Ũhoro Mwega Ũrĩa Waandĩkirũo nĩ Luka 24:1-53
24 No mũthenya wa mbere wa kiumia, magĩkinya mbĩrĩra-inĩ* rũcinĩ tene mũno makuuĩte mahuti marĩa manungaga wega marĩa maahaarĩirie.+
2 No magĩkora ihiga rĩgaragarĩtio rĩkeherio mbĩrĩra-inĩ,*+
3 na rĩrĩa maatonyire, matiakorire mwĩrĩ wa Mwathani Jesu.+
4 O hĩndĩ ĩyo maagegetio nĩ ũhoro ũcio-rĩ, arũme erĩ mehumbĩte nguo irakenga makĩrũgama hau maarĩ.
5 Atumia acio makĩmaka na makĩinamia mothiũ mao, nao arũme acio makĩmoria: “Nĩ kĩĩ kĩratũma mũcarie ũrĩa ũrĩ muoyo gatagatĩ-inĩ ka arĩa akuũ?+
6 Ndarĩ haha, nĩ gũkorũo nĩ ariũkĩtio. Ta ririkanai ũrĩa aamwĩrire atanoima Galili,
7 atĩ Mũrũ wa mũndũ no mũhaka aneanwo moko-inĩ ma andũ ehia na oragĩrũo mũtĩ igũrũ na mũthenya wa gatatũ ariũke.”+
8 Nao makĩririkana ciugo ciake,+
9 na makĩhũndũka kuuma mbĩrĩra-inĩ* na makĩheana ũhoro wa maũndũ macio mothe kũrĩ arĩa Ikũmi na Ũmwe o hamwe na acio angĩ othe.+
10 Atumia acio maarĩ Mariamu Mũmagidali, Joana, na Mariamu nyina wa Jakubu. O na atumia arĩa angĩ maarĩ nao nĩ maaheire atũmwo ũhoro ũcio.
11 No makĩona maũndũ macio ta arĩ ũrimũ, na makĩrega gwĩtĩkia atumia acio.
12 No Petero agĩũkĩra agĩteng’era mbĩrĩra-inĩ* ĩyo, na rĩrĩa aainamĩrĩire agĩcũthĩrĩria, no itambaya cia gatani oonire. Kwoguo akiuma hau amakĩtio nĩ ũrĩa gwekĩkĩte.
13 No rĩrĩ, mũthenya o ũcio arutwo erĩ maarĩ njĩra-inĩ magĩthiĩ gĩcagi gĩetagwo Emau, kĩrĩa kĩarĩ mairo ta mũgwanja* kuuma Jerusalemu,
14 na nĩ kwarĩrĩria maaragĩrĩria maũndũ macio mothe meekĩkĩte.
15 Na hĩndĩ ĩyo maathiaga magĩteeretaga ũhoro wa maũndũ macio-rĩ, Jesu agĩkuhĩrĩria na akĩambĩrĩria gũtwarana nao,
16 no maitho mao matiigana kũrekwo mamũmenye.+
17 Nake akĩmoria atĩrĩ: “Nĩ maũndũ marĩkũ macio mũraarĩrĩria mũgĩthiĩ na njĩra?” Nao makĩrũgama marĩ na kĩeha.
18 Ũmwe wetagwo Kileopa akĩmũũria atĩrĩ: “Kaĩ wee ũrĩ mũgeni ũraikara arĩ wiki thĩinĩ wa Jerusalemu atĩ ndũĩ* maũndũ marĩa mekĩkĩte kuo matukũ-inĩ maya?”
19 Nake akĩmoria: “Maũndũ marĩkũ?” Makĩmwĩra atĩrĩ: “Maũndũ megiĩ Jesu ũrĩa Mũnazarethi,+ ũrĩa ũrarĩ mũnabii ũrĩ hinya harĩ ciĩko na ciugo maitho-inĩ ma Ngai na ma andũ othe;+
20 na ũrĩa anene a athĩnjĩri-Ngai na atongoria aitũ maamũneanire atuĩrũo kũũragwo,+ na makĩmũhũũrĩra mũtĩ-inĩ na mĩcumarĩ.
21 No tũrerĩgagĩrĩra atĩ mũndũ ũcio nĩwe ũkũhonokia Isiraeli.+ Na makĩria ma ũguo, ũyũ nĩ mũthenya wa gatatũ kuuma maũndũ macio mekĩka.
22 Igũrũ rĩa ũguo-rĩ, atumia amwe gatagatĩ-inĩ gaitũ o nao nĩ matũgegirie, tondũ nĩ megũthiĩte mbĩrĩra-inĩ* rũcinĩ tene+
23 na rĩrĩa magire gũkora mwĩrĩ wake, moka makiugaga atĩ ningĩ nĩ mona araika, arĩa mameerire atĩ arĩ muoyo.
24 Thutha ũcio andũ amwe arĩa tuuma nao nĩ mathiire mbĩrĩra-inĩ* ĩyo,+ na makora gũtariĩ o ta ũrĩa atumia acio mekuugĩte, na matinamuona.”
25 Nĩ ũndũ ũcio akĩmeera: “Inyuĩ andũ aya mũtarĩ na wĩcirio na mũrĩ na ngoro itahiũhaga gwĩtĩkia maũndũ mothe marĩa anabii marĩtie!
26 Githĩ Kristo ndaragĩrĩire kũnyarirũo na maũndũ macio+ nĩguo atonye riri-inĩ wake?”+
27 Akĩmataarĩria maũndũ marĩa mamwĩgiĩ thĩinĩ wa Maandĩko mothe,+ ambĩrĩirie na maandĩko ma Musa na ma Anabii othe.
28 Mũthia-inĩ magĩkuhĩrĩria gĩcagi kĩrĩa maathiaga, nake akĩhaana ta ekũhĩtũka gĩcagi kĩu.
29 No makĩmũringĩrĩria aikare nao makĩmwĩra atĩrĩ: “Ikara gũkũ hamwe na ithuĩ, nĩ ũndũ kũrorete gũtuka na mũthenya ũrĩ hakuhĩ gũthira.” Nake akĩingĩra agĩikara nao.
30 Na rĩrĩa aarĩaga* hamwe nao, akĩoya mũgate, akĩũrathima, akĩwenyũranga, na akĩmanengera.+
31 Hĩndĩ ĩyo maitho mao makĩhingũka biũ na makĩmenya atĩ nĩwe; no we akĩbuĩria magĩtiga kũmuona.+
32 Na makĩĩrana atĩrĩ: “Na githĩ tũtikũhĩahĩaga ngoro agĩtwarĩria tũrĩ njĩra-inĩ, rĩrĩa egũtũthathaũragĩra* Maandĩko?”
33 Na magĩũkĩra o ithaa rĩu magĩcoka Jerusalemu, na magĩkora arĩa Ikũmi na Ũmwe na arĩa maagomanĩte hamwe nao,
34 arĩa mooigire atĩrĩ: “Nĩ ma Mwathani nĩ ariũkĩte, na akoimĩrĩra Simoni!”+
35 Nao magĩtaarĩria ũrĩa gwekĩkĩte marĩ njĩra-inĩ na ũrĩa maamũmenyire nĩ ũndũ wa kwenyũranga mũgate.+
36 Na hĩndĩ ĩyo maaragia ũhoro wa maũndũ macio-rĩ, akĩrũgama gatagatĩ-inĩ kao akĩmeera: “Mũrogĩa na thayũ.”+
37 No tondũ meeciragia nĩ kĩũmbe kĩa roho marona, makĩhahũka na makĩmaka.
38 Nĩ ũndũ ũcio akĩmoria: “Mũramaka nĩkĩ, na nĩ kĩĩ kĩratũma ngoro cianyu igĩe na nganja?
39 Ta rorai moko na magũrũ makwa muone atĩ nĩ niĩ; hutiai na muone, nĩ gũkorũo kĩũmbe kĩa roho gĩtirĩ nyama na mahĩndĩ ta ũũ mũrona ndariĩ.”
40 Na rĩrĩa aameeraga ũguo, akĩmonia moko na magũrũ make.
41 No tondũ o na rĩo matietĩkirie nĩ ũndũ wa gũkena na kũgega-rĩ, akĩmoria atĩrĩ: “Mũrĩ na kĩndũ gĩa kũrĩa hau?”
42 Nao makĩmũnengera gĩcunjĩ gĩa thamaki hĩhie,
43 nake akĩoya na akĩrĩa makĩyonagĩra na maitho mao.
44 Agĩcoka akĩmeera atĩrĩ: “Ici nĩcio ciugo ciakwa iria ndamwĩrire rĩrĩa ndakoragwo hamwe na inyuĩ,+ atĩ maũndũ mothe marĩa mandĩkĩtwo igũrũ rĩakwa Watho-inĩ wa Musa na maandĩko-inĩ ma Anabii na Thaburi no mũhaka mahinge.”+
45 Agĩcoka akĩhingũra meciria mao biũ nĩguo mataũkĩrũo nĩ Maandĩko macio,+
46 na akĩmeera, “Kwandĩkĩtwo atĩrĩ: atĩ Kristo nĩ angĩkanyarirũo na mũthenya wa gatatũ ariũkio kuuma kũrĩ arĩa akuũ,+
47 na nĩ ũndũ wa rĩĩtwa rĩake ndũrĩrĩ ciothe nĩ ingĩkaahunjĩrio+ ciĩrire nĩguo cioherũo mehia+—kwambĩrĩria Jerusalemu.+
48 Inyuĩ nĩ mũgaatuĩka aira a maũndũ macio.+
49 Na rĩrĩ, nĩ ngũmũtũmĩra kĩrĩa Awa eeranĩire. O na kũrĩ ũguo, ikarai gũkũ itũũra-inĩ nginya rĩrĩa mũkaamũkĩra hinya kuuma igũrũ.”+
50 Agĩcoka akĩmaruta nja akĩmatwara nginya Bethania, akĩoya moko make na igũrũ akĩmarathima.
51 Na o hĩndĩ ĩyo aamarathimaga, akĩmatiga akĩoywo agĩtwarũo igũrũ.+
52 Nao makĩmũinamĩrĩra na magĩcoka Jerusalemu makenete mũno.+
53 Na hĩndĩ ciothe maakoragwo thĩinĩ wa hekarũ makĩgooca Ngai.+
Tũũhoro twa magũrũ-inĩ
^ Kana “mbĩrĩra-inĩ ya kĩririkano.”
^ Kana “mbĩrĩra-inĩ ya kĩririkano.”
^ Kana “mbĩrĩra-inĩ ya kĩririkano.”
^ Kana “mbĩrĩra-inĩ ya kĩririkano.”
^ Nĩ ta kilomita 11. Ũkk., “Stadia 60.” Stadia ĩmwe yaiganaine na mita 185 (fiti 606.95). Rora Ũhoro Muongerere B14.
^ Kana hihi, “Kaĩ arĩ o wee mũgeni thĩinĩ wa Jerusalemu ũrĩa ũtoĩ?”
^ Kana “mbĩrĩra-inĩ ya kĩririkano.”
^ Kana “mbĩrĩra-inĩ ya kĩririkano.”
^ Kana “aaikarĩte metha-inĩ.”
^ Kana “egũtũtaaragĩria.”
