Thimo 27:1-27
27 Ndũkerahage nĩ ũndũ wa rũciũ,Tondũ ndũĩ kĩrĩa mũthenya ũngĩrehe.*+
2 Reke mũndũ ũngĩ* akũgaathĩrĩrie, no ti kanua gaku mwene;Reke andũ angĩ* makũgaathĩrĩrie, no ti mĩromo yaku mwene.+
3 Ihiga nĩ iritũ na mũthanga o naguo nĩ mũritũ,No kũrakario nĩ kĩrimũ nĩ kũritũ gũkĩra icio cierĩ.+
4 Mang’ũrĩ matirĩ tha na marakara matariĩ ta mũiyũro,No rĩrĩ, nũũ ũngĩhota gwĩtiiria ũiru?+
5 Kũrũnga mũndũ ũtekũhithĩrĩra nĩ kwega gũkĩra wendo mũhithanie.+
6 Nguraro cia gwĩkĩrũo nĩ mũrata nĩ cia wĩhokeku,+No thũ ĩmumunyaga mũndũ maita maingĩ.*
7 Mũndũ mũhũnu nĩ aregaga* ũũkĩ wa magua-inĩ,No mũndũ mũhũtu, o na kĩndũ kĩrũrũ aiguaga kĩrĩ na cama.
8 O ta nyoni ĩrĩa ĩtiganagĩria* gĩtara kĩayo,No taguo mũndũ ũrĩa ũtiganagĩria mũciĩ wake atariĩ.
9 Maguta na ũbumba nĩ itũmaga ngoro ĩkene;Na noguo ũrata mwega ũrĩa uumanĩte na ũtaaro wa kuuma ngoro wĩkaga.+
10 Ndũkanatiganĩrie mũrata waku kana mũrata wa thoguo,Na ndũkanaingĩre kwa mũrũ wa nyũkwa mũthenya ũrĩa ũũru ũgaagũkora;Kaba mũndũ wa itũũra ũrĩa ũrĩ hakuhĩ gũkĩra mũrũ wa nyina na mũndũ ũrĩa ũrĩ kũraihu.+
11 Mũrũ wakwa, tuĩka mũndũ mũũgĩ, ũkenagie ngoro yakwa,+Nĩgetha hotage gũcokeria ũrĩa ũnyũrũragia.+
12 Mũndũ mũũgĩ onaga ũgwati akehitha,+No arĩa matarĩ na ũmenyeru mathiaga o na mbere magacemania na maũndũ moru.
13 Oya nguo ya mũndũ angĩkorũo arutĩte kĩndũ gĩa kũrũgamĩrĩra thiirĩ wa mũgeni;Oya kĩndũ gĩa kũrũgamĩrĩra thiirĩ kuuma kũrĩ we angĩkorũo arũgamĩrĩire thiirĩ wa mũtumia wa kũngĩ.*+
14 Mũndũ angĩrathima mũndũ ũrĩa ũngĩ na mũgambo mũnene rũcinĩ tene,Ũndũ ũcio ũrĩonagwo ũrĩ kĩrumi harĩ we.
15 Mũtumia wa ngũĩ* atariĩ ta nyũmba ĩroira ĩtegũtigithĩria hĩndĩ ya mbura.+
16 Mũndũ ũrĩa ũngĩhota kũmũgirĩrĩria no ahote kũgirĩrĩria rũhuhoNa no ahote gũkumbatĩria maguta na guoko gwake kwa ũrĩo.
17 O ta ũrĩa kĩgera kĩnooraga kĩgera,No taguo mũndũ anooraga mũratawe.*+
18 Mũndũ ũrĩa ũrũmbũyagia mũkũyũ nĩ akaarĩa maciaro maguo,+Na ũrĩa ũrũmbũyagia mwathi wake nĩ agaatĩithio.+
19 O ta ũrĩa mũndũ onaga ũthiũ wake maĩ-inĩ,No taguo ngoro ya mũndũ yonanagia ũrĩa ya mũndũ ũngĩ ĩhaana.
20 Mbĩrĩra na kũndũ kũrĩa kwa mwanangĩko* itiiganagia,+O na maitho ma mũndũ gũtirĩ hĩndĩ maiganagia.
21 O ta ũrĩa nyũngũ ĩrĩ ya gũtheria betha narĩo riiko nĩ rĩa gũtheria thahabu,+No taguo mũndũ ageragio nĩ kũgaathĩrĩrio kũrĩa agaathagĩrĩrio nakuo.*
22 O na ũngĩhũũra kĩrimũ na mũũthĩTa ngano* ĩrahũũrĩrũo thĩinĩ wa ndĩrĩ,Gĩtingiumwo nĩ ũrimũ wakĩo.
23 Nĩ wagĩrĩirũo kũmenya wega ũrĩa rũũru rwaku rũhaana.
Rũmbũyagia* ng’ondu ciaku na njĩra njega,+
24 Tondũ ũtonga ndũtũũraga tene na tene,+O na thũmbĩ* ndĩtũũraga njiarũa-inĩ ciothe.
25 Nyeki nduru ĩthiraga, gũkoimĩra nyeki ĩngĩ,Nayo mĩmera ya irĩma-inĩ ĩgacokanĩrĩrio.
26 Tũtũrũme nĩ tũkũheaga gĩa kwĩhumba,Nacio thenge igakũhe marĩhi ma mũgũnda.
27 Na nĩ kũrĩkoragwo na iria rĩiganu rĩa mbũri rĩa gũkũhe irio,Rĩa kũhe famĩlĩ yaku, ona gũtũũria ngombo ciaku cia airĩtu.
Tũũhoro twa magũrũ-inĩ
^ Ũkk., “ũngĩciara.”
^ Ũkk., “mũgeni.”
^ Ũkk., “mũndũ wa kũngĩ.”
^ Kana hihi, “na ũhinga; na kwĩringĩrĩria.”
^ Ũkk., “arangagĩrĩria.”
^ Kana “yũmbũkaga ĩgatiga.”
^ Kana “mũndũ wa kũngĩ.”
^ Kana “wa mateta.”
^ Ũkk., “ũthiũ wa mũratawe.”
^ Kana “Sheoli na Abadoni.”
^ Kana “No taguo kũgaathĩrĩrio kuonanagia ũrĩa mũndũ atariĩ.”
^ Kana “cairi.”
^ Kana “Igaga ngoro yaku harĩ.”
^ Kana “thũmbĩ ng’emie.”
