THOMA ngathĩti o yothe. Wĩrorere TV, kana ũthikĩrĩrie kameme. Kũrĩ na ũhoro mũingĩ mũno wĩgiĩ ũkora, mbaara na wĩki naĩ! Ta wĩcirie ũhoro wa mathĩna maku wee mwene. No gũkorũo ndwari kana gĩkuũ kĩa mũndũ wendete nĩkĩragwĩkĩra kĩeha kĩnene. Wahota kũigua o ta mũthuri waarĩ mũthingu, Ayubu, ũrĩa woigire atĩ nĩ ‘aiyũirũo nĩ mĩnyamaro.’—Ayubu 10:15, New World Translation.

Ta wĩyũrie:

• Ũũ nĩguo Ngai aatanyĩte ũtũũro wakwa na wa andũ arĩa angĩ ũkorũo?

• Ingĩruta kũ ũteithio wa kũhiũrania na mathĩna makwa?

• Kũrĩ na mwĩhoko o na ũrĩkũ atĩ nĩtũkoona thayũ thĩinĩ wa thĩ?

Bibilia nĩ ĩheanaga macokio ma gũtũma ũiganire ma ciũria icio.

• “Nake nĩekũmagiria maithori mothe mathire maitho mao; nakĩo gĩkuũ gĩtirĩ hingo gĩgacoka kũgĩa, o na gũtirĩ hingo gũgacoka kũgĩa na kĩeha, kana kĩrĩro, kana ruo.”—Kũguũrĩrio 21:4

• “Mũndũ ũrĩa ũthuaga agacimbicaga o ta thwariga.”—Isaia 35:6

• “Maitho ma atumumu nĩmakahingũrũo.”—Isaia 35:5

•  “Arĩa othe marĩ thĩinĩ wa mbĩrĩra . . . [nĩmakoima] kuo.”—Johana 5:28, 29

• “Mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.”—Isaia 33:24

• “Bũrũri ũrogĩaga na bũthi wa ngano.”—Thaburi 72:16

Ndũkahiũhe gũtua atĩ maũndũ macio magwetetwo hau thutha no iroto tu. Ngai nĩeranĩire atĩ nĩekũrehe maũndũ macio, na Bibilia nĩ ĩtarĩirie ũrĩa arĩka ũguo.

No Bibilia ĩna ũguni ũngĩ mũingĩ. Nĩ ĩheanaga ũrĩa ũngĩka nĩguo ũkenere ũtũũro wĩ na umithio o na rĩu. Ta wĩcirie hanini ũhoro wa mĩtangĩko na mathĩna maku. Hihi nĩ ma mbeca, ma famĩlĩ, ndwari, kana gĩkuũ kĩa mũndũ wendete. Bibilia no ĩgũteithie kũhiũrania na mathĩna o na rĩu, na no ĩkũhoorerie ngoro na macokio ma ciuria ta ici:

• Tũnyamarĩkaga nĩkĩ?

• Tũngĩhota kũhiũrania na mĩtangĩko ya ũtũũro atĩa?

• Tũngĩka atĩa nĩguo mũtũũrĩre witũ wa famĩlĩ ũgĩe na gĩkeno makĩria?

• Gũtuĩkaga atĩa rĩrĩa twakua?

• Hihi nĩtũkoona rĩngĩ endwa aitũ arĩa makuĩte?

• Tũngĩkorũo na ma atĩa atĩ Ngai nĩakahingia ciĩranĩro ciake cia mahinda mokĩte?

 Gũtuĩka atĩ nĩ ũrathoma ibuku rĩrĩ kũronania atĩ no wende kũmenya ũrĩa Bibilia ĩrutanaga. Ibuku rĩrĩ nĩ rĩgũgũteithĩrĩria. Nĩ ũkuona atĩ o kĩbungo kĩrĩ na kĩũria mũhuro wa karatathi. Andũ milioni nyingĩ nĩmakenagĩra kũhũthĩra njĩra ya ciũria-na-macokio rĩrĩa mararĩrĩria Bibilia na Aira a Jehova. Tũkwĩhoka o nawe nĩũgũkenera njĩra ĩo. Ngai arokũrathima ũgĩkenera kuoya ikinya rĩu rĩa gũgũcanjamũra na gũtũma ũiganĩre rĩa kwĩruta ũrĩa Bibilia ĩrutanaga kũna!