ma ũguo-rĩ, arĩa meetĩkagia Mwathani makĩongerereka o kuongerereka, arũme na atumia aingĩ.+
15 Maatwaraga arwaru nginya njĩra-inĩ iria nene na makamaiga kuo mamakometie tũrĩrĩ-inĩ na mĩgeka-inĩ nĩguo Petero akĩhĩtũka, na arĩ kĩĩruru gĩake kĩhutie amwe ao.+
16 Ningĩ andũ aingĩ kuuma matũũra marĩa maarigicĩirie Jerusalemu magĩthiĩ na mbere gũka makuuĩte arwaru na arĩa maathĩnagio nĩ maroho moru, na othe makĩhonio.
17 No mũthĩnjĩri-Ngai ũrĩa mũnene akĩrũgama marĩ hamwe na arĩa othe maarĩ nake, arĩa maarĩ a gĩkundi kĩa nyamũkano kĩa Asadukai, makĩiyũrũo nĩ ũiru.
18 Makĩnyita atũmwo acio na makĩmaikia njera ya mũingĩ.+
19 No ũtukũ-rĩ, mũraika wa Jehova* akĩhingũra mĩrango ya njera,+ akĩmoimia nja akĩmeera ũũ:
20 “Thiĩi mũrũgame thĩinĩ wa hekarũ, mũthiĩ na mbere kwĩra andũ ũhoro wothe wĩgiĩ muoyo ũyũ.”
21 Rĩrĩa maaiguire ũguo, makĩingĩra hekarũ-inĩ rũcinĩ gũgĩthererũka na makĩambĩrĩria kũrutana.
Na rĩrĩa mũthĩnjĩri-Ngai ũrĩa mũnene na arĩa maarĩ hamwe nake maakinyire, magĩcokanĩrĩria Sanhedrini na athuri othe a ariũ a Isiraeli, na magĩtũmana njera nĩguo atũmwo marehwo hau.
22 No rĩrĩa thigari ciakinyire, itiakorire atũmwo kũu njera. Nĩ ũndũ ũcio igĩcokia ũhoro,
23 ikiuga atĩrĩ: “Tũkorire njera ĩhingĩtwo na ĩrĩ nangĩre, na arangĩri mekũrũgamĩte mĩrango-inĩ, no rĩrĩa tũhingũrire, tũtinona mũndũ o na ũmwe thĩinĩ.”
24 Na rĩrĩ, rĩrĩa mũnene wa hekarũ hamwe na anene a athĩnjĩri-Ngai maaiguire ciugo icio, makĩmaka nĩ ũndũ wa kũrigwo nĩ ũrĩa kũngĩathiire.
25 No mũndũ ũmwe agĩũka akĩmeera ũũ: “Andũ arĩa mũraikĩtie njera marĩ thĩinĩ wa hekarũ marũgamĩte makĩruta andũ.”
26 Nake mũnene ũcio wa hekarũ agĩthiĩ hamwe na thigari ciake na makĩmarehe thĩinĩ hatarĩ ngucanio, nĩ gũkorũo nĩ meetigagĩra kũhũũrũo nĩ andũ na mahiga.+
27 Makĩmaingĩria na makĩmarũgamia mbere ya Sanhedrini. Nake mũthĩnjĩri-Ngai ũrĩa mũnene akĩmoria ciũria
28 na akĩmeera atĩrĩ: “Twamwathire mũtige kũhunjia na rĩĩtwa rĩrĩ,+ no rĩu mũiyũrĩtie ũrutani wanyu Jerusalemu na nĩ mwĩhotorete gũtũcokereria thakame ya mũndũ ũcio.”+
29 Nake Petero na atũmwo acio angĩ magĩcokia makiuga: “No mũhaka twathĩkĩre Ngai arĩ we mũtongoria, no ti andũ.+
30 Ngai wa maithe maitũ ma tene nĩ aariũkirie Jesu, ũrĩa inyuĩ muoragire, mũkĩmũcuuria mũtĩ-inĩ.+
31 Ngai nĩ aamũtũũgĩririe guoko-inĩ gwake kwa ũrĩo+ arĩ we Mũtongoria Ũrĩa Mũnene+ na Mũhonokia,+ nĩguo Isiraeli merire na moherũo mehia mao.+
32 Na ithuĩ tũrĩ aira a maũndũ macio,+ o na roho mũtheru,+ ũrĩa Ngai aheete arĩa mamwathĩkagĩra arĩ we mũtongoria.”
33 Rĩrĩa maaiguire ũguo, makĩrakara* mũno na makĩenda kũmoraga.
34 No Mũfarisai ũmwe wetagwo Gamalieli,+ warĩ mũrutani wa Watho waheetwo gĩtĩo nĩ andũ othe akĩrũgama mbere ya Sanhedrini, na agĩathana atĩ andũ acio mambe moimio nja hanini.
35 Agĩcoka akĩmeera atĩrĩ: “Athuri aya a Isiraeli, mwĩmenyererei ũrĩa mũrenda gwĩka andũ aya.
36 Kwa ngerekano-rĩ, matukũ mahĩtũku Theuda aarũgamire akiugaga atĩ we nĩ mũndũ wa bata, na arũme ta 400 magĩtuĩka a kĩama gĩake. No nĩ ooragirũo, nao arĩa othe maamũrũmagĩrĩra makĩhurunjũka na magĩkorũo matarĩ kĩene.
37 Thutha wake gũkiumĩra Judasi ũrĩa wa Galili matukũ-inĩ marĩa andũ meeyandĩkithagia, na akĩgucĩrĩria andũ matuĩke arũmĩrĩri ake. Ũcio o nake agĩkua, nao arĩa othe maamũrũmagĩrĩra makĩhurunjũka.
38 Nĩ ũndũ ũcio-rĩ, ngũmwĩra atĩrĩ ũhoro-inĩ ũyũ, mũtigetonyererie maũndũ-inĩ ma andũ aya, tiganai nao. Tondũ-rĩ, angĩkorũo mũbango ũyũ kana wĩra ũyũ uumanĩte na andũ, no ũgũtoorio;
39 no angĩkorũo uumanĩte na Ngai, mũtikũmatooria.+ Kwaga ũguo, mwahota gũkorũo mũrarũa na Ngai we mwene.”+
40 Nao magĩathĩkĩra ũtaaro wake, magĩta atũmwo acio, makĩmahũũra,+ na makĩmaatha matige kwaria na rĩĩtwa rĩa Jesu, magĩcoka makĩmarekereria.
41 Nao makĩehera mbere ya Sanhedrini makenete+ tondũ wa kuonwo matagĩrĩire gũtĩo nĩ ũndũ wa rĩĩtwa rĩa Jesu.
42 Na magĩthiĩ na mbere mategũtigithĩria mũthenya o mũthenya kũrutana na kũhunjia ũhoro ũrĩa mwega wĩgiĩ Kristo Jesu+ thĩinĩ wa hekarũ na nyũmba kwa nyũmba.+
Tũũhoro twa magũrũ-inĩ
^ Rora Ũhoro Muongerere A5.
^ Kana “morirũ.”
^ Rora Ũhoro Muongerere A5.
^ Kana “makĩigua maatemwo.”
