ITHOMO RĨA 2
Ngai Nũũ?
1. Twagĩrĩirũo gũthathaiya Ngai nĩkĩ?
Ngai ũrĩa wa ma nĩwe Mũũmbi wa indo ciothe. Ndarĩ kĩambĩrĩria na ndarĩ hingo agaakorũo na mũico. (Thaburi 90:2) Nĩwe Kĩhumo kĩa ũhoro ũrĩa mwega ũrĩ thĩinĩ wa Bibilia. (1 Timotheo 1:11) Tondũ Ngai nĩwe watũheire muoyo-rĩ, twagĩrĩirũo kũmũthathaiya o we wiki.Thoma Kũguũrĩrio 4:11.
2. Ngai atariĩ atĩa?
Gũtirĩ mũndũ ũrĩ wona Ngai tondũ we nĩ Roho, ũguo nĩ kuuga atĩ muoyo wake nĩ wa igũrũ mũno tondũ ndakoragwo na mwĩrĩ wa nyama na thakame ta ciũmbe iria itũũraga gũkũ thĩ. (Johana 1:18; 4:24) O na kũrĩ ũguo, no tũhote kũmenya ũrĩa Ngai atariĩ kũgerera indo iria ombĩte. Kwa ngerekano, mĩthemba mĩingĩ ya matunda na mahũa ĩtuonagia atĩ nĩ arĩ ũũgĩ na wendo. Ũrĩa igũrũ na thĩ cigana gũtuonagia atĩ nĩ arĩ hinya.Thoma Aroma 1:20.
No twĩrute makĩria igũrũ rĩgiĩ ũrĩa Ngai atariĩ na njĩra ya gũthoma Bibilia. Kwa ngerekano-rĩ, nĩ ĩtwĩraga maũndũ marĩa Ngai endete na marĩa atendete, ũrĩa arũmbũyanagia na andũ, na ũrĩa ekaga maũndũ-inĩ ngũrani.Thoma Thaburi 103:7-10.
3. Hihi Ngai nĩ arĩ rĩĩtwa?
Jesu ooigire ũũ: “Ithe witũ ũrĩ igũrũ, rĩĩtwa rĩaku nĩ rĩtherio.” (Mathayo 6:9) O na gũtuĩka Ngai nĩ arĩ marĩĩtwa maingĩ ma gĩtĩo, akoragwo na rĩĩtwa rĩmwe tu. Rĩtamũkagwo na njĩra ngũrani thiomi-inĩ itiganĩte. Na Gĩkũyũ rĩĩtwa rĩu nĩ “Jehova.” No andũ amwe marĩtamũkaga “Yahweh.”Thoma Thaburi 83:18.
Rĩĩtwa rĩa Ngai nĩ rĩeheretio Bibilia-inĩ nyingĩ na handũ-inĩ harĩo hagekĩrũo marĩĩtwa ma gĩtĩo ta Mwathani kana Ngai. No rĩrĩa Bibilia yaandĩkirũo, yarĩ na rĩĩtwa rĩa Ngai maita ta 7,000. Jesu nĩ aamenyithanirie rĩĩtwa rĩa Ngai rĩrĩa aarutaga andũ ũhoro wa Ngai.Thoma Johana 17:26.
Wĩrorere video ya Hihi Ngai nĩ Arĩ Rĩĩtwa?
4. Hihi Jehova nĩ atũrũmbũyagia?
O ta ũrĩa mũthuri ũyũ endete kaana gake, noguo Ngai atwendagĩra ũtũũro mwega
Hihi kũingĩha kwa mĩnyamaro kuonanagia atĩ Jehova nĩ Ngai ũtatũrũmbũyagia? Andũ amwe moigaga atĩ Ngai nĩwe ũtũmaga tũnyamarĩke nĩguo atũgerie, no ũcio ti ũhoro wa ma.Thoma Jakubu 1:13.
Ngai nĩ aheete mũndũ gĩtĩo gĩa gũkorũo na wĩyathi wa gwĩthuurĩra. Na githĩ tũtikenaga nĩ ũndũ wa gũkorũo na wĩyathi wa gwĩthuurĩra gũtungatĩra Ngai? (Joshua 24:15) No andũ aingĩ mathuuraga gwĩka arĩa angĩ maũndũ moru, kwoguo mathĩna makaingĩha. Jehova nĩ aiguaga ũũru rĩrĩa ona wagi ta ũcio wa kĩhooto.Thoma Kĩambĩrĩria 6:5, 6.
Jehova nĩ Ngai ũtũrũmbũyagia. Endaga tũkenere ũtũũro. Ica ikuhĩ nĩ ekũniina mathĩna na arĩa mamarehaga. No ihinda-inĩ rĩrĩ, arĩ na gĩtũmi kĩega gĩa gwĩtĩkĩria mathĩna kwa ihinda. Thĩinĩ wa Ithoma rĩa 8, nĩ tũkeeruta gĩtũmi kĩu.Thoma 2 Petero 2:9; 3:7, 13.
5. Tũngĩkuhĩrĩria Ngai makĩria atĩa?
JJehova atwĩraga tũmũkuhĩrĩrie na njĩra ya kwaria nake mahoya-inĩ. Nĩ akenagio nĩ ithuĩ tũrĩ mũndũ ũmwe ũmwe. (Thaburi 65:2; 145:18) Akoragwo ehaarĩirie kuohanĩra. Nĩ onaga kĩyo gitũ gĩa kwenda kũmũkenia, o na gũtuĩka rĩmwe na rĩmwe nĩ tũhĩtagia. Kwoguo, o na gũtuĩka tũtirĩ akinyanĩru, no tũkorũo na ũrata wa hakuhĩ hamwe na Ngai.Thoma Thaburi 103:12-14; Jakubu 4:8.
Tondũ Jehova nĩ atũheete muoyo, twagĩrĩirũo kũmwenda gũkĩra ũrĩa twendete mũndũ ũngĩ o wothe. (Mariko 12:30) O ũrĩa ũkuonania wendo waku harĩ Ngai na njĩra ya kwĩruta makĩria ũhoro wake na gwĩka ũrĩa endaga, noguo ũkũmũkuhĩrĩria makĩria.Thoma 1 Timotheo 2:4; 1 Johana 5:3.
