Ta wĩcirie ũndũ ũyũ: Ndagĩka nini kuuma Karen akinya harĩa megũthiaga na arata ake gwĩkenia, akaigua mũgambo oĩ thutha wake.

Karen ehũgũra akona mũratawe Jessica anyitĩte cuba igĩrĩ. Na arora akona nĩ njohi. Jessica akanengera Karen cuba ĩmwe akamwĩra ũũ: “Ndũrĩ mũnini mũno ũndũ ũtangĩnyua kanini, githĩ tiguo?”

Karen arenda kũrega, ĩndĩ Jessica nĩ mũratawe na ndarenda kũmũiguithia ũũru. Makĩria ma ũguo, Jessica nĩ mũirĩtu mwega. Na angĩkorũo we nĩ aranyua nĩ kuonania ũndũ ũcio ti mũru. Karen akeĩra, ‘Gĩkĩ no kĩndũ gĩa kũnyua tu, ti ta kũhũthĩra ndawa cia kũrebia.’

Korũo nĩwe Karen ũngĩka atĩa?

Nĩguo ũtue itua rĩrĩa rĩagĩrĩire ũndũ-inĩ ta ũcio, wagĩrĩire kũmenya wĩ mũndũ wa mũthemba ũrĩkũ. Ũguo nĩ kuuga ithimi na maũndũ marĩa wĩtĩkĩtie. Ũrĩ na ũmenyo ũcio nĩ ũrĩhotaga gũtongoria mũtũũrĩre waku handũ ha kũreka arĩa angĩ magũtongoragie.—1 Akorintho 9:26, 27.

Nĩ kĩĩ kĩngĩgũteithia kũgĩa na hinya wa gwĩka ũguo? Gũcokia ciũria ici irũmĩrĩire no gũgũteithie.

Kũmenya ũhoti waku na ngumo ciaku njega nĩ gũgũgũteithia ũkorũo na ũmĩrĩru.

NGEREKANO YA BIBILIA: Mũtũmwo Paulo aandĩkire ũũ: “O na angĩkorũo ndirĩ ũhoti wa kwaria na njĩra njega, hatarĩ nganja nĩ ngoragwo na ũmenyo.” (2 Akorintho 11:6) Gũkorũo arĩ na ũmenyo mũingĩ wa Maandĩko nĩ kwamũteithirie gũkorũo na ũmĩrĩru rĩrĩa arĩa angĩ maamũingagĩrĩra. Ndetĩkĩririe ciugo ciao imũrage ngoro.—2 Akorintho 10:10; 11:5.

WĨTHUTHURIE: Andĩka haha mũhuro ũhoti mũna ũkoragwo naguo.

Rĩu taarĩria ngumo ĩmwe ĩrĩa ũhotaga kuonania na njĩra nene. (Kwa ngerekano, kũrũmbũiya arĩa angĩ, ũtaana, kwĩhokeka, kũiga mathaa.)

Ũngĩĩtĩkĩria mawathe maku matongoragie ũtũũro waku, maũndũ maku no mahĩtane.

NGEREKANO YA BIBILIA: Paulo nĩ oĩ mawathe make. Aandĩkire ũũ: “Ngoro-inĩ yakwa nĩ ngenagĩra mũno watho wa Ngai, no nĩ nyonaga watho ũngĩ thĩinĩ wa mwĩrĩ wakwa ũkĩrũa na watho wa meciria makwa na ũkandua ngombo ya watho wa mehia.”—Aroma 7:22, 23.

WĨTHUTHURIE: Nĩ wathe ũrĩkũ ũrabatara kũrutĩra wĩra?

Hihi no ũkombore ngaari na wĩre ndereba agũthiũrũrũkie kĩhaaro nginya ĩthire maguta? Ũcio ti ũndũ wa ũũgĩ na no ũgũtware hathara.

Tũreruta atĩa? Mĩoroto ĩgũteithagia gũthiĩ na mbere handũ ha gũthiũrũrũka o handũ hamwe ũtũũro-inĩ. Ũrĩ na muoroto nĩ ũmenyaga ũndũ ũrĩa ũrenda gwĩka na ũkabanga ũrĩa ũkũũhingia.

NGEREKANO YA BIBILIA: Paulo aandĩkire ũũ: “Nditeng’eraga itarĩ na muoroto.” (1 Akorintho 9:26) Paulo nĩ eeigagĩra mĩoroto na akerutanĩria kũmĩhingia.—Afilipi 3:12-14.

WĨTHUTHURIE: Andĩka haha mũhuro mĩoroto ĩtatũ ĩrĩa ũngĩenda kũhingia mwaka-inĩ ũyũ ũngĩ.

Ũngĩkorũo ũtarĩ na ma na maũndũ, ndũrĩhotaga gũtua matua. Ũrĩkaga o ta kĩĩmbu kĩrĩa gĩcenjagia rangi nĩguo kĩhanane na harĩa kĩrĩ, na ũndũ ũcio wonanagia atĩ ndũĩ ũrĩ mũndũ wa mũthemba ũrĩkũ.

Ngũrani na ũguo, rĩrĩa weka maũndũ marĩa wĩtĩkĩtie atĩ nĩ ma ma, ndũrĩrũmagĩrĩra ũrĩa andũ arĩa angĩ mareka.

NGEREKANO YA BIBILIA: Mũnabii Danieli, hihi arĩ o mũndũ mwĩthĩ, nĩ ‘aatuire na ngoro yake’ atĩ nĩ angĩathĩkĩire mawatho ma Ngai o na gũtuĩka ndaarĩ hamwe na famĩlĩ yake. (Danieli 1:8) Nĩ ũndũ ũcio, akĩrũgama na maũndũ marĩa eetĩkĩtie nĩ ma ma. Danieli aatũũrire kũringana na maũndũ macio eetĩkĩtie.

WĨTHUTHURIE: Nĩ maũndũ marĩkũ ũkoragwo wĩtĩkĩtie nĩ ma ma? Kwa ngerekano-rĩ, hihi nĩ wĩtĩkĩtie nĩ kũrĩ Ngai? Akorũo nĩguo-rĩ, wĩtĩkĩtie ũguo nĩkĩ? Nĩ ũndũ ũrĩkũ ũtũmaga wĩtĩkie biũ atĩ arĩ kuo?

Hihi nĩ wĩtĩkĩtie atĩ ithimi cia Ngai ciĩgiĩ mĩtugo no ikũgune? Akorũo nĩguo-rĩ, wĩtĩkĩtie ũguo nĩkĩ?

Hihi ũngĩenda gũkorũo ũhaana gathangũ kagũĩte thĩ karĩa kahurutagwo nĩ karũhuho o gothe, kana mũtĩ ũrĩa wĩtiragia nginya ihuhũkanio? Ĩkĩra hinya maũndũ marĩa wĩtĩkĩtie atĩ nĩ ma ma, na ũgũkorũo ũhaana ta mũtĩ ũcio. Na ũndũ ũcio nĩ ũgũgũteithia gũcokia kĩũria gĩkĩ: Ndĩ Mũndũ wa Mũthemba Ũrĩkũ?