Ndaciarĩirũo Ciudad Mante, itũũra ithaka rĩrĩ Tamaulipas, bũrũri-inĩ wa Mexico. Aikari a kũu nĩ andũ marĩ ũtaana na nĩ atugi. No ũndũ wa kĩeha nĩ atĩ, itũũra rĩu rĩarĩ ũgwati mũno nĩ ũndũ wa ikundi cia eki-naĩ.

Ndaciarĩtwo ndĩ wa kerĩ famĩlĩ-inĩ ya imwana inya. Ndabatithĩirio Kanitha wa Gatoreki kũrĩa ndatwarĩtwo nĩ aciari akwa, na thutha ũcio ngĩtuĩka mũini wa kwaya ya kanitha. Nĩ ndendaga gũkenia Ngai tondũ nĩ ndetigagĩra mũno gũgaatuĩrũo na gũtũũra hĩaga tene na tene icua-inĩ.

Ndĩ wa mĩaka ĩtano, baba nĩ aatũtiganĩirie. Ũndũ ũcio nĩ watũmire ngĩe na kĩeha kĩnene na ihooru rĩa ngoro. Ndiataũkĩirũo nĩ kĩrĩa gĩatũmire atũtiganĩrie na nĩguo twamwendete. Ũndũ ũcio watũmire mami arutage wĩra mathaa maingĩ kũraya na mũciĩ nĩguo atũhingĩrie mabataro maitũ tũrĩ imwana inya.

Ndahũthĩrire mweke ũcio gũtĩĩraga cukuru nĩguo thiĩ ngatindanie na ciana iria nene. Ciandutire kũrumana, kũnyua thigara, kũiya, na kũrũa ngundi. Tondũ nĩ ndendete mũno gũtongoria andũ arĩa angĩ, nĩ nderutire kũrũa ngundi, kũrũndana, na njĩra ingĩ ngũrani cia mbaara, hamwe na kũhũthĩra indo cia mbaara. Ngĩtuĩka mũndũ wendete ũhinya. Kaingĩ nĩ ndeingĩranagia na haaro cia mĩcinga, na maita maingĩ ndatigagwo ngomete barabara-inĩ njiyũire thakame ndigĩtie hanini gũkua. Nĩ ndatũmaga mami aigue kĩeha kĩnene mũno rĩrĩa angora haana ũguo akanjoya na akahanyũkia thibitarĩ!

Ndĩ na mĩaka 16, mwanake ũmwe wĩtagwo Jorge, warĩ mũrata wakwa tũrĩ anini nĩ aatũcereire. Aatwĩrire nĩ Mũira wa Jehova na atĩ nĩ eendaga gũtũhe ndũmĩrĩri ya bata mũno. Akĩambĩrĩria gũtũtaarĩria wĩtĩkio wake akĩhũthagĩra Bibilia. Ndiathomete Bibilia mbere ĩyo, na nĩ ndakenire kwĩruta ũhoro wĩgiĩ rĩĩtwa rĩa Ngai na muoroto wake. Jorge agĩtũũria kana no twende kwĩruta Bibilia nake, na tũgĩtĩkĩra.

Nĩ ndaakenire mũno kũmenya atĩ ũrutani wĩgiĩ icua rĩa mwaki ndũkoragwo thĩinĩ wa Bibilia. (Thaburi 146:4; Kohelethu 9:5) Rĩrĩa ndamenyire  ũguo, ngĩthirũo nĩ guoya mũru kwerekera Ngai. Handũ ha ũguo, ngĩambĩrĩria kũmuona ahaana ta Ithe ũrĩ wendo, ũrĩa wendagĩra ciana ciake maũndũ mega.

O ũrĩa ndathiire na mbere kwĩruta Bibilia, noguo ndonire bata wa kũgarũrĩra. Nĩ ndabataraga gũkũria ngumo ya wĩnyihia na gũtiga maũndũ ma ũhinya. Ũtaaro ũrĩa ũrĩ thĩinĩ wa 1 Akorintho 15:33 nĩ wandeithirie. Rĩandĩko rĩu riugaga ũũ: “Thiritũ njũru nĩ ithũkagia mĩtugo mĩega.” Nĩ ndamenyire atĩ angĩkorũo nĩ ngwenda kũgarũrĩra, no mũhaka ingĩatigire kũnyitanĩra na andũ arĩa maarĩ na ũgucania mũru. Kwoguo, ndatiganire na arata akwa a tene, ngĩgĩa ũrata na Akristiano a ma kĩũngano-inĩ, arĩa maniinaga mathĩna mao makĩhũthĩra ũtaaro wa Bibilia, handũ ha ngundi kana njĩra ingĩ cia ũhinya.

Rĩandĩko rĩngĩ rĩandeithirie mũno nĩ Aroma 12:17-19. Riugaga ũũ: “Mũtikaneke mũndũ o na ũrĩkũ ũũru tondũ wa ũũru ũrĩa amwĩkĩte. . . . Ĩkagai o ũrĩa wothe mũngĩhota mũkoragwo na thayũ hamwe na andũ othe. . . . mũtikerĩhagĩrie, . . . tondũ nĩ kwandĩkĩtwo ũũ: ‘Jehova oigĩte; “Kũrĩhanĩria nĩ gwakwa; nĩ niĩ ngaarĩhanĩria.”’” Nĩ ndamenyire atĩ Jehova nĩ akaanina wagi wothe wa kĩhooto na njĩra yake, ihinda rĩake rĩakinya. O kahora kahora, ngĩtooria mũtũũrĩre wakwa wa ũhinya.

Ndikariganĩruo ũrĩa gwekĩkire hwaĩ-inĩ ũmwe ngĩinũka. Gĩkundi kĩmwe kĩa andũ ethĩ kĩrĩa kĩarĩ ũthũ na gĩkundi kĩrĩa ndatiganĩte nakĩo, nĩ gĩatharĩkĩire, na mũtongoria wakĩo akĩngũtha na thutha na akĩanĩrĩra, akiuga, “Wĩrũĩrĩre!” Ihinda-inĩ o rĩu, ngĩhoya Jehova andeithie gũkirĩrĩria tharĩkĩro ĩyo. O na gũtuĩka nĩ ndaiguaga mũno ngĩenda kwĩrĩhĩria, nĩ ndahotire kũmeherera. Mũthenya ũyũ ũngĩ, nĩ ndacemanirie na mũtongoria wa gĩkundi kĩu arĩ wiki. Ngĩigua ndĩ na marũrũ maingĩ mũno ngĩenda kwĩrĩhĩria, no o rĩngĩ ngĩhoya Jehova andeithie kwĩgirĩrĩria. Nĩ ndagegire mũno rĩrĩa mwanake ũcio okire akĩnjĩra: “Njohera nĩ ũndũ wa maũndũ marĩa marekĩkire ira hwaĩ-inĩ. Ũhoro wa ma nĩ atĩ, no nyende kũhaana ta we. Ndĩrenda kwĩruta Bibilia.” Nĩ ndakenire mũno tondũ nĩ ndahotete kũgirĩrĩria marakara makwa! Nĩ ũndũ ũcio, tũkĩambĩrĩria kwĩruta Bibilia nake.

Ũndũ wa kĩeha nĩ atĩ, andũ a famĩlĩ itũ matiathire na mbere kwĩruta Bibilia mahinda-inĩ macio. O na kũrĩ ũguo, nĩ ndatuire itua irũmu rĩa gũthiĩ na mbere kwĩruta Bibilia, na kwaga gwĩtĩkĩria mũndũ kana kĩndũ o na kĩ kĩngirĩrĩrie. Nĩ ndamenyaga atĩ kũnyitanĩra kaingĩ na andũ a Ngai nĩ kũngĩahonirie ironda ciakwa cia ngoro na gũtũme ngĩe na famĩlĩ ĩrĩa ndabataraga. Nĩ ndaathire na mbere kĩĩroho, na mwaka-inĩ wa 1991 ngĩbatithio, ngĩtuĩka Mũira wa Jehova.

Ndatũire na ruo rwa ngoro, ngenda gũtongoria arĩa angĩ na ndarĩ na ũhinya. No Kiugo kĩa Ngai nĩ kĩgarũrĩte ũtũũro wakwa biũ. Rĩu hunjagia ndũmĩrĩri ya Bibilia ya thayũ kũrĩ mũndũ o wothe ũngĩthikĩrĩria. Nĩ ngĩte na mweke wa mwanya wa gũtungata mĩaka 23 ndĩ ndungata ya mahinda mothe.

Kwa ihinda rĩna, nĩ nderutĩire gũtungata wabici-inĩ ya rũhonge ya Aira a Jehova bũrũri-inĩ wa Mexico. Ndĩ kũu, nĩ twacemanirie na Claudia, mũirĩtu Mũkristiano ũrĩ kĩyo, na tũkĩhikania mwaka-inĩ wa 1999. Nĩ njokagĩria Jehova ngatho mũno nĩ ũndũ wa kũndathima na mũtumia mwĩhokeku!

Nĩ twatungatĩire hamwe nake kĩũngano-inĩ kĩmwe kĩa Rũthiomi rwa Kwaria na Ciĩko rwa Mexico, gũteithia andũ matarĩ ũhoti wa kũigua merute ũhoro wĩgiĩ Jehova. Thutha ũcio, nĩ tworirio tũthiĩ bũrũri wa Belize tũkarute andũ a kũu Bibilia. O na gũtuĩka ũtũũro witũ nĩ mũhũthũ, tũrĩ na kĩrĩa gĩothe tũrabatara nĩguo tũkorũo na gĩkeno. Tũtingĩũcenjania na kĩndũ kĩngĩ o na kĩrĩkũ.

Thutha wa ihinda, mami nĩ aacokereire wĩruti wake wa Bibilia na akĩbatithio. Ningĩ, mũrũ wa maitũ ũrĩa mũkũrũ, mũtumia wake, na ciana ciao rĩu nĩ Aira a Jehova. Arata amwe akwa arĩa ndahunjĩirie o nao rĩu nĩ matungatagĩra Jehova.

Ũndũ wa kĩeha nĩ atĩ, andũ amwe a famĩlĩ itũ nĩ makuĩte tondũ nĩ maagire kũnina marakara mao moru. Angĩkorũo kũna ndiacenjirie mĩthiĩre yakwa, o na niĩ rĩu ingĩrĩ mũkuũ. Nĩ ngenaga tondũ Jehova nĩ aangucĩrĩirie harĩ we na harĩ athathaiya ake, arĩa maandutire marĩ na ũkirĩrĩria na ũtugi, ũrĩa ingĩhũthĩra motaaro ma Bibilia ũtũũro-inĩ wakwa.