Ũthamaki wa Ngai nĩ thirikari ya igũrũ. Ũgaacoka ithenya rĩa thirikari ici ingĩ ciothe na ũtũme wendi wa Ngai wĩkagwo kũrĩa igũrũ o na gũkũ thĩ. Ũhoro wĩgiĩ Ũthamaki wa Ngai nĩ ũhoro mwega. Ica ikuhĩ Ũthamaki wa Ngai nĩ ũkaarehera andũ thirikari njega ĩrĩa meriragĩria. Nĩ ũgaatũma andũ othe thĩinĩ wa thĩ magĩe na ũrũmwe.​—Thoma Danieli 2:44; Mathayo 6:9, 10; 24:14.

No mũhaka ũthamaki ũkorũo na mũthamaki. Jehova nĩ athuurĩte Mũrũ wake, Jesu Kristo, atuĩke Mũthamaki wa Ũthamaki Wake.​—Thoma Kũguũrĩrio 11:15.

Wĩrorere video ya Ũthamaki wa Ngai nĩ Kĩĩ?

Mũrũ wa Ngai nĩwe Mũthamaki ũrĩa wagĩrĩire tondũ nĩ mũtugi na nĩ arũmagĩrĩra kĩhooto. (Mathayo 11:28-30) Ningĩ, arĩ na ũhoti wa kũigana gũteithia andũ tondũ agaathamakĩra thĩ arĩ igũrũ. Thutha wa kũriũkio, Jesu nĩ aambatire igũrũ na agĩikara thĩ etereire guoko-inĩ kwa ũrĩo kwa Jehova. (Ahibirania 10:12, 13) Mũthia-inĩ, Ngai nĩ aamũheire hinya wa kwambĩrĩria gũthamaka.​—Thoma Danieli 7:13, 14.

Andũ metagwo “arĩa aamũre” nĩ magaathamaka hamwe na Jesu marĩ igũrũ. (Danieli 7:27) Atũmwo ehokeku a Jesu nĩo maarĩ a mbere gũthuurũo matuĩke aamũre. Nginyagia mahinda-inĩ maya, Jehova no akoretwo agĩthuura athuri na atumia ehokeku matuĩke aamũre. O ta Jesu, mariũkagio marĩ na mĩĩrĩ ya kĩĩroho.​—Thoma Johana 14:1-3; 1 Akorintho 15:42-44.

 Nĩ andũ aigana magaathiĩ igũrũ? Jesu aametire “karũũru kanini.” (Luka 12:32) Marigĩrĩrio-inĩ magaakorũo marĩ 144,000. Magaathamaka na Jesu igũrũ rĩa thĩ.​—Thoma Kũguũrĩrio 14:1.

Ũthamaki wa Ngai waambĩrĩirie gũthamaka mwaka-inĩ wa 1914. * Ikinya rĩa mbere rĩrĩa Jesu ooire atuĩka Mũthamaki nĩ kũharũrũkia Shaitani na ndaimono ciake gũkũ thĩ. Shaitani nĩ aagĩire na mathũgũta mũno na akĩambĩrĩria kũrehe thĩna thĩinĩ wa thĩ yothe. (Kũguũrĩrio 12:7-10, 12) Kuuma hĩndĩ ĩyo mĩnyamaro ya andũ nĩ yongererekete mũno. Mbaara, ng’aragu, ithingithia, na mĩrimũ, ciothe nĩ gĩcunjĩ gĩa “kĩmenyithia” kĩa atĩ ica ikuhĩ Ũthamaki nĩ ũgwathana thĩinĩ wa thĩ yothe.​—Thoma Luka 21:7, 10, 11, 31.

Kũgerera wĩra wa kũhunjia thĩinĩ wa thĩ yothe, Ũthamaki wa Ngai nĩ ũratũma kĩrĩndĩ kĩnene kĩa andũ moimĩte ndũrĩrĩ-inĩ ciothe magĩe na ũrũmwe. Andũ milioni nyingĩ ahooreri nĩ maratuĩka raiya a Ũthamaki wa Ngai rungu rwa Jesu. Ũthamaki wa Ngai nĩ ũkaamagitĩra rĩrĩa ũkaananga mũtabarĩre ũyũ mũũru wa maũndũ thĩinĩ wa thĩ. Kwoguo arĩa othe mendaga kũgunĩka nĩ Ũthamaki wa Ngai magĩrĩirũo kwĩruta gũtuĩka raiya athĩki a Ũthamaki wa Ngai rungu rwa Jesu.​—Thoma Kũguũrĩrio 7:9, 14, 16, 17.

Ihinda-inĩ rĩa mĩaka 1,000 Ũthamaki ũcio nĩ ũkaahingia muoroto ũrĩa Ngai aarĩ naguo kĩambĩrĩria-inĩ harĩ andũ. Thĩ yothe nĩ ĩgaatuĩka paradiso. Thutha ũcio, Jesu nĩ agaacokeria Ithe Ũthamaki. (1 Akorintho 15:24-26) Hihi nĩ harĩ mũndũ ũngĩra ũhoro wa Ũthamaki wa Ngai?​—Thoma Thaburi 37:10, 11, 29.