Ũhoro Mwega Ũrĩa Waandĩkirũo nĩ Mariko 13:1-37
13 Na rĩrĩa ooimaga thĩinĩ wa hekarũ, mũrutwo ũmwe wake akĩmwĩra atĩrĩ: “Mũrutani, ta rora ũrĩa mahiga maya na mĩako ĩno irĩ thaka!”+
2 No rĩrĩ, Jesu akĩmwĩra: “Nĩ ũrona mĩako ĩno mĩnene ũũ? Gũtirĩ ihiga haha rĩgaatigwo rĩikarĩire rĩrĩa rĩngĩ rĩtamomoretwo.”+
3 Na rĩrĩa aaikarĩte thĩ Kĩrĩma-inĩ kĩa Mĩtamaiyũ handũ hekarũ yoonekaga, Petero, Jakubu, Johana, na Andrea makĩmũũria ũũ hatarĩ andũ angĩ:
4 “Ta twĩre atĩrĩ, maũndũ macio mageekĩka rĩ, na nĩ kĩĩ gĩgaakorũo kĩrĩ kĩmenyithia kĩa rĩrĩa maũndũ macio mothe magaakinya mũthia?”+
5 Nĩ ũndũ ũcio Jesu akĩmeera atĩrĩ: “Mwĩmenyererei mũtikanahĩtithio nĩ mũndũ o na ũrĩkũ.+
6 Andũ aingĩ nĩ magooka na rĩĩtwa rĩakwa, makiugaga, ‘Nĩ niĩ we,’ na nĩ makaahĩtithia andũ aingĩ.
7 Ningĩ, rĩrĩa mũkaaigua ũhoro wa mbaara na riboti ciĩgiĩ mbaara, mũtikanetigĩre; no mũhaka maũndũ macio mekĩke, no mũico ndũgaakorũo ũkinyĩte.+
8 “Nĩ gũkorũo rũrĩrĩ nĩ rũgookĩrĩra rũrĩrĩ rũrĩa rũngĩ na ũthamaki ũũkĩrĩre ũthamaki ũrĩa ũngĩ;+ nĩ gũkaagĩa na ithingithia kũndũ na kũndũ; ningĩ nĩ gũkaagĩa ng’aragu.+ Maũndũ macio nĩ kĩambĩrĩria kĩa ruo ta rwa mũtumia arĩ hakuhĩ kũgĩa mwana.+
9 “No inyuĩ-rĩ, mwĩhũgagei. Andũ nĩ makaamũtwara magooti-inĩ,+ na mamũhũũrĩre thunagogi-inĩ+ na mũrũgamio mbere ya mangavana na athamaki nĩ ũndũ wakwa, nĩguo mũtuĩke aira kũrĩ o.+
10 Ningĩ, ũhoro ũrĩa mwega no mũhaka ũkaamba kũhunjio kũrĩ ndũrĩrĩ ciothe.+
11 Na rĩrĩa magaakorũo makĩmũneana, mũtikanambĩrĩrie gũtangĩka igũrũ rĩa ũrĩa mũkuuga; ĩndĩ ũndũ ũrĩa wothe mũkaaheo hĩndĩ ĩyo, mũkaawaria, tondũ ti inyuĩ mũgaakorũo mũkĩaria no nĩ roho mũtheru.+
12 Makĩria ma ũguo, mũndũ nĩ akooragithia mũrũ wa nyina, na ithe wa mwana oragithie mwana wake, na ciana ciũkĩrĩre aciari a cio na cimoragithie.+
13 Na nĩ mũgaathũũrũo nĩ andũ othe nĩ ũndũ wa rĩĩtwa rĩakwa.+ No ũrĩa ũgaakirĩrĩria* o nginya mũico+ nĩwe ũkaahonokio.+
14 “O na kũrĩ ũguo, rĩrĩa mũkoona kĩndũ kĩrĩa kĩrĩ thahu kĩrehaga mwanangĩko+ kĩrũgamĩte harĩa gĩtagĩrĩirũo (ũrĩa ũrathoma nĩ ahũthĩre ũtaũku), hĩndĩ ĩyo arĩa magaakorũo Judea nĩ mambĩrĩrie kũũrĩra irĩma-inĩ.+
15 Mũndũ ũrĩa ũgaakorũo nyũmba igũrũ ndakanaikũrũke o na ndakanatonye kuoya indo iria irĩ thĩinĩ wa nyũmba yake;
16 na mũndũ ũrĩa ũgaakorũo mũgũnda ndakanacoke kũrĩ indo iria irĩ thutha kuoya nguo yake ya igũrũ.
17 Kaĩ atumia arĩa magaakorũo marĩ na nda na arĩa magaakorũo makĩongithia ciana matukũ macio nĩ magaakorũo na haaro-ĩ!+
18 Hoyagai atĩ maũndũ macio matikanakinye hĩndĩ ya heho;
19 tondũ matukũ macio magaakorũo marĩ matukũ ma thĩna+ ũtarĩ woneka kuuma kĩambĩrĩria kĩa ũũmbi ũrĩa Ngai oombire nginyagia hĩndĩ ĩyo, na ndũkoneka rĩngĩ.+
20 Ma nĩ atĩ, tiga Jehova* akaanyihia matukũ macio, gũtirĩ mũndũ ũngĩkaahonoka. No nĩ ũndũ wa arĩa athuurĩte, nĩ akaanyihia matukũ macio.+
21 “Ningĩ-rĩ, mũndũ o na ũrĩkũ angĩkamwĩra atĩrĩ, ‘Kristo arĩ haha,’ kana ‘Arĩ haarĩa,’ mũtikanetĩkie.+
22 Nĩ gũkorũo nĩ gũgooka Kristo a maheeni na anabii a maheeni+ na maringe ciama na meke maũndũ ma magegania nĩguo mahĩtithie nginya arĩa athuure kũngĩhoteka.
23 Nĩ ũndũ ũcio, inyuĩ mwĩhũgagei.+ Nĩ ndamwĩra maũndũ mothe o mbere.
24 “No matukũ-inĩ macio, thutha wa thĩna ũcio, riũa nĩ rĩkaagĩa nduma, naguo mweri ndũkaaruta ũtheri waguo,+
25 nacio njata nĩ ikaagwa kuuma igũrũ, namo mahinya ma igũrũ nĩ magaathingithio.
26 Na hĩndĩ ĩyo andũ nĩ makoona Mũrũ wa mũndũ+ agĩũka arĩ thĩinĩ wa matu arĩ na hinya mũnene na riri.+
27 Na nĩ agaatũma araika macokanĩrĩrie andũ ake arĩa athuure kuuma harĩ huho iria inya, kuuma ituri cia thĩ nginya ituri cia igũrũ.+
28 “Na rĩrĩ, mwĩrutei na ngerekano ĩno ya mũkũyũ: Rĩrĩa tũhonge twaguo tuororoa na twagĩa mathangũ, nĩ mũmenyaga atĩ hĩndĩ ya ũrugarĩ nĩ ĩkuhĩrĩirie.+
29 O ũndũ ũmwe na ũcio, rĩrĩa mũkoona maũndũ macio magĩkĩka, menyai atĩ arĩ hakuhĩ mĩrango-inĩ.+
30 Ngũmwĩra atĩrĩ na ma, rũciaro rũrũ rũtirĩ hĩndĩ rũgaathira nginya maũndũ macio mothe mekĩke.+
31 Igũrũ na thĩ nĩ igaathira,+ no ciugo ciakwa gũtirĩ hĩndĩ igaathira.+
32 “Ũhoro wĩgiĩ mũthenya ũcio kana thaa, gũtirĩ mũndũ ũĩ, o na araika arĩa marĩ igũrũ kana Mũriũ, no Ithe witũ ũĩ.+
33 Ikaragai mwĩhũgĩte na mwĩiguĩte,+ tondũ mũtiũĩ ihinda rĩrĩa rĩtuĩtwo nĩ rĩrĩkũ.+
34 Nĩ ta mũndũ wathiire rũgendo kũndũ kũraya agĩtiga nyũmba yake na akĩhe ngombo ciake wathani,+ o ngombo wĩra-inĩ wayo, na agĩatha mũikaria wa mũrango aikarage eiguĩte.+
35 Nĩ ũndũ ũcio, ikaragai mwĩiguĩte, tondũ mũtiũĩ rĩrĩa mwene nyũmba arĩcoka,+ kana nĩ hwaĩ-inĩ kana nĩ ũtukũ gatagatĩ kana kũrĩ hakuhĩ gũkĩa* kana rũcinĩ tene,+
36 nĩguo rĩrĩa agooka mũterĩgĩrĩire, ndakanakore mũrĩ toro.+
37 No ũrĩa ndamwĩra, ndera andũ othe: Ikaragai mwĩiguĩte.”+
