Mũisiraeli ũmwe wetagwo Elikana aarĩ na atumia erĩ meetagwo Hana na Penina, ĩndĩ Hana nĩwe eendete mũno. Penina nĩ aathirĩkagia Hana mũno tondũ we aarĩ na ciana nyingĩ, no Hana ndaarĩ mwana o na ũmwe. Elikana nĩ aatwaraga famĩlĩ yake Shilo nyũmba-inĩ ya Jehova o mwaka nĩguo makahoe. Hĩndĩ ĩmwe marĩ kũu nĩ aarorire Hana na akĩona arĩ na kĩeha kĩingĩ. Aamwĩrire ũũ: ‘Hana, ndagũthaitha ndũkarĩre. Ndĩ ho nĩ ũndũ waku, na nĩ ngwendete.’

Thutha ũcio, Hana nĩ eeherire nĩguo athiĩ akahoe arĩ wiki. Nĩ aarĩrire mũno agĩthaithaga Jehova amũteithie. Eerire Jehova ũũ: ‘Jehova, angĩkorũo nĩ ũkũhe kahĩĩ, nĩ ngakaheana kũrĩ we gatũũre gagũtungatagĩra ũtũũro-inĩ wako wothe.’

Eli, ũrĩa warĩ mũthĩnjĩri-Ngai-mũnene, nĩ onire Hana akĩrĩra na agĩciria atĩ aarĩ mũrĩu. Hana amwĩrire ũũ: ‘Mwathi wakwa, ti kũnyua nyuĩte. Ndĩ na thĩna mũnene na nĩguo ndĩrataarĩria Jehova.’ Eli nĩ aamenyire atĩ nĩ ahĩtia na akĩmwĩra ũũ: ‘Ngai arokũhe kĩrĩa ũrenda.’ Hana nĩ aaiguire aacokwo nĩ thayũ na  agĩthiĩ. Mwaka ũtanathira, nĩ agĩire kahĩĩ na agĩgeta Samueli. Ta hũũra mbica ũrĩa Hana aakenire!

Hana ndaariganĩirũo nĩ ũrĩa eerĩte Jehova. Rĩrĩa aatigithirie Samueli kuonga, nĩ aamũtwarire agatungate nyũmba-inĩ ya Jehova. Hana eerire Eli ũũ: ‘Kahĩĩ gaka nĩko ndaahoyaga. Ndaakarutĩra Jehova matukũ mako mothe.’ Elikana na Hana nĩ maaceragĩra Samueli o mwaka na makamũtwarĩra kagooti kerũ gatarĩ moko. Jehova nĩ aaheire Hana tũhĩĩ tũngĩ tũtatũ na tũirĩtu twĩrĩ.