Ayubu 3:1-26
3 Thutha ũcio nĩguo Ayubu aambĩrĩirie kwaria na kũruma mũthenya ũrĩa aaciarirũo.*+
2 Akiuga atĩrĩ:
3 “Mũthenya ũrĩa ndaciarirũo ũrothira,+O na ũtukũ ũrĩa kwerirũo atĩrĩ: ‘Mũtumia nĩ oha nda ya mwana wa kahĩĩ!’
4 Mũthenya ũcio ũrotuĩka o nduma.
Ngai arĩ igũrũ aroaga gũtindanĩra naguo;Na ũtheri ũroaga kũwarĩra.
5 Mũthenya ũcio ũrokĩĩnyitĩrũo nĩ nduma ĩrĩa ndumanu.*
Itu rĩa mbura rĩroikara igũrũ rĩaguo.
Kĩrĩa gĩothe gĩtũmaga mũthenya ũgĩe nduma kĩrotũma wĩtigĩre.
6 Ũtukũ ũcio ũrohumbĩrũo nĩ nduma nene;+Ndũkanakenanĩre na thikũ iria ingĩ cia mwaka,Na ũroaga gũtaranĩrio na thikũ cia mĩeri.
7 Atĩrĩrĩ, ũtukũ ũcio ũrotuĩka thata;Na ndũkanoigwo ngemi.
8 Arĩa marumaga mũthenya maroũruma,O acio mangĩhota kwarahũra Leviathani.*+
9 Njata ciaguo cia rũcinĩ irogĩa nduma;Ũroikara wetereire gũkĩe na kwage gũkĩa,Na ũroaga kuona ũtheri wa rũcinĩ.
10 Nĩ gũkorũo ndwahingire mĩrango ya nda ya maitũ;+Na ndwagirĩrĩirie maitho makwa matikone thĩna.
11 Ndagire gũkua o ndaciarũo nĩkĩ?
Ndagire gũthira o ndoima nda nĩkĩ?+
12 Maitũ aanyamũkĩrire maru-inĩ make nĩkĩNa akĩnyongithia nyondo ciake?
13 Nĩ gũkorũo rĩu ingĩkomete itegũthĩnio;+Ingĩrĩ toro hurũkĩte+
14 Hamwe na athamaki a thĩ na ataarani ao,Arĩa meeyakĩire kũndũ kũrĩa rĩu kwanangĩkĩte,*
15 Kana hamwe na atongoria arĩa maarĩ na thahabu,Arĩa nyũmba ciao ciaiyũire betha.
16 Kana rĩrĩ, ndagire kũhaana ta kĩhuno nĩkĩ,O ta ciana iria itarĩ ciona ũtheri?
17 Kũu nginya andũ arĩa aganu nĩ matigĩte gũtangĩka;Arĩa anogu nĩ kũhurũka mahurũkĩte.+
18 Kũu andũ arĩa mohetwo nĩ makoragwo na wĩyathi;Matiiguaga mũgambo wa ũrĩa ũmarutithagia wĩra kĩa hinya.
19 Arĩa anene na arĩa anini makoragwo maiganaine marĩ kũu,+Nayo ngombo ndĩkoragwo rungu rwa mwathi wayo rĩngĩ.
20 Mũndũ ũrĩa ũranyamarĩka-rĩ, amũheaga ũtheri nĩkĩNao arĩa marĩ na mĩtangĩko mĩnene akamahe muoyo?+
21 Nĩ kĩĩ gĩtũmaga merirĩrie gĩkuũ, no gĩtiũkaga?+
Magĩcaragia gũkĩra ũrĩa indo iria hithe cia goro icaragio,
22 O acio makenaga mũno,Magakena rĩrĩa mathiĩ mbĩrĩra-inĩ.
23 Nĩ kĩĩ gĩtũmaga ahe mũndũ ũhĩtĩtie njĩra ũtheri,O ũcio Ngai arigicĩirie akamũhingĩrĩria?+
24 Nĩ gũkorũo handũ ha kũrĩa irio nĩ gũcakaya njakayaga,+Nakuo gũcaya gwakwa+ gũitĩkaga o ta maĩ.
25 Nĩ gũkorũo ũndũ ũrĩa ndĩtigagĩra nĩ ũngorete,Na ũndũ ũrĩa ũmakagia nĩ ũnginyĩire.
26 Ndikoragwo na thayũ, kana ngahoorera, o na kana ngahurũka,Thĩna noguo ũngoraga.”
Tũũhoro twa magũrũ-inĩ
^ Ũkk., “kũruma mũthenya wake.”
^ Kana “nduma na kĩĩruru gĩa gĩkuũ.”
^ Gwĩciragĩrio atĩ nyamũ ĩyo nĩ mamba (kĩng’ang’i) kana nyamũ ĩngĩ nene mũno na ĩrĩ hinya ya maĩ-inĩ.
^ Kana hihi, “arĩa meeyakĩire kũndũ gũtiganĩrie.”
