ITHOMO RĨA 10
Ũngĩgunĩka Atĩa Kuumana na Mĩcemanio ya Aira a Jehova?
Hihi nĩ ũrĩ wathiĩ gĩthomo kĩa Aira a Jehova Nyũmba-inĩ yao ya Ũthamaki? Angĩkorũo ndũrĩ wathiĩ, wahota kũigua guoya ũgĩthiĩ riita rĩa mbere. No wĩyũrie: ‘Nĩ maũndũ marĩkũ mekagwo rĩrĩa macemanĩtie? Bata wa gũcemania nĩ ũrĩkũ? Njagĩrĩirũo gũthiĩ nĩkĩ?’ Ithomo-inĩ rĩrĩ nĩ ũkwĩruta ũrĩa gũcemania hamwe na andũ arĩa angĩ kũngĩkũhotithia gũkuhĩrĩria Ngai makĩria, na gũgũteithie wee mwene.
1. Aira a Jehova macemanagia hamwe nĩkĩ?
Mwandĩki ũmwe wa Bibilia nĩ ataarĩirie gĩtũmi kĩrĩa kĩnene gĩa gũcemania hamwe rĩrĩa ooigire ũũ: “Ndĩrĩgoocaga Jehova ndĩ thĩinĩ wa kĩũngano kĩnene.” (Thaburi 26:12) O ũndũ ũmwe na ũcio, Aira a Jehova nĩ makenaga mũno rĩrĩa macemanĩtie hamwe. Macemanagia o kiumia kũndũ gũtiganĩte thĩinĩ wa thĩ, nĩguo mahoe hamwe, maine, na magooce Ngai. Ningĩ nĩ macemanagia marĩ ikundi nene maita maigana ũna o mwaka nĩguo mathathaiye hamwe.
2. Nĩ maũndũ marĩkũ ũngĩĩruta mĩcemanio-inĩ itũ?
Twĩrutaga kuumana na Kiugo kĩa Ngai, ‘tũgagĩtaarĩria na njĩra ĩrataũkĩka na tũkonania wega ũrĩa kiugĩte.’ (Thoma Nehemia 8:8.) Ũngĩũka no wĩrute ũhoro wĩgiĩ Jehova na ngumo ciake njega. O ũrĩa ũkwĩruta makĩria igũrũ rĩgiĩ ũrĩa akwendete, noguo ũkũmũkuhĩrĩria makĩria. Ningĩ nĩ ũkwĩruta ũrĩa angĩgũteithia kũgĩa na ũtũũro ũrĩ na muoroto.—Isaia 48:17, 18.
3. Ũngĩgunĩka atĩa ũngĩnyitanĩra na andũ arĩa angĩ mĩcemanio-inĩ itũ?
Jehova atwĩraga “twĩciranagie mũndũ na ũrĩa ũngĩ nĩguo twĩkĩranage hinya ũhoro-inĩ wĩgiĩ wendo na ciĩko njega, tũtegũtiga gũcemanagia hamwe.” (Ahibirania 10:24, 25) Mĩcemanio-inĩ itũ nĩ ũkũmenyana na andũ mendanĩte kuuma ngoro na mendete kwĩruta ũhoro wĩgiĩ Ngai, o tawe. Nĩ ũrĩmaiguaga makĩgweta maũndũ ma gwĩkĩra ngoro kuuma Bibilia-inĩ. (Thoma Aroma 1:11, 12.) Ningĩ nĩ ũkũmenyana na andũ angĩ mahotete kũhiũrania na mathĩna mao marĩ na gĩkeno. Icio no itũmi imwe iria itũmaga Jehova ende tũcemanagie hamwe tũtegũtĩĩrĩria!
THUTHURIA MAKĨRIA
Reke tũthuthurie ũrĩa mĩcemanio ya Aira a Jehova ĩkoragwo ĩhaana, na wone nĩkĩ nĩ ũndũ wa bata kwĩrutanĩria gũthiaga.
4. Mĩcemanio ya Aira a Jehova
Akristiano a karine ya mbere nĩ maacemanagia hamwe mategũtĩĩrĩria nĩguo mathathaiye Jehova. (Aroma 16:3-5) Thomai Akolosai 3:16, mũcoke mwarĩrĩrie kĩũria gĩkĩ:
-
Akristiano a karine ya mbere maathathayagia Jehova na njĩra ĩrĩkũ?
Mahinda-inĩ maya, Aira a Jehova o nao nĩ macemanagia hamwe mategũtĩĩrĩria nĩguo mathathaiye Jehova. Nĩguo muone ũrĩa mĩcemanio yao ĩkoragwo ĩhaana, mwĩrorerei VIDEO ĩno, mũcoke mwĩrorere mbica ĩrĩa ĩronania mũcemanio wa kĩũngano na mwarĩrĩrie ciũria iria irũmĩrĩire.
-
Nĩ maũndũ marĩkũ wona mahaanaine harĩ maũndũ marĩa mekagwo thĩinĩ wa Nyũmba ya Ũthamaki na marĩa wathoma thĩinĩ wa Akolosai 3:16?
-
Hihi harĩ ũndũ ũngĩ wona wĩgiĩ mĩcemanio wagũkenia thĩinĩ wa video ĩyo kana mbica-inĩ?
Thomai 2 Akorintho 9:7, mũcoke mwarĩrĩrie kĩũria gĩkĩ:
-
Aira a Jehova magaga gwĩtia mbeca nĩkĩ mĩcemanio-inĩ yao?
Mũrĩ hamwe na mwarimũ waku, rorai kĩrĩa gĩkaarĩrĩrio mũcemanio-inĩ ũmwe wa kiumia gĩkĩ.
-
Nĩ gacunjĩ karĩkũ ka mũcemanio ũcio ũrona ta ũngĩenda kũigua kana wona ta kangĩgũteithia?
Hihi nĩ ũĩ?
Thĩinĩ wa jw.org, no wone kũrĩa mĩcemanio ĩkagĩrũo na ihinda rĩrĩa ĩkagwo kũndũ gũtiganĩte thĩinĩ wa thĩ.
-
Mĩcemanio itũ nĩ ĩkoragwo na mĩario ya Bibilia, cionereria, na video. Mĩcemanio yambagĩrĩria na ĩkarĩkĩrĩra na rwĩmbo na mahoya
-
Icunjĩ imwe cia mĩcemanio nĩ ikoragwo na ihinda rĩa ciũria na macokio
-
Andũ othe nĩ manyitagwo ũgeni—athuri, atumia, andũ akũrũ, o na ciana
-
Gũtikoragwo na marĩhi ma kũingĩra. Aira a Jehova matirĩhagia andũ kũingĩra mĩcemanio-inĩ yao, na matithiũrũrũkagia indo cia kũngania mĩhothi
5. No ũbatare kwĩrutanĩria nĩguo ũthiage mĩcemanio
Ta wĩcirie ũhoro wa kĩonereria kĩa Jesu na famĩlĩ yao. Nĩguo mathiĩ gĩathĩ kĩa o mwaka Jerusalemu moimĩte Nazarethi, nĩ maabataraga gũthiĩ magũrũ ihinda rĩa thikũ ta ithatũ magereire kũndũ kũrĩ na irĩma. Thomai Luka 2:39-42, mũcoke mwarĩrĩrie ciũria ici:
-
Hihi nĩ ũkuona ta maabataraga kwĩrutanĩria nĩguo mathiĩ thabarĩ ĩyo ya Jerusalemu?
-
Ũngĩbatara kwĩrutanĩria nĩkĩ nĩguo ũhote gũthiaga mĩcemanio?
-
Nĩ ũkuona ta ũngĩteithĩka nĩ gwĩka ũguo? Ũngiuga ũguo nĩkĩ?
Bibilia yugaga atĩ gũcemania hamwe nĩ ũndũ wa ũthathaiya nĩ kwa bata mũno. Thomai Ahibirania 10:24, 25, mũcoke mwarĩrĩrie kĩũria gĩkĩ:
-
Twagĩrĩirũo gũthiaga mĩcemanio tũtegũtĩĩrĩria nĩkĩ?
ANDŨ AMWE MOIGAGA: “To nginya ũthiĩ harĩa andũ arĩa angĩ macemanĩtie. No wĩthomere Bibilia ũrĩ o mũciĩ.”
-
Ũngĩhũthĩra rĩandĩko rĩrĩkũ kana kĩonereria kĩrĩkũ thĩinĩ wa Bibilia kuonania mawoni ma Jehova megiĩ gũcemania hamwe?
ŨRĨA TWERUTA
Gũthiĩ mĩcemanio no gũgũteithie kwĩruta makĩria ũhoro wĩgiĩ Jehova, gũkũria ũrata wa hakuhĩ hamwe nake, na kũmũthathaiya hamwe na arĩa angĩ.
Ciũria cia gũcokera
-
Jehova endaga tũcemanagie hamwe nĩkĩ?
-
Nĩ maũndũ marĩkũ ũngĩĩruta mĩcemanio-inĩ ya Aira a Jehova?
-
Ũrona ta mĩcemanio ĩyo ĩngĩgũteithia na njĩra irĩkũ ingĩ?
RIKĨRA
Ũngĩka atĩa angĩkorũo nĩ ũretigĩra gũthiĩ mũcemanio? Wĩrorere wone ũrĩa mũthuri ũmwe waiguaga ũguo aakinyĩrĩire kwenda mĩcemanio.
Wĩrorere wone ũrĩa mwanake ũmwe aakeneire mĩcemanio na ũrĩa eekire nĩguo athiage.
Thoma wone ũrĩa andũ angĩ maiguaga igũrũ rĩgiĩ gũthiĩ mĩcemanio.
“Njagĩrĩirũo Gũthiĩ Mĩcemanio Nyũmba-inĩ ya Ũthamaki Nĩkĩ?” (Gĩcunjĩ thĩinĩ wa jw.org/ki)
Thoma wone ũrĩa ũtũũro wa mũndũ ũmwe warĩ mũici wagarũrũkire thutha wa gũthiĩ mũcemanio wa Aira a Jehova.
“Ndingĩathiire Handũ Itarĩ Mũcinga” (Mũrangĩri, Julaĩ 1, 2014)
Icunjĩ Ingĩ Hihi Ũngĩenda Gũthoma
CIŨRIA IRIA CIŨRAGIO KAINGĨ
Mũbango wa Aira a Jehova wa Kwĩruta Bibilia na Andũ Ũkoragwo Ũhaana Atĩa?
Rĩrĩa ũreruta Bibilia na Aira a Jehova, no ũhũthĩre Bibilia ĩrĩa ũkwenda. No ũnyite ũgeni andũ anyu othe a famĩlĩ kana arata aku rĩrĩa ũreruta.
