Shaitani na ndaimono hingo ciothe makoretwo marĩ ũgwati na matarĩ tha. Hĩndĩ ya tene Shaitani nĩ ooragire mahiũ na ndungata cia Ayubu, ũrĩa warĩ mwĩhokeku. Agĩcoka akĩũraga ciana ikũmi cia Ayubu na njĩra ya gũtũma kũgĩe na “rũhuho rũnene” rũrĩa rwamomorire nyũmba ĩrĩa maarĩ. Thutha ũcio akĩrehera Ayubu “mahũha marĩ ruo kuuma ikinya-inĩ rĩa kũgũrũ o nginya mũtwe.”—Ayubu 1:7-19; 2:7.

Rĩrĩa Jesu aarĩ gũkũ thĩ, ndaimono nĩ ciatũmaga andũ matuĩke bubu na atumumu. (Mathayo 9:32, 33; 12:22) Cianyaririre mũndũ ũmwe na igĩtũma etihangie na mahiga. (Mariko 5:5) Ningĩ no ciatũmire mwanake ũmwe akayũrũrũke, ikĩmũgũithia thĩ, na ‘ikĩmũtugutania ũũru mũno.’—Luka 9:42.

 Ũmũthĩ, Shaitani hamwe na ndaimono no moragaga. Ũrĩa kũrĩ nĩ atĩ, wĩra wao mũũru nĩ wongererekete mũno kuuma rĩrĩa maaharũrũkirio kuuma igũrũ. Maũndũ marĩa tũiguaga kuuma kũndũ kũingĩ thĩinĩ wa thĩ monanagia ũrĩa matarĩ tha. Nĩ mathĩnagia andũ amwe na mĩrimũ. Angĩ nao makamathumbũra ũtukũ, makagiria makome kana magatũma marote iroto njũru mũno. Angĩ makamathĩnia na njĩra ya ngomanio. Nao angĩ magatũma magũrũke, morage andũ angĩ, kana meyũrage.

Lintina, mũtũũri wa bũrũri wa Suriname ooigire atĩ ndaimono, kana roho mũũru, yoragire andũ 16 a famĩlĩ yake na ĩkĩmũnyarira kĩĩmwĩrĩ na kĩĩmeciria mĩaka 18. Kuumana na ũrĩa eeyoneire we mwene, ooigire atĩ ndaimono nĩ “ikenagĩrĩra kũnyarira andũ nginya magakua.”

No Jehova arĩ na ũhoti wa kũgitĩra ndungata ciake kuumana na tharĩkĩro cia Shaitani.—Thimo 18:10.