Marũa Kũrĩ Aefeso 2:1-22
2 Ningĩ-rĩ, Ngai nĩ aatũmire mũkorũo mũrĩ muoyo, o na gũtuĩka mwarĩ akuũ nĩ ũndũ wa mahĩtia na mehia manyu,+
2 marĩa mwarũmagĩrĩra hĩndĩ ĩmwe kũringana na mũtabarĩre wa maũndũ wa* thĩ ĩno,+ kũringana na mũtongoria wa wathani wa rĩera,+ o roho ũrĩa+ rĩu ũrutaga wĩra thĩinĩ wa ariũ arĩa matarĩ athĩki.
3 Ĩni, hĩndĩ ĩmwe ithuothe twatũũraga gatagatĩ-inĩ kao tũgathiaga kũringana na merirĩria ma mĩĩrĩ itũ,+ tũkahingagia wendi wa mĩĩrĩ na wa meciria maitũ,+ na kuuma gũciarũo twarĩ ciana cia kũrakarĩrũo+ o ta andũ acio angĩ.
4 No Ngai, tondũ nĩ arĩ tha nyingĩ,+ na nĩ ũndũ wa wendo wake mũingĩ ũrĩa aatwendire naguo,+
5 nĩ aatũmire tũkorũo tũrĩ muoyo hamwe na Kristo o na rĩrĩa twarĩ akuũ nĩ ũndũ wa mehia+—kũgerera ũtugi mũnene nĩ mũhonoketio.
6 Makĩria ma ũguo, nĩ aatũriũkirie hamwe nake na agĩtũikaria thĩ hamwe kũrĩa igũrũ tũrĩ na ũiguano na Kristo Jesu,+
7 nĩguo atĩ hĩndĩ ya mĩtabarĩre ya maũndũ ĩrĩa ĩroka* akoonania ũtonga ũkĩrĩrĩirie wa ũtugi wake mũnene kũgerera wega wake harĩ ithuĩ arĩa tũrĩ na ũiguano na Kristo Jesu.
8 Kũgerera ũtugi ũcio mũnene nĩ mũhonoketio nĩ ũndũ wa wĩtĩkio,+ na ũcio ti ũndũ uumanĩte na inyuĩ ene; ĩndĩ, nĩ kĩheo kuuma kũrĩ Ngai.
9 Aca, ti ũndũ uumanĩte na ciĩko,+ nĩgetha mũndũ o na ũrĩkũ ndakagĩe na gĩtũmi gĩa kwĩraha.
10 Ithuĩ tũrĩ wĩra wa moko ma Ngai na tuombirũo+ tũrĩ na ũiguano na Kristo Jesu+ nĩ ũndũ wa ciĩko njega, iria Ngai aatuĩte o mbere nĩguo tũciĩkage.
11 Nĩ ũndũ ũcio ririkanai atĩ nĩ harĩ hĩndĩ inyuĩ, andũ a ndũrĩrĩ na njĩra ya kĩĩmwĩrĩ, mwetagwo “andũ matarĩ aruu” nĩ “arĩa aruu” kũrua kwa mwĩrĩ kũgerera moko ma andũ.
12 Hĩndĩ ĩyo mũtiarĩ na Kristo, mwaamũranĩtio na rũrĩrĩ rwa Isiraeli, mwarĩ ageni ũhoro-inĩ wa irĩkanĩro cia kĩĩranĩro;+ mũtiarĩ na kĩĩrĩgĩrĩro na mũtiarĩ na Ngai thĩinĩ wa thĩ.+
13 No rĩu mũrĩ na ũiguano na Kristo Jesu, inyuĩ arĩa mwarĩ kũraya mũno nĩ mũkĩte hakuhĩ kũgerera thakame ya Kristo.
14 Nĩ gũkorũo nĩwe thayũ witũ,+ o we watuire ikundi icio cierĩ gĩkundi kĩmwe+ na akĩmomora rũthingo rũrĩa rwacihakanĩtie.+
15 Kũgerera mwĩrĩ wake nĩ aaniinire ũthũ, Watho ũrĩa warĩ na maathani na mawatho, nĩgetha ikundi icio cierĩ irĩ na ũiguano nake we mwene acitue mũndũ ũmwe mwerũ+ na arehe thayũ,
16 na aiguithanie biũ ikundi icio cierĩ cia andũ thĩinĩ wa mwĩrĩ ũmwe harĩ Ngai kũgerera mũtĩ wa kũnyarirĩrũo,*+ tondũ kũgerera we mwene, nĩ ooragĩte biũ ũthũ ũcio.+
17 Nake agĩũka na akĩhunjia ũhoro ũrĩa mwega wa thayũ kũrĩ inyuĩ mwarĩ kũraya mũno, na thayũ kũrĩ arĩa maarĩ hakuhĩ,
18 nĩ gũkorũo kũgerera we, ithuĩ ikundi icio cierĩ cia andũ, nĩ tũgĩĩte na wĩyathi wa gũthiĩ harĩ Ithe witũ kũgerera roho o ũmwe.
19 Nĩ ũndũ ũcio-rĩ, mũtirĩ ageni kana andũ a kũngĩ rĩngĩ,+ ĩndĩ mũrĩ raiya+ hamwe na arĩa aamũre na mũrĩ andũ a nyũmba ya Ngai,+
20 na mwakĩtwo igũrũ rĩa mũthingi wa atũmwo na anabii,+ na Kristo Jesu we mwene nĩwe ihiga rĩrĩa rĩa mũthingi rĩa kona.+
21 Mwako ũcio wothe, ũrĩa ũrĩ na ũiguano hamwe nake o na ũkanyitithanio wega,+ nĩ ũrakũra ũgatuĩka hekarũ theru ya Jehova.*+
22 O na inyuĩ, arĩa mũrĩ na ũiguano nake, nĩ mũrakwo hamwe mũtuĩke handũ ha Ngai ha gũikara kũgerera roho.+
Tũũhoro twa magũrũ-inĩ
^ Kana “mĩthiĩre ya.”
^ Kana “mahinda marĩa maroka.” Rora Ũthathaũri wa Ciugo.
^ Rora Ũthathaũri wa Ciugo.
^ Rora Ũhoro Muongerere A5.
