HIHI nĩ kũrĩ mũndũ ũngĩhota gũikara arĩ mwĩhokeku harĩ Ngai o na muoyo wake ũngĩkorũo ũgwati-inĩ kana o na angĩkorũo ndekũgunĩka nĩ ũndũ wa gwathĩka? Kĩũria kĩu kĩoimĩririo na gĩgĩcokio kũgerera maũndũ marĩa maakorire Ayubu.

Ayubu ooimĩte famĩlĩ-inĩ ya Iburahimu, na aatũũraga gĩcigo-inĩ kĩa Arabia hĩndĩ ĩrĩa Aisiraeli maarĩ ngombo bũrũri-inĩ wa Misiri. Ihinda-inĩ o rĩu, araika magĩthiĩ mbere ya Ngai, na Shaitani aarĩ hamwe nao. Hĩndĩ ĩyo moonganĩte, Jehova nĩ eerire araika ũrĩa oonaga Ayubu arĩ mũndũ wa bata nĩ ũndũ wa wĩhokeku wake. Jehova ooigire atĩ gũtiarĩ mũndũ ũngĩ warĩ mwĩhokeku ta Ayubu. No Shaitani akiuga atĩ Ayubu aatungatagĩra Ngai o tondũ tu Ngai nĩ aamũrathimĩte na akamũgitĩra. Shaitani ooigire atĩ Ayubu angĩatunyirũo kĩrĩa gĩothe aarĩ nakĩo nĩ aangĩarumire Ngai.

Ngai nĩ eetĩkĩririe Shaitani anyarire indo cia Ayubu, orage ciana ciake, na amũhũũre na mũrimũ mũũru. Nĩ ũndũ wa kwaga kũmenya atĩ nĩ Shaitani wamũrehagĩra mathĩna macio, Ayubu ndaataũkagĩrũo nĩ kĩrĩa gĩatũmaga Ngai etĩkĩrie maũndũ macio mamũkore. No o na arĩ na moritũ macio mothe, Ayubu ndaarumire Ngai.

Arata atatũ a maheeni nĩ mookire kũrĩ Ayubu. Meerire Ayubu atĩ nĩ Ngai wamũherithagia nĩ ũndũ wa mehia marĩa eekĩte hitho-inĩ. O na mooigire atĩ Ngai ndakenagio nĩ arĩa mamũtungatagĩra na ndamehokete. Ayubu nĩ aareganire na mwĩcirĩrie wao ũtarĩ mwega. Arĩ na ũmĩrĩru, Ayubu ooigire atĩ egũtũũria wĩhokeku wake nginya o gũkua!

No nĩ harĩ handũ Ayubu aahĩtirie. Nĩ aageragia mũno kwĩyonania atĩ aarĩ mũthingu. No mwanake ũmwe wetagwo Elihu, ũrĩa waikarĩte thĩ amathikĩrĩirie, akĩambĩrĩria kwaria. Elihu nĩ aarũngire Ayubu nĩ ũndũ wa gwĩciria mũno ũrĩa angĩonania atĩ we nĩ mũthingu, handũ ha gwĩciria ũhoro wĩgiĩ gũteterũo kwa ũnene wa Jehova Ngai. Elihu ningĩ nĩ aarũngire arata acio a Ayubu a maheeni.

Thutha ũcio Jehova Ngai nĩ aaririe na Ayubu, na akĩmũteithia kũrũnga mwĩcirĩrie wake. Jehova nĩ aahũthĩrire magegania ma ũũmbi gũteithia Ayubu kuona ũrĩa arĩ wa gĩkĩro gĩa thĩ akĩringithanio na ũnene wa Ngai. Nĩ ũndũ wa wĩnyihia, Ayubu nĩ eetĩkĩrire kũrũngwo nĩ Jehova. Tondũ Jehova nĩ arĩ “wendo muororo mũno na nĩ mũigua tha,” nĩ aahonirie Ayubu, akĩmũhe indo maita merĩ ma iria aarĩ nacio hau kabere, na akĩmũrathima na ciana ikũmi. (Jakubu 5:11) Tondũ Ayubu nĩ aatũũririe wĩhokeku wake harĩ Jehova o na anyarirũo, nĩ oonanirie wega atĩ Shaitani nĩ aarĩtie maheeni rĩrĩa ooigire atĩ andũ matingĩhota gũikara marĩ ehokeku harĩ Ngai mangĩcemania na magerio.

—Kuumana na ibuku rĩa Ayubu.