Jeremia 6:1-30
6 Atĩrĩrĩ inyuĩ ariũ a Benjamini, mwĩtharei mwehere Jerusalemu.
Huuhai coro+ mũrĩ Tekoa;+Akiai kĩmenyithia kĩa mwaki kũu Bethi-hakeremu!
Nĩ gũkorũo kũrĩ thĩna ũroka kuuma mwena wa rũgongo, mwanangĩko mũnene.+
2 Mwarĩ wa Zayuni ahaana ta mũtumia mũthaka na ũtũnĩtio.+
3 Arĩithi nĩ magooka marĩ na ndũũru ciao.
Nĩ makaamba hema ciao mamũthiũrũrũkĩrie kũndũ guothe,+O ũmwe wao akĩrĩithia rũũru rwake.+
4 “Mwĩhaarĩriei nĩ ũndũ wa* mbaara mũmũũkĩrĩre!
Ũkĩrai, nĩ tũmũtharĩkĩrei mũthenya gatagatĩ!”
“Kaĩ tũrĩ na haaro-ĩ, tondũ nĩ kũratuka,Nĩ gũkorũo ciĩruru cia hwaĩ-inĩ irathiĩ ikĩraihaga!”
5 “Ũkĩrai, nĩ tũmũtharĩkĩrei ũtukũNa twanange nyũmba ciake iria ndaya na igũrũ irĩ na ũgitĩri.”+
6 Nĩ gũkorũo ũũ nĩguo Jehova mũnene wa ita ekuuga:
“Temai mĩtĩ na mũthondeke hĩba ya kũrigicĩria mũũkĩrĩre Jerusalemu.+
Rĩu nĩ itũũra arĩ o mũhaka rĩciirithio;Thĩinĩ warĩo kũiyũire ũhinyanĩrĩria.+
7 O ta ũrĩa irima riumaga maĩ mahehu,No taguo itũũra rĩu riumaga waganu.
Thĩinĩ warĩo nĩ kũiguagwo maũndũ ma ũhinya na ma mwanangĩko;+Mũrimũ na ihũũra ikoragwo mbere yakwa hingo ciothe.
8 Atĩrĩrĩ wee Jerusalemu, athĩkĩra mũkaana, kwaga ũguo nĩ ngũkweherera nĩ ũndũ wa kũnjiria ngoro;+Nĩ ngũtũma ũtuĩke kũndũ gũtiganĩrie, bũrũri ũtaikaragwo nĩ andũ.”+
9 Jehova mũnene wa ita ekuuga ũũ:
“Nĩ makaahaara matigari ma Isiraeli biũ o ta thabibũ cia mũthia mũthabibũ-inĩ.
Hĩtũkia guoko gwaku rĩngĩ o ta mũndũ ũracokanĩrĩria thabibũ kuuma mĩthabibũ-inĩ.”
10 “Hihi nũũ njagĩrĩirũo kwarĩria na ndĩmũhe mũkaana?
Nũũ ũgũthikĩrĩria?
Atĩrĩrĩ, matũ mao nĩ mahinge,* nĩguo matikaigue.+
Atĩrĩrĩ, kiugo kĩa Jehova nĩ gĩtuĩkĩte kĩndũ gĩa kũnyararũo nĩo;+Matigĩkenagĩra.
11 Nĩ ũndũ ũcio, njiyũrĩtwo nĩ mang’ũrĩ ma Jehova,Na nĩ nogetio nĩ kũmahingĩrĩria.”+
“Maitũrũrĩre mwana ũrĩa ũrĩ barabara-inĩ,+Ũmaitũrũrĩre ikundi cia andũ ethĩ arĩa macemanĩtie hamwe.
Othe nĩ makaanyitwo, mũthuri hamwe na mũtumia wake,Athuri akũrũ o hamwe na arĩa akũrũ mũno.*+
12 Nyũmba ciao nĩ ikaaneanwo kũrĩ andũ angĩ,Hamwe na mĩgũnda yao na atumia ao.+
Nĩ gũkorũo nĩ ngaatambũrũkia guoko gwakwa njũkĩrĩre aikari a bũrũri ũcio,” ũguo nĩguo Jehova ekuuga.
13 “Tondũ o ũmwe wao, kuuma ũrĩa mũnini nginya ũrĩa mũnene, areguna na uumithio ũtarĩ wa kĩhooto;+Kuuma mũnabii nginya mũthĩnjĩri-Ngai, o mũndũ areka maũndũ ma ũtunyani.+
14 Na mageragia kũhonia nguraro ya* andũ akwa o igũrũ tu, makoiga ũũ,‘Kũrĩ na thayũ! Kũrĩ na thayũ!’
Na hĩndĩ ĩyo gũtirĩ na thayũ.+
15 Hihi nĩ maconokaga nĩ ũndũ wa maũndũ marĩ magigi marĩa mekĩte?
Maticonokaga o na hanini!
O na matiũĩ kũigua thoni nĩ kuuga atĩa!+
Nĩ ũndũ ũcio, makaagwa gatagatĩ-inĩ ka arĩa magwĩte.
Rĩrĩa ngaamaherithia nĩ makaahĩngĩka,” ũguo nĩguo Jehova oigĩte.
16 Jehova oigĩte ũũ:
“Rũgamai magomano-inĩ ma njĩra muone.
Ũrĩrĩriai ũhoro wa njĩra iria cia tene,Ũrĩrĩriai kũrĩa njĩra ĩrĩa njega ĩrĩ, na mũmĩgerere,+Nĩguo mwĩyonere* ũhurũko.”
No o moigaga atĩrĩ: “Tũtikũmĩgerera.”+
17 “Na niĩ ngĩamũra arangĩri+ na makiuga atĩrĩ,‘Thikĩrĩriai mũgambo wa coro!’”+
No o makiuga ũũ: “Tũtigũthikĩrĩria.”+
18 “Nĩ ũndũ ũcio, thikĩrĩriai inyuĩ ndũrĩrĩ!
Inyuĩ kĩrĩndĩ gĩkĩ, menyaiŨndũ ũrĩa ũkaamakora.
19 Wee thĩ-rĩ, thikĩrĩria!
Nĩ ngũrehera andũ aya thĩna+
Ũrĩ maciaro ma njama ciao ene,Nĩ gũkorũo matiathikĩrĩirie ciugo ciakwaNa nĩ maaregire watho* wakwa.”
20 “Niĩ ndĩ na bata ũrĩkũ na ũbani ũcio mũrarehe kuuma ShebaNa karamathi* ĩyo ĩrĩ cama kuuma bũrũri wa kũraya?
Magongona manyu magima ma njino matingĩtĩkĩrĩka,Na magongona manyu matingenagia.”+
21 Nĩ ũndũ ũcio, ũũ nĩguo Jehova ekuuga:
“Nĩ ngũigĩra andũ aya mĩhĩnga,Na nĩ makaahĩngwo nĩyo,Maithe hamwe na ariũ ao,Mũndũ wa itũũra o hamwe na mũratawe,Na othe nĩ magaathira.”+
22 Jehova oigĩte ũũ:
“Atĩrĩrĩ, andũ nĩ maroka moimĩte bũrũri wa mwena wa rũgongo,Na rũrĩrĩ rũnene nĩ rũkaarahũrũo kuuma icigo-inĩ iria irĩ kũraya mũno thĩinĩ wa thĩ.+
23 Nĩ makaanyita ũta na itimũ.
Maticayanagĩra na matigaakorũo na tha.
Mũgambo wao ũkaaruruma o ta iria,Na mathiaga matwarithĩtie mbarathi.+
Mebangĩte nĩ ũndũ wa mbaara o ta mũndũ wa mbaara nĩguo magũũkĩrĩre, wee mwarĩ wa Zayuni.”
24 Nĩ tũiguĩte ũhoro ũcio.
Moko maitũ nĩ morĩtwo nĩ hinya;+Nĩ tũgĩĩte na mĩtangĩko,Tũkagĩa na ruo ta rwa mũtumia akĩgĩa mwana.+
25 Ndũkoime ũthiĩ mũgũnda-inĩ,Na ndũkagerere njĩra-inĩ,Nĩ gũkorũo thũ ĩrĩ na rũhiũ rwa njora;Kũrĩ na guoya kũndũ guothe.
26 Wee mwarĩ wa andũ akwa,Wĩhumbe nguo ya ikũnia+ na wĩgaragarie mũhu-inĩ.
Cakaya ta ũrĩa mũrũ wa mũmwe acakayagĩrũo, na ruo rũingĩ,+Nĩ gũkorũo mũniinani nĩ agaatũtharĩkĩra o rĩmwe.+
27 “Wee* nĩ ngũtuĩte mũgeria wa cuma gatagatĩ-inĩ ka andũ akwa,Mũndũ ũrĩa ũtuĩragia biũ;No mũhaka ũrorage na ũgathuthuria njĩra yao.
28 Othe nĩ andũ aremi mũno,+Mathiaga magĩcambagia andũ arĩa angĩ.+
Matariĩ ta gĩcango na kĩgera;Mĩtugo yao othe nĩ mĩũru.
29 Ihurutĩri cia mwaki nĩ icinĩtwo.
Mwaki wao ũrutaga ngocorai.*
Mũndũ aikaraga akĩrutaga wĩra mũnene wa gũtheria o tũhũ,+Na andũ arĩa oru matiamũranĩtio.+
30 Andũ marĩmetaga betha ĩrĩa ĩregetwo,Nĩ gũkorũo Jehova nĩ amaregete.”+
Tũũhoro twa magũrũ-inĩ
^ Ũkk., “Amũrai.”
^ Ũkk., “gũtũ kwao ti kũruithie.”
^ Ũkk., “arĩa maiyũrĩtwo nĩ matukũ.”
^ Kana “kuunĩka kwa.”
^ Kana “mĩoyo yanyu yone.”
^ Kana “ũrutani.”
^ Nĩ mũthemba wa ithanjĩ rĩnungaga wega.
^ Ũcio nĩ Jeremia.
^ Rora Ũthathaũri wa Ciugo.
