Gũtirĩ mũndũ wamenyaga macokio ma kĩũria kĩu kwa ihinda rĩa mĩaka mĩingĩ. Ihinda-inĩ rĩu, andũ milioni nyingĩ nĩ maakuaga kuumana na mĩrimũ ya kũgwatanio. Thutha-inĩ athomi a sayansi nĩ maamenyire ũũma wĩgiĩ mĩrimũ ĩyo. Nĩ maamenyire atĩ mĩrimũ kaingĩ ĩrehagwo nĩ njamuthi, tũnyamũ tũnini tũtangĩoneka na maitho ta bakteria kana virus. Kũmenya ũndũ ũcio nĩ gũteithĩtie andũ aingĩ metheme mĩrimũ, na marigite mĩrimũ mĩingĩ ũndũ ũrĩa ũteithĩtie andũ bilioni nyingĩ makorũo na ũgima mwega wa mwĩrĩ, na maikare ihinda iraiharaihu.

Ĩ ũhoro wĩgiĩ ciũria ingĩ cia bata twĩyũragia? Ũkuona ta ũngĩgunĩka atĩa ũngĩthuthuria ũhoro wa ma wĩgiĩ ciũria ici irũmĩrĩire?

• Ngai nũũ?

• Jesu Kristo nũũ?

• Ũthamaki wa Ngai nĩ Kĩĩ?

• Ihinda rĩrĩa rĩroka rĩgaakorũo rĩhaana atĩa?

Andũ aingĩ nĩ monete macokio ma ciũria icio, na ũndũ ũcio ũgatũma ũtũũro wao wagagĩre. O nawe no ũgunĩke mũno ũngĩmenya macokio ma cio.

Mũndũ no eyũrie ũũ: ‘Ingĩhota atĩa kũmenya ũhoro wa ma wĩgiĩ maũndũ matiganĩte?’ Ũrĩa kũrĩ nĩ atĩ, kũmenya ũhoro wa ma wĩgiĩ maũndũ maingĩ ũmũthĩ ti ũndũ mũhũthũ. Nĩkĩ?

Andũ aingĩ matiĩhokaga ũhoro ũrĩa ũheanagwo nĩ thirikari, ahũũri a biacara, kana nyũmba cia mohoro. Ti ũndũ mũhũthũ harĩ andũ kũmenya kana andũ arĩa angĩ mararia ũhoro wa ma, kana mararia kũringana na mawoni mao, makahitha maũndũ mamwe, kana makaheenania. Tondũ andũ matiĩhokanĩte na ũhoro mũingĩ ũrĩa ũheanagwo nĩ wa maheeni, andũ makoragwo na mawoni matiganĩte megiĩ ũhoro wa ma nĩ ũrĩkũ na ũrĩa ũhoro ũcio ũngĩmateithia.

O na kũrĩ na mĩhĩnga ĩyo, no kũhoteke kuona macokio ma kwĩhokeka megiĩ ciũria cia bata ũtũũro-inĩ. Na njĩra ĩrĩkũ? Na njĩra ya gwĩka ũrĩa wĩkaga o mũthenya nĩguo ũmenye ũhoro wa ma wĩgiĩ kĩndũ kana ũndũ mũna.

Mũndũ nĩ acaragia ũhoro wa ma wĩgiĩ maũndũ matiganĩte o mũthenya. Ta wĩcirie ũhoro wĩgiĩ Jessica. Ooigire ũũ: “Mũirĩtu wakwa nĩ athũkagĩrũo mũno angĩrĩa njũgũ karanga ũũ atĩ o na angĩcama kĩndũ kĩnini gĩthondeketwo nacio no kĩmũũrage.” Jessica nĩ endaga gũtigĩrĩra atĩ irio iria aragũra itigũthũkĩra mũirĩtu wake. Ooigire ũũ: “Ũndũ ũrĩa nyambaga gwĩka itanagũra kĩndũ, nĩ gũthoma na kinyi gĩthondeketwo na kĩĩ. Ngacoka ngeka ũthuthuria makĩria kana ngahũũrĩra kambuni ĩrĩa yathondekete kĩndũ kĩu nĩguo menye kana no makorũo mekĩrĩte njũgũ karanga. Ningĩ nĩ hoyaga ũhoro wa kwĩhokeka kũndũ kũngĩ nĩgetha menye kana nĩ ngũiganĩra na ũrĩa kambuni ĩyo ĩthondekaga indo.”

Maũndũ marĩa wendaga kũmenya ũhoro wa ma ũmegiĩ no gũkorũo ti ma bata ta ũcio wa Jessica, ĩndĩ o ta Jessica, no ũhũthĩre maũndũ maya marũmĩrĩire kũmenya macokio:

• Menya ũũma wĩgiĩ ũndũ mũna.

• Ĩka ũthuthuria makĩria.

• Tigĩrĩra atĩ kĩhumo kĩa ũhoro nĩ gĩa kwĩhokeka.

Maũndũ macio no magũteithie kuona macokio ma kwĩhokeka megiĩ ciũria cia bata ũtũũro-inĩ. Na njĩra ĩrĩkũ?

Jessica agĩcaria ũhoro wa ma wĩgiĩ Bibilia, aahũthĩrire njĩra o ta ĩrĩa ahũthagĩra agĩcaria ũhoro wa ma wĩgiĩ thĩna wa mũirĩtu wake. Ooigire ũũ: “Gũthoma na gwĩka ũthuthuria na kĩyo nĩ kwandeithirie kuona ũhoro wa ma thĩinĩ wa Bibilia.” O ta Jessica, andũ milioni nyingĩ nĩ merutĩte ũrĩa Bibilia yugaga ũhoro wĩgiĩ ciũria ici:

• Muoroto wa ũtũũro nĩ ũrĩkũ?

• Gũthiaga atĩa harĩ mũndũ rĩrĩa akua?

• Andũ manyamarĩkaga nĩkĩ?

• Ngai abangĩte kũniina mĩnyamaro yothe na njĩra ĩrĩkũ?

• Tũngĩka atĩa nĩguo famĩlĩ itũ ĩkorũo na gĩkeno?

No wone macokio ma kwĩhokeka megiĩ ciũria icio na ingĩ ũngĩthoma Bibilia na wĩke ũthuthuria makĩria thĩinĩ wa website ya www.mr1310.com.