HIHI NO ŨHOTE GŨTHUURA ŨRĨA ŨTŨŨRO WAKU WA MAHINDA MOKĨTE ŨKAHAANA? Andũ amwe metĩkĩtie atĩ ngirabu ĩkoragwo ĩrĩ njore, na kwoguo matingĩhota gũtua ũrĩa ũtũũro wao ũkũhaana. Rĩrĩa maũndũ marĩa matanyĩte maaga gũkinyanĩra, meĩraga atĩ hatirĩ ũndũ mangĩrahotire gwĩka. Moigaga: “Wa Ngai ndũrĩ mũgarũri.”

Angĩ nao maiguaga makuĩte ngoro rĩrĩa mona atĩ hatirĩ ũndũ mangĩka metheme mũhinyanĩrĩrio na maũndũ matarĩ ma kĩhooto marĩa marĩ thĩinĩ wa thĩ. Kwahoteka maanageria kwagagĩria ũtũũro wao no magakora atĩ maũndũ ta mbaara, wĩki-naĩ, icanjama cia ndũire, na kũrũara nĩ kwaharagania mĩbango yao. Magakĩyũria, ‘Ndĩregia nĩkĩ?’

Nĩ ma maũndũ matiganĩte no maharaganie mĩbango yaku. (Kohelethu 9:11) O na kũrĩ ũguo, no ũhote gũtua kana nĩ ũgatũũra tene na tene. Bibilia yonanagia atĩ ũtũũro waku wa mahinda mokĩte wĩhocetie harĩ itua rĩaku. Ta rora ũrĩa yugaga.

Musa, ũrĩa warĩ mũtongoria wa rũrĩrĩ rwa tene rwa Isiraeli, eerire Aisiraeli ũũ mbere ya maingĩrĩte Bũrũri wa Kĩĩranĩro: “Nĩndaiga o mbere yaku ũhoro wa gũtũũra muoyo, o na wa gĩkuũ; na wa kĩrathimo, o na wa kĩrumi; tondũ ũcio thura muoyo, nĩ getha ũtũũre muoyo, wee mwene, o na njiaro ciaku, wendage Jehova Ngai waku, na wathĩkagĩre uuge wake, na wĩgwatanagie nake.”—Gũcokerithia Maathani 30:15, 19, 20.

“Nĩndaiga o mbere yaku ũhoro wa gũtũũra muoyo, o na wa gĩkuũ; na wa kĩrathimo, o na wa kĩrumi; tondũ ũcio thura muoyo.”—Gũcokerithia Maathani 30:19

Ngai aarutire Aisiraeli kuuma ũkombo-inĩ Misiri na akĩmahe mweke wa kũgĩa na ũtũũro mwega ũrĩ na wĩyathi Bũrũri-inĩ wa Kĩĩranĩro. No harĩ ũndũ maabataraga gwĩka. Nĩ getha magĩe na irathimo icio, no mũhaka ‘mangĩathuurire muoyo.’ Na njĩra ĩrĩkũ? Na njĩra ya ‘kwendaga Ngai, gwathĩkagĩra uuge wake, na kwĩgwatanagia nake.’

O na rĩu nĩ tũigĩirũo ũndũ o ta ũcio mbere itũ, na kĩrĩa ũgũthuura nĩkĩo gĩgũtua ũrĩa ũtũũro waku wa mahinda mokĩte ũkahaana. Wathuura kwenda Ngai, gũthikagĩrĩria uuge wake, na kwĩgwatanagia nake, ũgũkorũo ũthuurĩte gũtũũra tene na tene thĩinĩ wa paradiso gũkũ thĩ. Nĩ na njĩra ĩrĩkũ ũngĩhingia maũndũ macio?

Wendo nĩguo ngumo ĩrĩa nene ya Ngai. Mũtũmwo Johana akĩandĩka atongoretio nĩ roho oigire: “Ngai nĩ wendo.” (1 Johana 4:8) Nĩkĩo rĩrĩa Jesu oririo nĩ rĩathani rĩrĩkũ inene gũkĩra maathani marĩa mangĩ mothe oigire ũũ: “No mũhaka wende Jehova Ngai waku na ngoro yaku yothe na muoyo waku wothe na meciria maku mothe.” (Mathayo 22:37) Mũndũ agĩrĩirũo gũkorũo na ũrata na Ngai nĩ ũndũ wa kũmwenda, no ti ũndũ wa guoya kana tondũ andũ angĩ nĩ mamwĩraga nĩ kwagĩrĩire. Tũkĩagĩrĩirũo gũtua itua rĩa kũmwenda nĩkĩ?

Wendo wa Jehova kwerekera andũ ũhaana ta wa mũciari wendete ciana ciake. O na gũtuĩka ti akinyanĩru, aciari mendete ciana ciao nĩ macitaaraga, magaciĩkĩra ngoro, magaciteithĩrĩria maũndũ-inĩ, na magacirũnga tondũ nĩ mendaga ikorũo na gĩkeno na igaacĩre. Aciari nao merĩgagĩrĩra ũndũ ũrĩkũ kuuma kũrĩ ciana? Merĩgagĩrĩra ciana ciao imende na cioe na ũritũ maũndũ marĩa macirutĩte nĩguo igunĩke. Na githĩ toguo Ithe witũ wa igũrũ erĩgagĩrĩra twĩke nĩguo tuonanie atĩ nĩ tũkenaga nĩ ũndũ wa maũndũ marĩa mothe atwĩkĩire?

Kũringana na thiomi iria Bibilia yaandĩkĩtwo nacio kĩambĩrĩria-inĩ, kiugo “gũthikĩrĩria” kaingĩ kĩahũthagĩrũo kuuga “gwathĩka.” Na githĩ ũguo toguo tũkoragwo tũkĩenda kuuga hĩndĩ ĩrĩa tũrera mwana, “Thikĩrĩria aciari aku”? Kwoguo gũthikĩrĩria uuge wa Ngai nĩ kũmenya maũndũ marĩa oigĩte twĩke na kũmathĩkĩra. Na tondũ tũtingĩigua Ngai akĩaria ĩmwe kwa ĩmwe, tũmũthikagĩrĩria na njĩra ya gũthoma Kiugo gĩake Bibilia na kũhũthĩra maũndũ marĩa twathoma.—1 Johana 5:3.

Hĩndĩ ĩmwe Jesu akĩonania bata wa gũthikĩrĩria uuge wa Ngai, oigire: “To mũgate wiki ũngĩtũũria mũndũ muoyo, no nĩ kiugo gĩothe kiumaga kanua-inĩ ka Jehova.” (Mathayo 4:4) O ta ũrĩa kũrĩa irio kũrĩ kwa bata harĩ ithuĩ, noguo kwĩruta ũhoro wa Ngai kũrĩ kwa bata o na makĩria. Nĩkĩ? Mũthamaki Suleimani ũrĩa warĩ mũũgĩ mũno aataarĩirie atĩ, “Ũũgĩ nĩ mwĩgito; o ta ũrĩa mbia irĩ mwĩgito; no rĩrĩ, wega wa ũmenyi maũndũ nĩ ũyũ, atĩ ũũgĩ nĩũtũũragia mũndũ muoyo ũrĩa wĩ naguo.” (Kohelethu 7:12) Ũmenyo na ũũgĩ kuuma kũrĩ Ngai no itũgitĩre mahinda-inĩ maya na itũteithie tũtue itua rĩega rĩngĩtũma tũkaheo muoyo wa tene na tene.

Ta ririkana ũndũ ũrĩa Jesu aagwetire ũrĩa ũkũgwetetwo gĩcunjĩ-inĩ kĩrĩa kiuma mbere, akiuga: “Mũromo nĩ mũceke na njĩra ĩrĩa ĩkinyagia andũ harĩ muoyo nĩ ngunderu, na andũ arĩa mamĩonaga nĩ anini.” (Mathayo 7:13, 14) Tũgĩthiĩra njĩra-inĩ ĩhaana ũguo, no tũgunĩke mũno tũngĩkorũo na mũndũ ũmĩũĩ wega na tũtwarane nake nĩguo tũkinye kũrĩa tũrathiĩ, na nĩ muoyo-inĩ wa tene na tene. Nĩkĩo nĩ harĩ bata gũtwarana kana gũikara hakuhĩ na Ngai. (Thaburi 16:8) No tũngĩka ũguo atĩa?

O mũthenya nĩ gũkoragwo na maũndũ maingĩ arĩ o mũhaka twĩke na mangĩ maingĩ tũngĩenda gwĩka. Maũndũ ta macio no matũme tũkorũo na mĩhang’o mĩingĩ nginya tũkorũo tũtarĩ na ihinda rĩa kũigana rĩa gwĩciria ũrĩa Ngai arenda twĩke, o na kana rĩage biũ. Nĩkĩo Bibilia ĩtũririkanagia ũũ: “Mwĩroragei biũ atĩ ũrĩa mũthiaga ti ta andũ matarĩ ogĩ no nĩ ta andũ ogĩ, mũkĩhũthagĩra mahinda manyu wega biũ, nĩ gũkorũo matukũ maya nĩ moru.” (Aefeso 5:15, 16) Tũikaraga hakuhĩ na Ngai na njĩra ya gũtigĩrĩra atĩ ũrata witũ nake nĩguo ũndũ ũrĩa wa bata mũno ũtũũro-inĩ witũ.—Mathayo 6:33.

O na gũtuĩka ndũngĩhota gũcenjia mahinda marĩa mahĩtũku, kũrĩ maũndũ ũngĩka nĩ getha we na arĩa wendete mũkaagĩa na ũtũũro mwega mahinda mokĩte. Bibilia yonanagia atĩ Ithe witũ wa igũrũ Jehova nĩ atwendete mũno na atĩ nĩ atũmenyithagia ũrĩa endaga twĩke. Ta rora ciugo ici cia mũnabii Mika:

“Atĩrĩrĩ, wee mũndũ ũyũ, githĩ Jehova ndakuonetie maũndũ marĩa mega? Naguo ũndũ ũrĩa egwathaga wĩke-rĩ, nĩ ũrĩkũ, tiga o wĩkage maũndũ marĩa maagĩrĩire, na ningĩ atĩ wendage ũhoro wa kũiguanĩra tha, o na ũthiage na mĩthiĩre ya kwĩnyihĩria Ngai wĩgwatanĩtie nake?”—Mika 6:8.

Hihi nĩ ũgwĩtĩkĩra gũtwarana na Jehova nĩguo ũkeegĩra na irathimo itagathira iria akahee arĩa matwaranaga nake? Itua nĩ rĩaku!